India Poverty | భార‌త్‌లో భారీగా త‌గ్గిన పేద‌రికం.. ఇక అంతా హ్యాపీయేనా..?

India Poverty | భారత్‌లో పేదరికం గణనీయంగా తగ్గింది. 2011లో 27.1 శాతంగా ఉన్న తీవ్ర పేదరికం 2023 నాటికి 2.6 శాతానికి పడిపోయింది. సుమారు 49.6 కోట్ల మంది దిగువ మధ్య ఆదాయ దేశాల పేదరిక రేఖను దాటారు. అయితే ఆదాయ అసమానతలు, నిరుద్యోగం, వేతనాల పెరుగుదల లేకపోవడం ఇంకా ఆందోళన కలిగిస్తున్నాయి.

49.6 కోట్ల మంది పేదరికం నుంచి బ‌య‌ట‌కు..

ప్రపంచ బ్యాంకు విడుదల చేసిన పేదరికం, సమానత్వ నివేదిక ప్రకారం.. భారత్ పేదరిక నిర్మూలనలో గణనీయమైన పురోగతి సాధించింది. రోజుకు 3 డాలర్ల కంటే తక్కువ ఆదాయంతో జీవించే వారి సంఖ్యను పరిగణనలోకి తీసుకుంటే, తీవ్ర పేదరికం 2011లో 27.1 శాతం ఉండగా, 2023 నాటికి 2.6 శాతానికి తగ్గింది. అలాగే దిగువ మధ్య ఆదాయ దేశాల పేదరిక ప్రమాణమైన రోజుకు 4.20 డాలర్ల కంటే తక్కువ ఆదాయంతో జీవించే వారి శాతం 57.7 నుంచి 16.1 శాతానికి పడిపోయింది. ఈ మార్పుతో సుమారు 49.6 కోట్ల మంది పేదరికం నుంచి బయటపడ్డారు. బలమైన వినియోగ వృద్ధి, ఉపాధి అవకాశాల పెరుగుదల, ముఖ్యంగా గ్రామీణ మహిళల ఉద్యోగాలు, ఉచిత ఆహార పంపిణీ వంటి సంక్షేమ పథకాలు ఈ పురోగతికి ప్రధాన కారణాలుగా ప్రపంచ బ్యాంకు పేర్కొంది.

ఏయే రాష్ట్రాల్లో ఎలా ఉంది..?

అయితే దేశంలో పేదరికం అన్ని ప్రాంతాల్లో ఒకే విధంగా తగ్గలేదు. 2023లో గ్రామీణ ప్రాంతాల్లో దిగువ మధ్య ఆదాయ పేదరికం 19.3 శాతంగా ఉండగా, పట్టణ ప్రాంతాల్లో 8.6 శాతంగా నమోదైంది. ఉత్తరప్రదేశ్ నుంచి పశ్చిమ బెంగాల్ వరకు ఉన్న రాష్ట్రాల ప్రాంతంలో దేశంలోని మొత్తం పేద జనాభాలో సుమారు 57 శాతం మంది నివసిస్తున్నట్లు నివేదిక వెల్లడించింది. మరోవైపు, 2017 నుంచి 2023 మధ్య దేశంలో సుమారు 13.4 కోట్ల ఉపాధి అవకాశాలు పెరిగాయి. ఇందులో గ్రామీణ మహిళల ఉద్యోగాల వాటా గణనీయంగా ఉంది. అయినప్పటికీ ఉద్యోగాల నాణ్యత, స్థిరత్వం, ఆదాయాల పెరుగుదల విషయంలో ఆశించిన పురోగతి కనిపించడం లేదని నివేదిక స్పష్టం చేసింది.

కొన‌సాగుతున్న ఆదాయ అస‌మాన‌త‌లు..

పేదరికం తగ్గినప్పటికీ ఆదాయ అసమానతలు మాత్రం కొనసాగుతున్నాయి. దేశంలో అత్యధిక ఆదాయం పొందుతున్న మొదటి 10 శాతం మంది కార్మికుల మధ్యస్థ ఆదాయం, అత్యల్ప ఆదాయం పొందుతున్న చివరి 10 శాతం మంది మధ్యస్థ ఆదాయం కంటే సుమారు 13 రెట్లు ఎక్కువగా ఉంది. ప్రపంచ బ్యాంకు నివేదిక ప్రకారం 2023లో భారత్ గిని సూచీ 23గా నమోదైంది. ఈ సూచీ మొత్తం వినియోగ అసమానతలను అంచనా వేస్తుంది. అయితే సంపన్న కుటుంబాల వినియోగాన్ని సర్వేలు పూర్తిస్థాయిలో నమోదు చేయలేకపోవడం వల్ల వాస్తవ అసమానతలు అధికారిక గణాంకాల్లో తక్కువగా కనిపించే అవకాశం ఉందని ప్రపంచ బ్యాంకు హెచ్చరించింది. యువత నిరుద్యోగం పెరగడం, వాస్తవ వేతనాల్లో పెద్దగా వృద్ధి లేకపోవడం కూడా దేశ ఆర్థిక వ్యవస్థ ముందున్న ప్రధాన సవాళ్లుగా నివేదిక పేర్కొంది.