Stock Markets | వ‌రుస‌గా 5వ రోజు న‌ష్టాల్లోనే ముగిసిన‌ స్టాక్ మార్కెట్లు.. 4 నెల‌ల్లో అతి పెద్ద ప‌త‌నం..

Stock Markets | దేశీయ స్టాక్ మార్కెట్లు శుక్రవారం కూడా నష్టాల్లో ముగిశాయి. సెన్సెక్స్ 332 పాయింట్లు పడిపోయి 76,060 వద్ద ముగియగా, నిఫ్టీ 102 పాయింట్లు కోల్పోయి 23,767 వద్ద స్థిరపడింది. దీంతో నిఫ్టీ కీలకమైన 23,800 స్థాయిని నిలబెట్టుకోలేకపోయింది. ఈ వారంలో వరుసగా ఐదు ట్రేడింగ్ సెషన్లలో మార్కెట్లు నష్టాలను నమోదు చేయడం గమనార్హం. మార్కెట్ పతనానికి ప్రధాన కారణాల్లో ఒకటిగా ఆటో షేర్లలో ప్రాఫిట్ బుకింగ్ నిలిచింది. ఆటో రంగంలోని షేర్లలో పెట్టుబడిదారులు లాభాల స్వీకరణకు మొగ్గుచూపడంతో ఈ రంగం భారీ అమ్మకాల ఒత్తిడిని ఎదుర్కొంది. అలాగే నాన్-బ్యాంకింగ్ ఫైనాన్షియల్ కంపెనీల‌ (ఎన్‌బీఎఫ్‌సీ) షేర్లు కూడా బలహీనంగా ట్రేడ్ కావడంతో బెంచ్‌మార్క్ సూచీలపై అదనపు ఒత్తిడి పడింది. త్రైమాసిక ఫలితాల ప్రభావంతో పలు షేర్లలో భారీ అమ్మకాలు కనిపించాయి. శ్రీ‌రామ్ ఫైనాన్స్ మిశ్రమ త్రైమాసిక ఫలితాల‌ను ప్రకటించడంతో షేర్‌ 2 శాతం పడిపోయింది. మోతీలాల్ ఓస్వాల్ షేర్‌ ఫలితాల అనంతరం 7 శాతం క్షీణించగా, వి-మార్ట్ రిటైల్ 5 శాతం, సీజీ పవర్ 1 శాతం నష్టపోయాయి.

క్షీణించిన ఫుడ్ డెలివ‌రీ సంస్థ‌ల స్టాక్స్‌..

వినియోగదారుల రంగం, మిడ్‌క్యాప్ కంపెనీల్లో కూడా బలహీనత కనిపించింది. పెరుగుతున్న పోటీపై వచ్చిన నివేదికల ప్రభావంతో ఎటర్నల్, స్విగ్గీ షేర్లు క్షీణించాయి. విస్తృత మార్కెట్లో జీఈ వెర్నోవా, హీరో మోటో, హిటాచి, అంబర్ ఎంటర్‌ప్రైజెస్ మిడ్‌క్యాప్ విభాగంలో ప్రధాన నష్టపోయిన కంపెనీలుగా నిలిచాయి. స్విగ్గీ షేరు పతనంపై జేఎం ఫైనాన్షియల్ మేనేజింగ్ డైరెక్టర్, ఫండ్ మేనేజర్ ఆశిష్ చతుర్మోతా స్పందించారు. ఎంఎస్‌సీఐ సూచీ సవరణల కారణంగా సాంకేతికంగా అమ్మకాల ఒత్తిడి ఏర్పడిందని, దీంతో కొంతకాలం షేర్‌ తక్కువ స్థాయిల్లో కన్సాలిడేట్ అయ్యే అవకాశం ఉందని తెలిపారు. అయితే కంపెనీ ఇండియన్ ఓన్డ్ అండ్ కంట్రోల్డ్ కంపెనీ (ఐఓసీసీ)గా మారడం కీలక మలుపని పేర్కొన్నారు. దీంతో మార్కెట్‌ప్లేస్ మోడల్ నుంచి ఇన్వెంటరీ ఆధారిత మోడల్‌కు మారే అవకాశం ఉండటంతో మార్జిన్లు గణనీయంగా మెరుగుపడతాయని చెప్పారు.

ప‌డిపోయిన షేర్లే ఎక్కువ‌..

క్విక్ కామర్స్ రంగంలో పోటీ తీవ్రంగా ఉన్నప్పటికీ, బ్లింకిట్ ఇప్పటికే లాభదాయక దశలోకి వెళ్లిందని, స్విగ్గీ కూడా సుమారు 200 బేసిస్ పాయింట్ల మార్జిన్ విస్తరణతో లాభాల దిశగా ప్రయాణించే అవకాశముందని ఆశాభావం వ్యక్తం చేశారు. మరోవైపు జెప్టో ఒత్తిడిని ఎదుర్కొంటోందని, అందువల్ల స్విగ్గీకి మంచి అవకాశాలు ఉన్నాయని పేర్కొన్నారు. ధరలు మరింత తగ్గినప్పుడు స్విగ్గీ షేర్లలో పెట్టుబడి పెట్టేందుకు ఇది మంచి అవకాశమ‌ని అభిప్రాయపడ్డారు. మార్కెట్ విస్తృతి కూడా ప్రతికూలంగానే కనిపించింది. అడ్వాన్స్-డిక్లైన్ నిష్పత్తి 4:5గా నమోదై, పెరిగిన షేర్ల కంటే పడిపోయిన షేర్ల సంఖ్య ఎక్కువగా ఉందని వెల్లడించింది. అయితే ఫైనాన్షియల్, ఇన్ఫర్మేషన్ టెక్నాలజీ రంగాల్లో ఇంట్రాడే కనిష్ట స్థాయిల నుంచి కోలుకోవడం కొంత ఉపశమనం కలిగించింది. దీంతో నిఫ్టీ బ్యాంక్ సూచీ 102 పాయింట్లు పెరిగి 56,694 వద్ద ముగిసింది. నిఫ్టీలో హెచ్‌సీఎల్ టెక్, విప్రో టాప్ గెయినర్లుగా నిలవగా, కేపీఐటీ టెక్నాలజీస్, టాటా ఎల్క్సీ షేర్లు 4 నుంచి 6 శాతం వరకు లాభపడ్డాయి.

భారీగా ప‌త‌న‌మైన చ‌మురు ధ‌ర‌లు..

నిఫ్టీ మిడ్‌క్యాప్ సూచీ 63 పాయింట్లు పడిపోయి 61,622 వద్ద ముగిసింది. అయితే యునైటెడ్ స్పిరిట్స్ లిమిటెడ్ (యూఎస్‌ఎల్) 2027 ఆర్థిక సంవత్సరానికి బలమైన వృద్ధి మార్గదర్శకత్వం ఇవ్వడంతో షేరు 4 శాతం కంటే ఎక్కువ ఎగిసింది. సెన్సెక్స్‌లో సిప్లా, ఐటీసీ, ట్రెంట్, టెక్ మహీంద్రా, రిలయన్స్ ఇండస్ట్రీస్, స్టేట్ బ్యాంక్ ఆఫ్ ఇండియా ప్రధాన లాభదాయక షేర్లుగా నిలిచాయి. మరోవైపు బజాజ్ ఫైనాన్స్, ఎటర్నల్, శ్రిరామ్ ఫైనాన్స్, మహీంద్రా అండ్ మహీంద్రా, భారతి ఎయిర్‌టెల్, ఆయిల్ అండ్ నేచురల్ గ్యాస్ కార్పొరేషన్ ప్రధానంగా నష్టపోయిన షేర్లుగా నమోదయ్యాయి. కాగా అంత‌ర్జాతీయ మార్కెట్‌ల‌లో గ‌త వారం రోజులుగా ముడి చ‌మురు ధ‌ర‌లు పెరుగుతుండ‌గా శుక్ర‌వారం భారీగా త‌గ్గాయి. ఉద‌యం సెష‌న్‌లో ధ‌ర‌లు భారీగా పెరిగిన‌ప్పటికీ మార్కెట్లు కోలుకోవ‌డంతో చ‌మురు ధ‌ర‌లు ప‌త‌నం అయ్యాయి. బ్రెంట్ క్రూడ్ ధ‌ర 2.51 శాతం మేర త‌గ్గి బ్యారెల్‌కు 91 డాల‌ర్ల‌కు చేర‌గా, డ‌బ్ల్యూటీఐ క్రూడ్ ధ‌ర 3.01 శాతం క్షీణించి బ్యారెల్‌కు 90 డాల‌ర్ల‌కు చేరింది. ఇక ఫారెక్స్ మార్కెట్‌లో రూపాయి కాస్త బ‌ల‌ప‌డింది. అమెరికా డాల‌ర్‌తో పోలిస్తే 96.55 వ‌ద్ద ఉన్న రూపాయి ఈ సెష‌న్‌లో 0.01 శాతం లాభ‌ప‌డింది.