India Inflation | ద్రవ్యోల్బణం 23 నెలల గరిష్ఠానికి.. భారీగా పెర‌గ‌నున్న వ‌డ్డీ రేట్లు..?

India Inflation | భారత్‌లో వినియోగదారుల ధరల సూచీ (సీపీఐ) ఆధారిత రిటైల్ ద్రవ్యోల్బణం సెప్టెంబర్‌లో ఏడాది ప్రాతిపదికన 5.54 శాతానికి చేరింది. దీంతో ద్రవ్యోల్బణం 23 నెలల గరిష్ఠ స్థాయిని తాకింది. ఆహార పదార్థాలు, ముఖ్యంగా కూరగాయల ధరలు పెరగడం ఇందుకు ప్రధాన కారణంగా నిలిచింది. సెప్టెంబర్‌లో ద్రవ్యోల్బణం గణనీయంగా పెరిగినప్పటికీ, ఈ గణాంకాలు మార్కెట్ వర్గాలు, విశ్లేషకుల అంచనాలకు దాదాపు అనుగుణంగానే ఉన్నాయి. ఆగస్టులో రిటైల్ ద్రవ్యోల్బణం ఎనిమిది నెలల గరిష్ఠ స్థాయికి చేరి 4.8 శాతంగా నమోదైంది. సెప్టెంబర్‌లో నెలవారీ, ఏడాది ప్రాతిపదికన రెండింటిలోనూ ద్రవ్యోల్బణం గణనీయంగా పెరిగింది. ఇరాన్ యుద్ధం, ఇంధన సరఫరాలో అంతరాయాలు, ఎల్‌నినో ప్రభావం తీవ్రతరం కావడం వంటి పరిణామాల నేపథ్యంలో రిటైల్ ద్రవ్యోల్బణం మరింత పెరిగే అవకాశం ఉందని బ్యాంక్ ఆఫ్ అమెరికా (బీఓఎఫ్‌ఏ), గోల్డ్‌మన్ సాక్స్, యూబీఎస్ వంటి అంతర్జాతీయ బ్రోకరేజ్ సంస్థలు అంచనా వేస్తున్నాయి.

వడ్డీ రేట్లు పెరిగే చాన్స్‌..

ఈ నేపథ్యంలో భారతీయ రిజర్వ్ బ్యాంక్ (ఆర్‌బీఐ) ద్రవ్య విధానాన్ని మరింత కఠినతరం చేసే అవకాశం ఉందని బీఓఎఫ్‌ఏ, యూబీఎస్ భావిస్తున్నాయి. 2026-27 ఆర్థిక సంవత్సరంలో జరిగే ద్రవ్య విధాన కమిటీ (ఎంపీసీ) సమావేశాల నుంచి 2028 ఆర్థిక సంవత్సరం తొలి అర్ధభాగం వరకు రెపో రేటును మొత్తం 75 బేసిస్ పాయింట్లు పెంచవచ్చని ఈ సంస్థలు అంచనా వేస్తున్నాయి. రానున్న నెలల్లో ముడి చమురు ధరలు పెరగడం, వాతావరణ సంబంధిత ప్రమాదాలు వాస్తవ రూపం దాల్చడం వల్ల రిటైల్ ద్రవ్యోల్బణం క్రమంగా మరింత పెరిగే అవకాశం ఉంద‌ని బీఓఎఫ్‌ఏ పేర్కొంది. 2026-27 ఆర్థిక సంవత్సరంలో ఆర్‌బీఐ రెపో రేటును 50 బేసిస్ పాయింట్లు పెంచుతుందని, 2027-28 ఆర్థిక సంవత్సరం తొలి త్రైమాసికంలో మరో 25 బేసిస్ పాయింట్లు పెంచుతుందని తాము ఇప్పటికీ అంచనా వేస్తున్నట్లు తెలిపింది.

పెరుగుతున్న ద్ర‌వ్యోల్బ‌ణం..

ప్రస్తుత ఆర్థిక సంవత్సరంలో పూర్తి ఏడాదికి సగటు రిటైల్ ద్రవ్యోల్బణం సుమారు 5.2 శాతంగా నమోదయ్యే అవకాశం ఉందని యూబీఎస్ అంచనా వేసింది. ప్రతికూల వాతావరణ పరిస్థితుల ప్రభావంతో వచ్చే ఆర్థిక సంవత్సరం తొలి అర్ధభాగంలోనూ ద్రవ్యోల్బణం 5 శాతానికి పైనే ఉంటుంద‌ని అంచ‌నా వేసింది. త‌మ‌ గ్లోబల్ స్ట్రాటజీ బృందం విశ్లేషణ ప్రకారం, వాతావరణ అంతరాయాలు గరిష్ఠ స్థాయికి చేరిన తర్వాత వాటి ప్రభావాలు సాధారణంగా ఆరు నుంచి 18 నెలల ఆలస్యంతో కనిపిస్తాయ‌ని చెప్పింది. ఈ అంతరాయాలు నవంబర్ నుంచి ఫిబ్రవరి మధ్య గరిష్ఠ స్థాయికి చేరే అవకాశం ఉంద‌ని, దీంతో ప్రపంచ ఆహార ధరలపై అత్యంత గణనీయమైన ప్రభావం 2027 నుంచి 2028 ప్రారంభం వరకు కనిపిస్తుంద‌ని, ఇది ద్రవ్యోల్బణం మరింత పెరిగే ప్రమాదాన్ని సూచిస్తోంద‌ని యూబీఎస్ వివరించింది.

ప్ర‌తికూల స్థాయికి వ‌డ్డీ రేట్లు..

దీంతో ద్రవ్యోల్బణాన్ని పరిగణనలోకి తీసుకున్న వాస్తవ వడ్డీ రేట్లు ప్రతికూల స్థాయికి చేరే అవకాశం ఉందని, ఈ పరిస్థితుల్లో ద్రవ్య విధానాన్ని తిరిగి సమీక్షించి అవసరమైన మార్పులు చేయాల్సి ఉంటుందని యూబీఎస్ పేర్కొంది. గోల్డ్‌మన్ సాక్స్ అంచనా ప్రకారం అక్టోబర్‌లో రిటైల్ ద్రవ్యోల్బణం ఏడాది ప్రాతిపదికన 5.9 శాతానికి చేరనుంద‌ని తేలింది. దీనికి ప్రధాన కారణం అననుకూల గణాంక ఆధార ప్రభావాల వల్ల ఆహార ద్రవ్యోల్బణం పెరగడమేనని తెలిపింది. మరోవైపు, ద్రవ్యోల్బణం ఒక్క ఆహార రంగానికే పరిమితం కాకుండా వివిధ వస్తువులు, సేవల విభాగాలకు విస్తరిస్తోందని బ్రోకరేజ్ సంస్థలు హెచ్చరిస్తున్నాయి.