Stock Markets | ట్రంప్‌కు మిడ్‌ట‌ర్మ్ ఝ‌లక్‌.. భార‌త స్టాక్ మార్కెట్లలో భారీ ర్యాలీ..

Stock Markets | భారత స్టాక్ మార్కెట్లు వరుసగా ఆరో ట్రేడింగ్ సెషన్‌లోనూ భారీ లాభాలను నమోదు చేశాయి. అమెరికా మధ్యంతర ఎన్నికల ఫలితాల నేపథ్యంలో అంతర్జాతీయ భౌగోళిక రాజకీయ ఉద్రిక్తతలు, ఇంధన సరఫరా రిస్కులు తగ్గుతాయన్న అంచనాలు మార్కెట్లకు ఊతమిచ్చాయి. ముడి చమురు ధరలు భారీగా తగ్గడం, విదేశీ పెట్టుబడిదారులు కొనుగోళ్లు చేపట్టడం, సాంకేతిక సూచీలు సానుకూలంగా ఉండడం ర్యాలీకి ప్రధాన కారణాలుగా నిలిచాయి.

లాభాల‌తో దూసుకెళ్లిన సూచీలు..

భారత స్టాక్ మార్కెట్లు గురువారం భారీ లాభాలతో దూసుకెళ్లాయి. బీఎస్ఈ సెన్సెక్స్ 1,433.60 పాయింట్లు (1.85 శాతం) పెరిగి 78,735.00 వద్ద ట్రేడవగా, ఎన్ఎస్ఈ నిఫ్టీ 50 సూచీ 383.60 పాయింట్లు (1.60 శాతం) లాభపడి 24,343.55 వద్ద కొనసాగింది. అమెరికా మధ్యంతర ఎన్నికల్లో డెమోక్రటిక్ పార్టీ విజయం సాధించడంతో అమెరికా-ఇరాన్ యుద్ధాన్ని ముగించేందుకు వాషింగ్టన్ ప్రయత్నిస్తుంద‌న్న అంచనాలు బలపడ్డాయి. దీంతో అంతర్జాతీయ మార్కెట్లో ముడి చమురు ధరలు ఒక్కసారిగా తగ్గాయి. బ్రెంట్ క్రూడ్ ధర సుమారు 10 శాతం పడిపోయి బ్యారెల్‌కు 94 డాలర్ల స్థాయికి చేరడం భారత మార్కెట్లకు అతిపెద్ద సానుకూల అంశంగా మారిందని జియోజిత్ ఇన్వెస్ట్‌మెంట్స్ చీఫ్ ఇన్వెస్ట్‌మెంట్ స్ట్రాటజిస్ట్ డాక్టర్ వి.కె. విజయకుమార్ తెలిపారు. అంతర్జాతీయ పరిస్థితులు అనుకూలంగా మారడంతోపాటు భారత ఆర్థిక వ్యవస్థ పటిష్ఠత, కంపెనీల ఆదాయాల్లో మెరుగుదల మార్కెట్ ర్యాలీకి మరింత బలాన్నిస్తున్నాయని పేర్కొన్నారు.

భారీగా ప‌త‌న‌మైన చ‌మురు ధ‌ర‌లు..

ఈ ర్యాలీకి ప్రధానంగా మూడు అంశాలు దోహదపడ్డాయి. మొదటిది ముడి చమురు ధరల పతనం. గత ట్రేడింగ్ సెషన్‌లో 8 శాతానికి పైగా తగ్గిన చమురు ధరలు గురువారం కూడా స్వల్పంగా తగ్గుముఖం పట్టాయి. బ్రెంట్ క్రూడ్ ఫ్యూచర్స్ 0.02 శాతం తగ్గి బ్యారెల్‌కు 94.60 డాలర్లకు చేరగా, అమెరికా వెస్ట్ టెక్సాస్ ఇంటర్మీడియట్ క్రూడ్ 0.22 శాతం తగ్గి 87.93 డాలర్ల వద్ద ట్రేడయింది. రెండోది విదేశీ సంస్థాగత పెట్టుబడిదారుల (ఎఫ్ఐఐ) కొనుగోళ్లు. బుధవారం ఒక్కరోజే భారత ఈక్విటీల్లో రూ.7,284.03 కోట్ల విలువైన నికర కొనుగోళ్లు చేపట్టారు. 2025 అక్టోబర్ 28 తర్వాత ఇదే అత్యధిక సింగిల్ డే కొనుగోళ్లు. వరుసగా నాలుగు సెషన్ల నుంచి విదేశీ పెట్టుబడిదారులు భారత మార్కెట్లలో నికర కొనుగోళ్లు చేస్తున్నారు. నవంబర్‌లో ఇప్పటివరకు రూ.17వేల కోట్లకు పైగా పెట్టుబడులు పెట్టారు. సెప్టెంబర్, అక్టోబర్ నెలల్లో కలిపి దాదాపు రూ.90వేల కోట్ల విక్రయాలు జరిపిన తర్వాత ఈ పరిణామం చోటుచేసుకుంది.

నిఫ్టీ 50 కీల‌క స్థాయిలు ఇవే..

మూడోది మార్కెట్ సాంకేతిక సూచీలు. వరుసగా ఐదు సెషన్ల లాభాల అనంతరం నిఫ్టీ 50 సూచీ తన 200 రోజుల సింపుల్ మూవింగ్ యావరేజ్ (ఎస్ఎంఏ) స్థాయి 24,003కు పైనే ప్రారంభమైంది. హెచ్‌ఎస్‌టీ వెల్త్ వ్యవస్థాపకుడు, సీఈఓ హరిసెల్వన్ రాధాకృష్ణన్ అభిప్రాయం ప్రకారం, నిఫ్టీ 24,150-24,000 స్థాయికి పైన కొనసాగితే మార్కెట్‌లో సానుకూల జోరు కొనసాగి 24,400 స్థాయిని చేరుకునే అవకాశం ఉంద‌ని చెప్పారు. అయితే 24,000 దిగువకు పడిపోతే ప్రస్తుత పెరుగుదల కేవలం అంతర్జాతీయ పరిణామాల ప్రభావంతో జరిగిన తాత్కాలిక రీప్రైసింగ్ మాత్రమేనని సూచిస్తుందని విశ్లేషించారు.