Formula E Racing case | రేసింగ్ కేసు.. డిసెంబర్ 4కు వాయిదా

Formula E Racing case | త్రినేత్ర న్యూస్‌: ఫార్ములా-ఈ రేసింగ్ కేసు (Formula E Racing case)కు సంబంధించి విచార‌ణ‌నను నాంప‌ల్లి ఏసీబీ కోర్టు డిసెంబ‌ర్ 4కు వాయిదా వేసింది. కేటీఆర్ (KTR) తరఫున దాఖలు చేసిన గైర్హాజరు పిటిషన్‌ను కోర్టు అనుమతించడంతో శుక్ర‌వారం ఆయ‌న కోర్టుకు హాజ‌రు కాలేదు. దీంతో తదుపరి విచారణను వాయిదా వేస్తూ కోర్టు ఉత్త‌ర్వులిచ్చింది. అయితే ఈ కేసులో కేటీఆర్‌తో పాటు A2గా ఉన్న ఐఏఎస్‌ అరవింద్ కుమార్, A3 బి.ఎల్.ఎన్. రెడ్డి, A4 గోవెడ కిరణ్ మల్లేశ్వర్ రావు మాత్రం కోర్టుకు హాజ‌ర‌య్యారు.

బీఆర్‌ఎస్ ప్రభుత్వ హయాంలో హైదరాబాద్‌లో నిర్వహించిన ఫార్ములా ఈ- రేసు నిధుల బదిలీలో అక్ర‌మాలు జ‌రిగాయంటూ ఏసీబీ ఛార్జ్‌షీట్ దాఖ‌లు చేసిన విషయం విదిత‌మే. కేబినెట్ అనుమ‌తి లేకుండా దాదాపు రూ.55 కోట్ల నిధులు మ‌ళ్లించారంటూ ఏసీబీ ఆరోపించింది. అయితే ఈ కేసులో ఛార్జ్‌షీట్ నుంచి తన పేరును తొలగించాలంటూ కేటీఆర్ ఇప్పటికే నాంపల్లి ఏసీబీ కోర్టులో ఈనెల 12 'డిశ్చార్జ్ పిటిషన్' దాఖలు చేశారు. దీనిపై ఏసీబీ కౌంటర్ దాఖలు చేయాల్సి ఉంది. ఇదిలా ఉండ‌గా ఈరోజు విచార‌ణ‌కు కేటీఆర్ హాజ‌రు కాక‌పోవ‌డంతో కోర్టు తదుపరి విచారణను డిసెంబర్ 4కు పొడిగించింది.