National Sports Awards 2025 | తెలంగాణ బిడ్డలకు అర్జున అవార్డులు

• తెలంగాణకు చెందిన ఇద్దరు క్రీడాకారులకు అర్జున అవార్డుల పంట
• గాయత్రి గోపీచంద్, ధనుష్ శ్రీకాంత్‌ పురస్కారానికి ఎంపిక 
• దేశవ్యాప్తంగా 17 మంది అథ్లెట్లు ఎంపిక

National Sports Awards 2025 | త్రినేత్ర.న్యూస్ : కేంద్ర ప్రభుత్వం ప్రకటించిన ప్రతిష్టాత్మక 'జాతీయ క్రీడా అవార్డులు 2025'లో (National Sports Awards 2025) తెలంగాణ క్రీడాకారులు సత్తా చాటారు. బ్యాడ్మింటన్ స్టార్ పుల్లెల గాయత్రి గోపీచంద్ (Gayatri Gopichand), యువ డెఫ్ షూటర్ ధనుష్ శ్రీకాంత్‌లను (Dhanush Srikanth) కేంద్ర క్రీడా మంత్రిత్వ శాఖ అత్యున్నత అర్జున అవార్డుతో (Arjuna Award) సత్కరించింది. దేశవ్యాప్తంగా మొత్తం 17 మంది అథ్లెట్లను ఈ పురస్కారానికి ఎంపిక చేయగా.. తెలంగాణ నుంచి ఇద్దరు క్రీడాకారులు చోటు దక్కించుకోవడం విశేషం.

సుప్రీంకోర్టు మాజీ న్యాయమూర్తి జస్టిస్ (రిటైర్డ్) అరుణ్ కుమార్ మిశ్రా నేతృత్వంలోని సెలక్షన్ కమిటీ సిఫార్సుల మేరకు ప్రభుత్వం ఈ జాబితాను విడుదల చేసింది. అయితే, దేశంలోనే అత్యున్నత క్రీడా పురస్కారమైన 'మేజర్ ధ్యాన్‌చంద్ ఖేల్ రత్న'ను (Khel Ratna Award) ఈ ఏడాది ఎవరికీ కేటాయించకపోవడం చర్చనీయాంశంగా మారింది. 2014 తర్వాత ఖేల్ రత్న ఇవ్వకపోవడం ఇదే మొదటిసారి.

మెరిసిన తెలంగాణ స్టార్స్: గాయత్రి, ధనుష్

మహిళల డబుల్స్ బ్యాడ్మింటన్‌లో విశేష ప్రతిభ కనబరుస్తున్న తెలంగాణ షట్లర్ గాయత్రి గోపీచంద్‌తో పాటు ఆమె పార్ట్‌నర్ త్రీసా జాలీకి కూడా అర్జున అవార్డు లభించింది. అంతర్జాతీయ వేదికలపై నిలకడగా రాణిస్తూ దేశానికి పలు పతకాలు అందించినందుకు గాను వారికి ఈ గుర్తింపు దక్కింది.

మరోవైపు, ప్రతికూలతలను అధిగమించి షూటింగ్‌లో అంతర్జాతీయ స్థాయిలో దేశ పతాకాన్ని ఎగరేసిన తెలంగాణ డెఫ్ షూటర్ ధనుష్ శ్రీకాంత్ సాధించిన విజయాలకు తగిన గుర్తింపు లభించింది.

క్రికెటర్లకు దక్కని చోటు.. 2014 తర్వాత తొలిసారి ఖేల్ రత్న ఖాళీ

ఈసారి అర్జున అవార్డుల జాబితాలో ఒక్క క్రికెటర్‌కు కూడా చోటు దక్కకపోవడం గమనార్హం. 2023లో పేసర్ మహమ్మద్ షమీ తర్వాత ఏ క్రికెటర్‌కూ ఈ అవార్డు రాలేదు. తొలుత స్టార్ హాకీ ప్లేయర్ హార్దిక్ సింగ్ పేరు ఖేల్ రత్న కోసం పరిశీలనకు వచ్చినప్పటికీ.. చివరికి ఏ అథ్లెట్‌నూ ఎంపిక చేయలేదు.

అర్హులైన వారికే అవార్డులు దక్కాలన్న ఉద్దేశంతో మంత్రిత్వ శాఖ నిర్వహించిన సమగ్ర పరిశీలన వల్లే ఈ ప్రకటన ఆలస్యమైందని అధికారులు తెలిపారు. సాధారణంగా అర్జున అవార్డు విజేతలకు రూ. 15 లక్షల నగదు బహుమతి, ప్రశంసా పత్రం, విగ్రహం అందజేస్తారు.

అవార్డుల పూర్తి జాబితా

అర్జున అవార్డు గ్రహీతలు (17 మంది)

పుల్లెల గాయత్రి గోపీచంద్ (బ్యాడ్మింటన్ - తెలంగాణ)

ధనుష్ శ్రీకాంత్ (డెఫ్ షూటింగ్ - తెలంగాణ)

త్రీసా జాలీ (బ్యాడ్మింటన్)

తేజస్విన్ శంకర్ (అథ్లెటిక్స్ - డెకాథ్లాన్)

ముహమ్మద్ అజ్మల్ వి (అథ్లెటిక్స్)

ప్రియాంక గోస్వామి (అథ్లెటిక్స్)

విదిత్ సంతోష్ గుజరాతీ (చెస్)

దివ్య జితేంద్ర దేశ్‌ముఖ్ (చెస్)

నరేందర్ (బాక్సింగ్)

లాల్‌రెమ్‌సియామి (హాకీ)

రాజ్‌కుమార్ పాల్ (హాకీ)

సుర్జీత్ (కబడ్డీ)

పూజ (కబడ్డీ)

రుద్రాంక్ష్ ఖండేల్‌వాల్ (పారా షూటింగ్)

ఏక్తా భ్యాన్ (పారా అథ్లెటిక్స్)

అరవింద్ సింగ్ (రోయింగ్)

అఖిల్ షెయోరాన్ (షూటింగ్)

అర్జున అవార్డు (లైఫ్‌టైమ్ అచీవ్‌మెంట్)

ఐ. అరుణ్‌నాయగం (ఫుట్‌బాల్ - 1962 ఆసియా క్రీడల స్వర్ణ పతక విజేత జట్టు సభ్యుడు)

ద్రోణాచార్య అవార్డు (రెగ్యులర్ కేటగిరీ)

పర్వీర్ సింగ్ (అథ్లెటిక్స్)

ఛోటే లాల్ యాదవ్ (బాక్సింగ్ - మేరీకోమ్ మాజీ కోచ్)

నేహా నందకుమార్ చవాన్ (షూటింగ్)

ద్రోణాచార్య అవార్డు (లైఫ్‌టైమ్ కేటగిరీ)

ధర్మేంద్ర సింగ్ యాదవ్ (బాక్సింగ్)

వీరేందర్ కుమార్ (రెజ్లింగ్)