India Wholesale Inflation | దేశంలో టోకు ద్రవ్యోల్బణం 11.39 శాతానికి జంప్‌.. ఇంధన ధరలే కారణం..

India Wholesale Inflation | దేశంలో టోకు ద్రవ్యోల్బణం భారీగా పెరిగింది. ఆగస్టులో 9.92 శాతంగా ఉన్న టోకు ధరల సూచీ ఆధారిత ద్రవ్యోల్బణం సెప్టెంబర్‌లో 11.39 శాతానికి చేరింది. ఇంధనం, విద్యుత్‌, ఆహార పదార్థాలు, తయారీ ఉత్పత్తుల ధరలు పెరగడమే ఇందుకు ప్రధాన కారణమని బుధవారం విడుదలైన ప్రభుత్వ తాత్కాలిక గణాంకాలు వెల్లడించాయి. 2022-23ను ప్రామాణిక సంవత్సరంగా తీసుకున్న టోకు ధరల సూచీ (డబ్ల్యూపీఐ) ఆగస్టులో 110.8గా ఉండగా, సెప్టెంబర్‌లో 112.5కు పెరిగింది. వాణిజ్య, పరిశ్రమల మంత్రిత్వ శాఖ విడుదల చేసిన తుది అంచనాల ప్రకారం, జూలైలో టోకు ద్రవ్యోల్బణం 9.78 శాతంగా నమోదైంది. టోకు ద్రవ్యోల్బణం పెరుగుదల అన్ని ప్రధాన విభాగాల్లోనూ కనిపించింది. ప్రాథమిక వస్తువులు, ఇంధనం-విద్యుత్‌, తయారీ ఉత్పత్తుల విభాగాల్లో గతేడాది ఇదే నెలతో పోలిస్తే ధరల పెరుగుదల వేగవంతమైందిగా న‌మోదైంది.

25.85 శాతానికి పెరిగిన ఇంధన ద్రవ్యోల్బణం..

ఇంధనం, విద్యుత్‌ విభాగంలో ద్రవ్యోల్బణం ఆగస్టులో 22.93 శాతంగా ఉండగా, సెప్టెంబర్‌లో 25.85 శాతానికి పెరిగింది. ఇంధన సంబంధిత వస్తువుల ధరలపై ఒత్తిడి కొనసాగుతోందని ఈ గణాంకాలు సూచిస్తున్నాయి. ముడి చమురు, సహజ వాయువు విభాగంలో ద్రవ్యోల్బణం భారీగా పెరిగింది. ఆగస్టులో 34.41 శాతంగా ఉన్న ఈ రేటు సెప్టెంబర్‌లో 57.32 శాతానికి చేరింది. పెట్రోలియం ఉత్పత్తులతో కూడిన ఖనిజ నూనెల విభాగంలో ద్రవ్యోల్బణం ఆగస్టులో 38.48 శాతంగా ఉండగా, సెప్టెంబర్‌లో 40.02 శాతానికి పెరిగింది. బొగ్గు, లిగ్నైట్‌ విభాగంలోనూ ధరల పెరుగుదల వేగవంతమైంది. ఆగస్టులో 1.57 శాతంగా ఉన్న ద్రవ్యోల్బణం సెప్టెంబర్‌లో 9.31 శాతానికి చేరింది. అయితే విద్యుత్‌ ధరలు మాత్రం గత ఏడాదితో పోలిస్తే తగ్గాయి. ఆగస్టులో మైనస్‌ 1.73 శాతంగా ఉన్న విద్యుత్‌ ద్రవ్యోల్బణం సెప్టెంబర్‌లో మైనస్‌ 0.43 శాతంగా నమోదైంది.

8.66 శాతానికి టోకు ఆహార ద్రవ్యోల్బణం..

సెప్టెంబర్‌లో ఆహార పదార్థాల ధరలు కూడా పెరిగాయి. ప్రాథమిక వస్తువుల విభాగంలోని ఆహార పదార్థాలు, తయారీ రంగంలోని ఆహార ఉత్పత్తులను కలిపి లెక్కించే టోకు ఆహార ధరల సూచీ ఆధారిత ద్రవ్యోల్బణం ఆగస్టులో 7.05 శాతంగా ఉండగా, సెప్టెంబర్‌లో 8.66 శాతానికి పెరిగింది. ప్రాథమిక ఆహార పదార్థాల ద్రవ్యోల్బణం ఆగస్టులో 5.67 శాతంగా ఉండగా, సెప్టెంబర్‌లో 8.14 శాతానికి చేరింది. దీంతో మొత్తం టోకు ధరల పెరుగుదలకు ఆహార పదార్థాలు కూడా కారణమయ్యాయి. అయితే తయారీ రంగానికి చెందిన ఆహార ఉత్పత్తుల ద్రవ్యోల్బణం స్వల్పంగా తగ్గింది. ఆగస్టులో 9.65 శాతంగా ఉన్న ఈ రేటు సెప్టెంబర్‌లో 9.44 శాతానికి చేరింది. మొత్తంగా ప్రాథమిక వస్తువుల ద్రవ్యోల్బణం ఆగస్టులో 7.76 శాతంగా ఉండగా, సెప్టెంబర్‌లో 8.67 శాతానికి పెరిగింది. ఈ విభాగంలో ఆహారేతర వస్తువుల ద్రవ్యోల్బణం మాత్రం 14.79 శాతం నుంచి 10.28 శాతానికి తగ్గింది. ఖనిజాల ద్రవ్యోల్బణం 8.24 శాతం నుంచి 9.51 శాతానికి పెరిగింది.

తయారీ ఉత్పత్తుల ద్రవ్యోల్బణం 9.76 శాతానికి పెరుగుదల..

టోకు ధరల సూచీలో అత్యధిక వాటా కలిగిన తయారీ ఉత్పత్తుల విభాగంలోనూ ద్రవ్యోల్బణం పెరిగింది. ఆగస్టులో 8.37 శాతంగా ఉన్న ఈ రేటు సెప్టెంబర్‌లో 9.76 శాతానికి చేరింది. ప్రాథమిక లోహాలు, రసాయనాలు, వస్త్రాలు, రబ్బరు, ప్లాస్టిక్‌ ఉత్పత్తులు, విద్యుత్‌ పరికరాల ధరలు పెరగడం ఇందుకు కారణమైంది. ప్రాథమిక లోహాల ద్రవ్యోల్బణం ఆగస్టులో 10.88 శాతంగా ఉండగా, సెప్టెంబర్‌లో భారీగా పెరిగి 16.96 శాతానికి చేరింది. రసాయనాలు, రసాయన ఉత్పత్తుల విభాగంలోనూ ద్రవ్యోల్బణం 14.30 శాతం నుంచి 16.74 శాతానికి పెరిగింది. వస్త్రాల ద్రవ్యోల్బణం ఆగస్టులో 12.63 శాతంగా ఉండగా, సెప్టెంబర్‌లో 13.85 శాతానికి చేరింది. రబ్బరు, ప్లాస్టిక్‌ ఉత్పత్తుల విభాగంలో ఈ రేటు 11.18 శాతం నుంచి 13.47 శాతానికి పెరిగింది. విద్యుత్‌ పరికరాల ద్రవ్యోల్బణం కూడా 11.11 శాతం నుంచి 11.93 శాతానికి చేరింది. కంప్యూటర్లు, ఎలక్ట్రానిక్‌, ఆప్టికల్‌ ఉత్పత్తుల విభాగంలోనూ కీలక మార్పు కనిపించింది. ఆగస్టులో మైనస్‌ 0.47 శాతంగా ఉన్న ద్రవ్యోల్బణం సెప్టెంబర్‌లో 4 శాతానికి చేరింది. దీంతో ఈ విభాగంలో ధరలు గతేడాదితో పోలిస్తే తగ్గుదల నుంచి పెరుగుదల దిశగా మారాయి.

ఏప్రిల్‌-సెప్టెంబర్‌లో 9.85 శాతంగా టోకు ద్రవ్యోల్బణం..

ప్రభుత్వ గణాంకాల ప్రకారం, 2026 ఏప్రిల్‌ నుంచి సెప్టెంబర్‌ వరకు సంచిత టోకు ద్రవ్యోల్బణం 9.85 శాతంగా నమోదైంది. గత ఆర్థిక సంవత్సరం ఇదే కాలంలో ఇది మైనస్‌ 0.20 శాతంగా ఉండడం గమనార్హం. 2026-27 ఆర్థిక సంవత్సరం తొలి ఆరు నెలల్లో ఇంధనం, విద్యుత్‌ విభాగంలో సంచిత ద్రవ్యోల్బణం 25.31 శాతంగా నమోదైంది. తయారీ ఉత్పత్తుల విభాగంలో ఇది 8.08 శాతంగా ఉంది. టోకు ఆహార ధరల సూచీ ఆధారిత సంచిత ద్రవ్యోల్బణం 6.10 శాతానికి చేరింది. గతేడాది ఏప్రిల్‌-సెప్టెంబర్‌ కాలంలో ఇదే సూచీ మైనస్‌ 1.26 శాతంగా నమోదైంది. సెప్టెంబర్‌ నెలకు సంబంధించి ఉత్పత్తి ధరల సూచీ (అవుట్‌పుట్‌ ప్రొడ్యూసర్‌ ప్రైస్‌ ఇండెక్స్‌-పీపీఐ), తయారీ రంగానికి సంబంధించిన ప్రయోగాత్మక ఇన్‌పుట్‌ ఉత్పత్తి ధరల సూచీ అంచనాలను కూడా ప్రభుత్వం విడుదల చేసింది. అన్ని వస్తువులకు సంబంధించిన అఖిల భారత అవుట్‌పుట్‌ పీపీఐ ఆగస్టులో 110.8గా ఉండగా, సెప్టెంబర్‌లో 112.5కు పెరిగింది.

న‌వంబ‌ర్‌లో మ‌రిన్ని గ‌ణాంకాలు..

వ్యవసాయం, అటవీ, మత్స్య రంగాల సూచీ 116.5 నుంచి 118.7కు పెరిగింది. గనుల తవ్వకం, క్వారీయింగ్‌ విభాగం సూచీ 122.0 నుంచి 129.2కు చేరింది. తయారీ ఉత్పత్తుల సూచీ కూడా 109.7 నుంచి 111.0కు పెరిగింది. తయారీ రంగానికి సంబంధించిన ప్రయోగాత్మక ఇన్‌పుట్‌ పీపీఐ ఆగస్టులో 104.2గా ఉండగా, సెప్టెంబర్‌లో 106.1కు చేరింది. తయారీదారులు ఉత్పత్తి కోసం వినియోగించే ముడిసరుకులు, ఇతర ఇన్‌పుట్‌ల వ్యయాల సూచీ పెరిగినట్లు ఇది సూచిస్తోంది. జూలై నెలకు సంబంధించిన తుది టోకు ద్రవ్యోల్బణ రేటు 9.78 శాతంగానే కొనసాగిందని ప్రభుత్వం స్పష్టం చేసింది. సెప్టెంబర్‌ నెలకు సంబంధించిన తాత్కాలిక టోకు ధరల సూచీ గణాంకాలను 83.4 శాతం వెయిటెడ్‌ రెస్పాన్స్‌ రేటు ఆధారంగా రూపొందించినట్లు వెల్లడించింది. 2026 అక్టోబర్‌ నెలకు సంబంధించిన టోకు ధరల సూచీ, అవుట్‌పుట్‌ పీపీఐ, ప్రయోగాత్మక ఇన్‌పుట్‌ పీపీఐ గణాంకాలను నవంబర్‌ 16న విడుదల చేయనున్నట్లు ప్రభుత్వం ప్రకటించింది.