FDI | ఎఫ్‌డీఐల‌కి భారీ ఊతం.. రూ.15 వేల కోట్లకు పెరగనున్న పరిమితి..

FDI | భారత్‌లో విదేశీ పెట్టుబడులను మరింత పెంచేందుకు కేంద్ర ప్రభుత్వం కీలక నిర్ణయాల దిశగా అడుగులు వేస్తోంది. ఈ దిశగా త్వరలోనే రెండు ప్రధాన నిర్ణయాలు తీసుకునే అవకాశం ఉందని ప్రభుత్వ వర్గాలు తెలిపాయి. ప్రస్తుతం రూ.5వేల కోట్లుగా ఉన్న విదేశీ ప్రత్యక్ష పెట్టుబడుల అనుమతి పరిమితిని రూ.15వేల కోట్లకు పెంచే ప్రతిపాదన ఇందులో ఒకటి. దీంతోపాటు దిగువస్థాయి కంపెనీల్లో విదేశీ ప్రత్యక్ష పెట్టుబడులకు సంబంధించిన నిబంధనలను సడలించే అంశాన్ని కూడా ప్రభుత్వం పరిశీలిస్తోంది. ఈ ప్రతిపాదనలకు సంబంధించిన మంత్రివర్గ ముసాయిదా నోట్ ఇప్పటికే సిద్ధమైనట్లు సమాచారం. ఆర్థిక మంత్రిత్వ శాఖ, పరిశ్రమలు, అంతర్గత వాణిజ్య ప్రోత్సాహక విభాగం, నీతి ఆయోగ్ మధ్య ప్రాథమిక చర్చలు కూడా పూర్తయ్యాయి. త్వరలోనే ఈ ప్రతిపాదనలు ఆమోదం కోసం కేంద్ర మంత్రివర్గం ముందుకు వెళ్లే అవకాశం ఉందని వర్గాలు తెలిపాయి.

రూ.5వేల కోట్ల నుంచి రూ.15వేల కోట్ల‌కు..

ఆగస్టు 15న ఎర్రకోట నుంచి 80వ స్వాతంత్ర్య దినోత్సవ ప్రసంగం చేసిన సందర్భంగా ప్రధానమంత్రి నరేంద్ర మోదీ 2047 నాటికి వికసిత్ భారత్ లక్ష్యంతో బలమైన ఆర్థిక వృద్ధి రోడ్‌మ్యాప్‌ను వివరించారు. దేశంలో విదేశీ ప్రత్యక్ష పెట్టుబడులను పెంచే కేంద్ర ప్రభుత్వ నిరంతర ప్రయత్నాల్లో భాగంగానే తాజా ప్రతిపాదనలు తీసుకొస్తున్నట్లు వర్గాలు పేర్కొన్నాయి. ప్రస్తుతం రూ.5వేల‌ కోట్లకు మించిన విదేశీ పెట్టుబడి ప్రతిపాదనలు కేంద్ర ఆర్థిక వ్యవహారాల మంత్రివర్గ కమిటీ అనుమతి కోసం వెళ్లాల్సి ఉంటుంది. రూ.5వేల‌ కోట్లలోపు ప్రతిపాదనలకు సంబంధిత మంత్రిత్వ శాఖ స్థాయిలోనే అనుమతి లభిస్తుంది. రూ.5వేల‌ కోట్ల పరిమితి 2015 నవంబర్ నుంచి అమల్లో ఉంది. తాజా ప్రతిపాదన ఆమోదం పొందితే ఈ పరిమితి రూ.5వేల‌ కోట్ల నుంచి రూ.15వేల‌ కోట్లకు పెరగనుంది. అంటే రూ.15వేల‌ కోట్ల వరకు ఉన్న విదేశీ పెట్టుబడి ప్రతిపాదనలను ఇకపై కేంద్ర ఆర్థిక వ్యవహారాల మంత్రివర్గ కమిటీకి పంపాల్సిన అవసరం ఉండదు. సంబంధిత మంత్రిత్వ శాఖ స్థాయిలోనే వాటికి అనుమతి లభించే అవకాశం ఉంటుంది.

అనుమ‌తుల ప్ర‌క్రియ వేగ‌వంతం..

ఈ ప్రతిపాదన అమల్లోకి వస్తే భారీ పెట్టుబడి ప్రతిపాదనలకు కూడా సంబంధిత మంత్రిత్వ శాఖలు నేరుగా అనుమతులు ఇచ్చే అవకాశం ఏర్పడుతుంది. దీంతో కేంద్ర ఆర్థిక వ్యవహారాల మంత్రివర్గ కమిటీకి ప్రతిపాదనలు పంపాల్సిన అవసరం తగ్గి, అనుమతుల ప్రక్రియకు పట్టే సమయం కూడా తగ్గే అవకాశం ఉంది. గత కొన్నేళ్లలో భారత ఆర్థిక వ్యవస్థ పరిమాణంతోపాటు పెట్టుబడుల స్థాయి కూడా గణనీయంగా పెరిగిన నేపథ్యంలోనే ఈ పరిమితిని పెంచాలని ప్రభుత్వం భావిస్తున్నట్లు వర్గాలు తెలిపాయి. వ్యాపార నిర్వహణను సులభతరం చేయడం, పెట్టుబడిదారులకు అనుకూల వాతావరణాన్ని మరింత బలోపేతం చేయడం కూడా ఈ చర్య లక్ష్యాల్లో ఉన్నట్లు పేర్కొన్నాయి. దిగువస్థాయి పెట్టుబడుల నిబంధనల్లోనూ మార్పులు తీసుకురావాలని ప్రభుత్వం పరిశీలిస్తోంది. విదేశీ మూలధనం దేశంలోకి మరింత సులభంగా వచ్చేలా దిగువస్థాయి కంపెనీల్లో విదేశీ పెట్టుబడులకు సంబంధించిన నిబంధనలను సడలించే ప్రతిపాదనపై కసరత్తు జరుగుతోంది.

పున‌రావృత అనుమ‌తుల అవ‌స‌రం ఉండ‌దు..

ప్రతిపాదిత మార్పుల ప్రకారం.. ఒక భారతీయ కంపెనీ పరోక్ష విదేశీ పెట్టుబడులను స్వీకరిస్తున్నప్పుడు, ఆ యాజమాన్య శ్రేణిలో పైస్థాయిలో ఉన్న దేశీయ కంపెనీ ఇప్పటికే అవసరమైన ప్రభుత్వ అనుమతి పొందితే, దిగువస్థాయి కంపెనీ మరోసారి కొత్త ప్రభుత్వ అనుమతి తీసుకోవాల్సిన అవసరం ఉండ‌దు. ప్రస్తుతం రెండు ప్రధాన పరిస్థితుల్లో దిగువస్థాయి లేదా పరోక్ష విదేశీ పెట్టుబడులకు ముందస్తు ప్రభుత్వ అనుమతి తప్పనిసరిగా ఉంది. విదేశీ ప్రత్యక్ష పెట్టుబడులకు ప్రభుత్వ అనుమతి మార్గం అమల్లో ఉన్న రంగాల్లో పెట్టుబడులు ఒకటి. భారత్‌తో భూ సరిహద్దు పంచుకునే దేశాలకు చెందిన సంస్థలు పెట్టుబడులు పెట్టే సందర్భం రెండోది. ప్రతిపాదిత మార్పులు అమల్లోకి వస్తే యాజమాన్య నిర్మాణంలో ముందస్తు దశలోనే సంబంధిత పెట్టుబడికి అనుమతి లభించిన సందర్భాల్లో మళ్లీ మళ్లీ అనుమతులు తీసుకోవాల్సిన అవసరం తగ్గుతుంది. దీంతో పునరావృత అనుమతుల ప్రక్రియ తగ్గి, విదేశీ పెట్టుబడులు భారత్‌లోకి మరింత సులభంగా ప్రవహించే అవకాశం ఏర్పడుతుంది. విదేశీ పెట్టుబడులకు సంబంధించిన అనుమతుల ప్రక్రియను వేగవంతం చేయడంతోపాటు వ్యాపార నిర్వహణ సౌలభ్యాన్ని మెరుగుపరచడమే కేంద్ర ప్రభుత్వ తాజా ప్రతిపాదనల ప్రధాన ఉద్దేశంగా కనిపిస్తోంది.