Credit Card | క్రెడిట్ కార్డు లిమిట్ తగ్గిందా? కారణాలు ఇవే.. స్కోరుపైనా ప్రభావం..

Credit Card | క్రెడిట్ కార్డు పరిమితి (లిమిట్) పెరగడం గురించి చాలా మంది వింటుంటారు. అయితే బ్యాంకులు కొన్ని సందర్భాల్లో కార్డు లిమిట్‌ను తగ్గిస్తాయనే విషయం చాలామందికి తెలియదు. అకస్మాత్తుగా లిమిట్ తగ్గితే వినియోగదారులు ఆందోళన చెందడం సహజమే. అయితే ప్రతిసారి అది ఆర్థిక సమస్యలకే సంకేతం కాదని నిపుణులు చెబుతున్నారు. క్రెడిట్ కార్డును ఎక్కువకాలం ఉపయోగించకుండా ఉంచితే బ్యాంకులు ఆ కార్డుపై ఉన్న పరిమితిని తగ్గించే అవకాశం ఉంటుంది. వాడకంలో లేని ఖాతాలపై అధిక క్రెడిట్ లైన్ కొనసాగించడం బ్యాంకులకు ప్రయోజనకరం కాదని భావిస్తాయి. ముఖ్యంగా అత్యవసర అవసరాల కోసం మాత్రమే ఉంచుకునే సెకండరీ కార్డుల విషయంలో ఈ పరిస్థితి ఎక్కువగా కనిపిస్తుంది. క్రెడిట్ కార్డు బిల్లులు లేదా ఈఎంఐల చెల్లింపుల్లో తరచూ ఆలస్యం జరిగితే బ్యాంకులు రిస్క్‌ను పెరిగినట్లుగా పరిగణిస్తాయి. ఆలస్యపు చెల్లింపులు, ఆటో డెబిట్ విఫలం కావడం, కనీస బకాయిని మాత్రమే చెల్లించడం, క్రెడిట్ వినియోగం అధికంగా ఉండటం వంటి అంశాలు లిమిట్ తగ్గింపుకు కారణమవుతాయి.

30 శాతం లోపే వినియోగం ఉండాలి..

ఉద్యోగ మార్పు, జీతం తగ్గడం లేదా బ్యాంకుకు అనుసంధానమైన ఖాతాలో జీతం జమ కాకపోవడం వంటి పరిస్థితుల్లో కూడా బ్యాంకులు క్రెడిట్ పరిమితిని సమీక్షిస్తాయి. అలాగే క్రెడిట్ రిపోర్టులో ఇతర రుణాలు పెరిగినట్లు కనిపించినా, వరుసగా కొత్త రుణాల కోసం విచారణలు జరిగినా అప్రమత్తమవుతాయి. ప్రతి నెలా అందుబాటులో ఉన్న క్రెడిట్ పరిమితిని దాదాపు పూర్తిగా వినియోగించడం కూడా బ్యాంకులకు హెచ్చరిక సంకేతంగా మారుతుంది. దీనిని ఆర్థిక క్రమశిక్షణ కంటే అప్పులపై అధిక ఆధారపడటంగా పరిగణించే అవకాశం ఉంటుంది. అందుకే మొత్తం లిమిట్‌లో 30 శాతం లోపే వినియోగాన్ని ఉంచాలని ఆర్థిక నిపుణులు సూచిస్తున్నారు. కార్డు పరిమితి తగ్గడం వల్ల క్రెడిట్ యుటిలైజేషన్ రేషియో పెరుగుతుంది. ఉదాహరణకు రూ.5 లక్షల లిమిట్‌లో రూ.1 లక్ష వినియోగిస్తే అది 20 శాతం మాత్రమే. కానీ అదే లిమిట్‌ను రూ.2 లక్షలకు తగ్గిస్తే వినియోగ నిష్పత్తి 50 శాతానికి చేరుతుంది. ఈ పెరుగుదల క్రెడిట్ స్కోరుపై ప్రతికూల ప్రభావం చూపే అవకాశం ఉంటుంది.

బ్యాంకుల‌ను సంప్ర‌దించాలి..

అయితే లిమిట్ త‌గ్గితే ప‌లు సూచ‌న‌లు పాటించాలి. బ్యాంకును సంప్రదించి తగ్గింపుకు గల కారణాలను తెలుసుకోవాలి. ఆదాయ ధ్రువీకరణ పత్రాలు, చెల్లింపుల చరిత్రను సమర్పించి లిమిట్ పునరుద్ధరణ కోరవచ్చు. క్రెడిట్ రిపోర్టును పరిశీలించి తెలియని రుణాలు లేదా చెల్లింపుల జాప్యాలు ఉన్నాయా చూడాలి. లిమిట్ తగ్గిన వెంటనే కొత్త క్రెడిట్ కార్డుల కోసం దరఖాస్తు చేయకుండా ఉండటం మంచిది. చెల్లింపులను సమయానికి చేస్తూ, క్రెడిట్ వినియోగాన్ని నియంత్రణలో ఉంచడం ద్వారా భవిష్యత్తులో లిమిట్ పెంపు అవకాశాలు మెరుగుపడతాయి. బ్యాంకులు క్రెడిట్ కార్డు పరిమితిని తగ్గించడం వెనుక అనేక కారణాలు ఉంటాయి. కాబట్టి లిమిట్ తగ్గిందని వెంటనే ఆందోళన చెందకుండా, కారణాలను తెలుసుకుని ఆర్థిక క్రమశిక్షణను కొనసాగించడం ఉత్తమ మార్గం.