Anthropic | అతి పెద్ద ఐపీఓకు సిద్ధ‌మ‌వుతున్న ఆంథ్రోపిక్‌.. ఆఫ‌ర్ విలువ 100 బిలియ‌న్ డాల‌ర్లు..

Anthropic | ఆర్టిఫిషియల్ ఇంటెలిజెన్స్ స్టార్టప్ ఆంథ్రోపిక్ చరిత్రలోనే అతిపెద్ద ఐపీఓకు సిద్ధమవుతున్నట్లు రాయిటర్స్ ఒక క‌థ‌నంలో తెలిపింది. ఈ భారీ పబ్లిక్ ఆఫరింగ్‌లో యాంకర్ ఇన్వెస్టర్‌గా ఎన్విడియాను చేర్చుకునేందుకు ఆంథ్రోపిక్ చర్చలు జరుపుతున్నట్లు ఈ వ్యవహారంపై అవగాహన ఉన్న ఇద్దరు వ్యక్తులను ఉటంకిస్తూ రాయిటర్స్ తెలిపింది. ఆంథ్రోపిక్ ఈ ఐపీఓ ద్వారా గరిష్ఠంగా 100 బిలియన్ డాలర్లు, అంటే సుమారు రూ.8.4 లక్షల కోట్లను సమీకరించే అవకాశముంది. దీంతో కంపెనీ విలువ సుమారు 2 ట్రిలియన్ డాలర్లు, అంటే దాదాపు రూ.168 లక్షల కోట్లకు చేరే అవకాశం ఉందని సంబంధిత వర్గాలు వెల్లడించాయి. ఎన్విడియా ఈ ఐపీఓలో గరిష్ఠంగా 10 బిలియన్ డాలర్లు పెట్టుబడి పెట్టే అంశాన్ని పరిశీలిస్తోంది. అయితే ఈ ప్రణాళికలు ఇంకా చర్చల దశలోనే ఉన్నాయని, భవిష్యత్తులో మార్పులు జ‌రిగే అవ‌కాశం ఉంద‌ని సమాచారం.

ఎన్విడియా భారీ పెట్టుబ‌డులు..

ఆంథ్రోపిక్‌లో ఎన్విడియా భాగస్వామ్యం గతంలో వెల్లడికాని కీలక పరిణామంగా నిలవనుంది. ఇంత భారీ ఐపీఓకు ముందుగానే ఎన్విడియా వంటి ఆర్థికంగా బలమైన వ్యూహాత్మక పెట్టుబడిదారులు మద్దతు ఇవ్వడం ద్వారా ఆంథ్రోపిక్‌కు అదనపు విశ్వసనీయత లభించే అవకాశం ఉంది. అలాగే ఎన్విడియా, ఆంథ్రోపిక్ మధ్య ఇప్పటికే ఉన్న వ్యాపార సంబంధాలు మరింత బలపడనున్నాయి. ఐపీఓ మార్కెట్లోకి రాకముందే నిర్దిష్ట వాటాను కొనుగోలు చేసేందుకు అంగీకరించే సంస్థాగత పెట్టుబడిదారులను సాధారణంగా యాంకర్ ఇన్వెస్టర్లుగా పిలుస్తారు. భారీ మొత్తాలను సమీకరించే మెగా ఐపీఓలు ఇటీవల ముందుగానే ఇలాంటి సంస్థాగత పెట్టుబడిదారుల మద్దతును పొందుతున్నాయి. చిప్ డిజైనర్ ఆర్మ్ ఐపీఓలో ఎన్విడియా, అమెజాన్ వంటి సంస్థలు యాంకర్ ఇన్వెస్టర్లుగా ఉండగా, స్పేస్‌ఎక్స్‌లో సౌదీ అరేబియా పబ్లిక్ ఇన్వెస్ట్‌మెంట్ ఫండ్ యాంకర్ ఇన్వెస్టర్లలో ఒకటిగా ఉంది.

10 బిలియ‌న్ డాల‌ర్ల పెట్టుబ‌డి..

ఆంథ్రోపిక్‌లో ఎన్విడియా పెట్టుబడి పెట్టే అవకాశం ఏఐ మోడల్ అభివృద్ధి సంస్థలు, వాటికి అవసరమైన కంప్యూటింగ్ శక్తిని అందించే చిప్ కంపెనీల మధ్య సంబంధాలు ఎంతగా ముడిపడుతున్నాయో కూడా తెలియజేస్తోంది. ఆంథ్రోపిక్ తన క్లాడ్ ఏఐ మోడళ్ల కోసం ఎన్విడియా గ్రాఫిక్స్ ప్రాసెసింగ్ యూనిట్లపై భారీగా ఆధారపడుతోంది. అయితే క్లాడ్‌కు పెరుగుతున్న డిమాండ్ కారణంగా కంప్యూటింగ్ సామర్థ్యంపై ఒత్తిడి పెరగడంతో ఇతర చిప్ సరఫరాదారుల వైపు కూడా కంపెనీ దృష్టి సారిస్తోంది. 2025 నవంబర్‌లో ఎన్విడియా ఆంథ్రోపిక్‌లో గరిష్ఠంగా 10 బిలియన్ డాలర్లు పెట్టుబడి పెట్టనున్నట్లు ప్రకటించింది. ఇది విస్తృత భాగస్వామ్యంలో భాగంగా జరిగింది. ఈ ఒప్పందం కింద ఎన్విడియా చిప్‌లతో పనిచేసే మైక్రోసాఫ్ట్ అజూర్ కంప్యూటింగ్ సామర్థ్యాన్ని 30 బిలియన్ డాలర్ల మేర కొనుగోలు చేయడానికి ఆంథ్రోపిక్ అంగీకరించింది. ఆంథ్రోపిక్‌కు ఇప్పటికే అమెజాన్, గూగుల్ వంటి దిగ్గజ సంస్థలు ప్రధాన పెట్టుబడిదారులుగా ఉన్నాయి. ఈ రెండు కంపెనీలు ఆంథ్రోపిక్‌కు అవసరమైన కంప్యూటింగ్ సామర్థ్యాన్ని అందించే ప్రధాన సరఫరాదారులుగా కూడా ఉన్నాయి.

అమెజాన్‌, గూగుల్‌తో క‌లిసి ప‌ని..

ఏప్రిల్‌లో అమెజాన్‌కు చెందిన ఏడబ్ల్యూఎస్ సేవలను ఉపయోగించేందుకు వచ్చే పదేళ్లలో 100 బిలియన్ డాలర్లకు పైగా ఖర్చు చేయనున్నట్లు ఆంథ్రోపిక్ ప్రకటించింది. ఇందులో భాగంగా అమెజాన్‌కు చెందిన ట్రెయినియం2 చిప్‌లలో 1 మిలియన్‌కు పైగా వినియోగించనుంది. అలాగే గూగుల్, బ్రాడ్‌కామ్‌తో కలిసి అనేక గిగావాట్ల టీపీయూ సామర్థ్యాన్ని అందిపుచ్చుకునే ఒప్పందం కూడా కుదుర్చుకుంది. క్లాడ్ ఏఐకి పెరుగుతున్న డిమాండ్‌తో ఆంథ్రోపిక్ ఆదాయం వేగంగా పెరుగుతోంది. అదే సమయంలో మరింత కంప్యూటింగ్ శక్తిని పొందేందుకు కంపెనీ ప్రయత్నిస్తోంది. హార్డ్‌వేర్ వ్యయాలపై నియంత్రణ పెంచుకునేందుకు క్లాడ్‌కు అనుగుణంగా కస్టమ్ చిప్‌లను రూపొందించే అంతర్గత బృందాన్ని కూడా ఆంథ్రోపిక్ ఏర్పాటు చేస్తోంది.

న‌వంబ‌ర్‌లోపే పూర్తి..

అమెరికా నవంబర్ మధ్యంతర ఎన్నికలకు ముందే ఈ ఐపీఓను పూర్తి చేయాలని ఆంథ్రోపిక్ భావిస్తున్నట్లు సమాచారం. ఇది కంపెనీ విలువను మరోసారి భారీగా పెంచే అవకాశం ఉంది. ఈ ఏడాది మేలో ఆంథ్రోపిక్ 65 బిలియన్ డాలర్ల‌ను సమీకరించగా, ఆ సమయంలో కంపెనీ పోస్ట్-మనీ విలువ 965 బిలియన్ డాలర్లుగా ఉంది. 2025 చివరి నాటికి సుమారు 9 బిలియన్ డాలర్లుగా ఉన్న ఆంథ్రోపిక్ వార్షికీకరించిన ఆదాయ రన్‌రేట్ జూలై చివరి నాటికి 65 బిలియన్ డాలర్లకు పైగా పెరిగినట్లు కంపెనీ తెలిపింది. 2028 నాటికి ఆంథ్రోపిక్ ఆదాయం సుమారు 190 బిలియన్ నుంచి 200 బిలియన్ డాలర్లకు చేరుతుందన్న కంపెనీ అంచనాలపైనే ప్రతిపాదిత 2 ట్రిలియన్ డాలర్ల విలువలో కొంత భాగం ఆధారపడి ఉంది.