India Canada Trade | భారత్‌-కెనడా బంధం బలోపేతం.. రూ.4.65 లక్షల కోట్ల వాణిజ్య లక్ష్యం..

India Canada Trade | భారత్‌, కెనడా దేశాల మధ్య ఆర్థిక సంబంధాలను మరింత బలోపేతం చేసేందుకు కీలక నిర్ణయాలు తీసుకున్నారు. ద్వైపాక్షిక పెట్టుబడి ఒప్పందం విషయంలో వీలైనంత త్వరగా చర్చలు ప్రారంభించేందుకు భారత్‌ సిద్ధంగా ఉన్నట్లు ప్రకటించింది. 2030 నాటికి ఇరు దేశాల మధ్య ద్వైపాక్షిక వాణిజ్యాన్ని 70 బిలియన్‌ కెనడియన్‌ డాలర్లకు, అంటే సుమారు రూ.4.65 లక్షల కోట్లకు పెంచుకోవాలని లక్ష్యంగా నిర్ణ‌యించారు. కెనడా-భారత్‌ తొలి ఆర్థిక వ్యవహారాల మంత్రుల చర్చల సందర్భంగా ఈ అంశాలు తెరపైకి వచ్చాయి. ఈ సమావేశంలో కేంద్ర ఆర్థిక మంత్రి నిర్మలా సీతారామన్‌, కెనడా ఆర్థిక మంత్రి ఫ్రాంకోయిస్‌-ఫిలిప్‌ షాంపేన్‌ పాల్గొన్నారు.

వీలైనంత త్వ‌ర‌గా కొలిక్కి..

వాణిజ్యం, పెట్టుబడుల సంబంధాలను మరింత విస్తరించే మార్గాలపై ఇరు దేశాల మంత్రులు చర్చించారు. పలు ఆర్థిక సహకార అంశాలపై ఏకాభిప్రాయానికి వచ్చారు. ద్వైపాక్షిక పెట్టుబడి ఒప్పందంపై వీలైనంత త్వరగా చర్చలు ప్రారంభించేందుకు భారత్‌ సిద్ధంగా ఉందని సంయుక్త ప్రకటనలో పేర్కొన్నారు. ఇలాంటి ఒప్పందం ద్వారా ఇరు దేశాలకు చెందిన పెట్టుబడిదారులకు మరింత రక్షణ, పెట్టుబడుల విషయంలో స్థిరత్వం, నమ్మకమైన వాతావరణం లభిస్తుంద‌ని తెలిపారు. ఈ ఏడాది మార్చిలో కెనడా ప్రధాని మార్క్‌ కార్నీ, భారత ప్రధాని నరేంద్ర మోదీ న్యూఢిల్లీలో సమావేశమైన సందర్భంగా ఆర్థిక రంగంలో సహకారాన్ని పెంచుకోవాలని తీసుకున్న నిర్ణయాల నేపథ్యంలో తాజా చర్చలు జరిగాయి. సమగ్ర ఆర్థిక భాగస్వామ్య ఒప్పందం కోసం జరుగుతున్న చర్చలను ఈ ఏడాది చివరి నాటికి పూర్తి చేయాలని కూడా ఇరు దేశాలు లక్ష్యంగా నిర్ణ‌యించుకున్నాయి.

2030 నాటికి రూ.4.65 ల‌క్ష‌ల కోట్ల‌కు..

2030 నాటికి భారత్‌, కెనడా మధ్య ద్వైపాక్షిక వాణిజ్యాన్ని 70 బిలియన్‌ కెనడియన్‌ డాలర్లకు, భారత కరెన్సీలో సుమారు రూ.4.65 లక్షల కోట్లకు పెంచుకోవాలన్న లక్ష్యాన్ని నిర్మలా సీతారామన్‌, షాంపేన్‌ మరోసారి ధ్రువీకరించారు. ఇరు దేశాల మధ్య పెట్టుబడుల సంబంధాలు కూడా పెరుగుతున్నాయని మంత్రులు పేర్కొన్నారు. ముఖ్యంగా కెనడాకు చెందిన పెన్షన్‌ నిధులు, ఇతర సంస్థాగత పెట్టుబడిదారులు భారత్‌లో పెట్టుబడులు పెడుతున్న విషయాన్ని స్వాగతించారు. ఇరు దేశాలకు చెందిన ఆర్థిక సంస్థలు, పెద్ద పెట్టుబడిదారులు పరస్పరం మరింత సులభంగా కార్యకలాపాలు నిర్వహించేలా చేయడంపై కూడా చర్చించారు. ఇరు దేశాలకు ఉమ్మడి ప్రయోజనాలు ఉన్న రంగాల్లో పెట్టుబడులకు ఉన్న అవకాశాలను పరిశీలించారు. పెట్టుబడులకు సంబంధించిన దేశీయ పన్ను నిబంధనల్లో పన్ను చెల్లింపుదారులకు స్థిరత్వం, స్పష్టత ఉండాల్సిన అవసరాన్ని కూడా మంత్రులు ప్రస్తావించారు.

న‌గ‌దు బదిలీలు, చెల్లింపుల‌పై..

ఆర్థిక సాంకేతికతతోపాటు విస్తృత ఆర్థిక రంగంలో సహకారం కూడా చర్చల్లో కీలకంగా నిలిచింది. చెల్లింపులు, ఆర్థిక స్థిరత్వం, ఆర్థిక సాంకేతికత, మూలధన మార్కెట్లు, ఆర్థిక నేరాల నియంత్రణ వంటి అంశాల్లో పరస్పర సహకారంపై ఇరు దేశాలు చర్చించాయి. సరిహద్దులు దాటి జరిగే నగదు బదిలీలు, వ్యాపారుల చెల్లింపులకు సంబంధించి సంబంధిత అధికారుల మధ్య చర్చలను ప్రోత్సహించాలని నిర్ణయించారు. భారత ఏకీకృత చెల్లింపుల వ్యవస్థను కెనడా చెల్లింపు సేవల సంస్థలతో భాగస్వామ్యాల ద్వారా కెనడాలో మరింత విస్తృతంగా ఉపయోగించే అవకాశాన్ని కూడా పరిశీలించారు. దీనివల్ల వేగవంతమైన, సమర్థవంతమైన, తక్కువ ఖర్చుతో కూడిన చెల్లింపులు సాధ్యమవుతాయని, వాణిజ్యం, పర్యాటకం, విద్య, చిన్న, మధ్య తరహా వ్యాపారాలకు ఇది ప్రయోజనం కలిగిస్తుందని ఇరు దేశాలు భావిస్తున్నాయి.

వ్యూహాత్మ‌క రంగాల్లో స‌హ‌కారం..

ఆర్థిక భద్రత, నమ్మకమైన, విభిన్నమైన సరఫరా వ్యవస్థల అవసరంపై కూడా భారత్‌, కెనడా చర్చించాయి. ముఖ్యంగా వ్యూహాత్మక రంగాల్లో సహకారాన్ని పెంచుకోవాలని నిర్ణయించారు. ఇందులో కీలక ఖనిజాలు ప్రధానంగా ఉన్నాయి. స్వచ్ఛ ఇంధనం, ఎలక్ట్రానిక్స్‌, అధునాతన సాంకేతిక రంగాలకు కీలక ఖనిజాలు అత్యంత అవసరం కావడంతో ఈ రంగంలో ఇరు దేశాల సహకారానికి ప్రాధాన్యం పెరుగుతోంది. మంత్రుల స్థాయి చర్చల అనంతరం కెనడాకు చెందిన ఆర్థిక సేవలు, ఆర్థిక సాంకేతికత, సాంకేతిక రంగం, కృత్రిమ మేధస్సు, మౌలిక సదుపాయాలు, ఇంధనం, సహజ వనరుల రంగాల ప్రతినిధులతో నిర్మలా సీతారామన్‌, షాంపేన్‌ సంయుక్తంగా సమావేశమయ్యారు. ఇరు దేశాల వ్యాపార సంస్థలు, ఆర్థిక సంస్థలు దీర్ఘకాలికంగా సహకరించుకునే అవకాశాలపై ఈ సమావేశాల్లో ప్రధానంగా చర్చించారు.

మెరుగవుతున్న ఆర్థిక సంబంధాలు..

ఇటీవలి నెలల్లో భారత్‌, కెనడా మధ్య ఆర్థిక సంబంధాలు మళ్లీ ఊపందుకుంటున్న నేపథ్యంలో తాజా చర్చలు జరిగాయి. 2025-26 ఆర్థిక సంవత్సరంలో ఇరు దేశాల మధ్య వస్తు వాణిజ్యం సుమారు 8 బిలియన్‌ అమెరికన్‌ డాలర్లుగా నమోదైంది. ఇందులో కెనడాకు భారత్‌ చేసిన ఎగుమతులు 4.67 బిలియన్‌ డాలర్లు కాగా, కెనడా నుంచి భారత్‌ చేసుకున్న దిగుమతులు 3.28 బిలియన్‌ డాలర్లుగా ఉన్నాయి. ప్రస్తుతం భారత్‌, కెనడా దేశాలు సమగ్ర ఆర్థిక భాగస్వామ్య ఒప్పందం కోసం చర్చలు కొనసాగిస్తున్నాయి. 2030 నాటికి ఇరు దేశాల మధ్య ద్వైపాక్షిక వాణిజ్యాన్ని 50 బిలియన్‌ అమెరికన్‌ డాలర్లకు పెంచుకోవాలని ప్రత్యేక లక్ష్యాన్ని కూడా నిర్దేశించుకున్నారు. ఆగస్టు 25 నుంచి సెప్టెంబర్‌ 2 వరకు నిర్మలా సీతారామన్‌ కెనడా, అమెరికాలో అధికారిక పర్యటన చేస్తున్నారు. కెనడా పర్యటనలో భాగంగా అక్కడి వ్యాపార సంస్థల ప్రతినిధులతో సమావేశం కానున్నారు. ఇంధనం, కృత్రిమ మేధస్సు, కీలక ఖనిజాలు తదితర రంగాల్లో పెట్టుబడులు, వ్యాపార అవకాశాలపై జరిగే సమావేశాలు, చర్చావేదికల్లో కూడా ఆమె పాల్గొంటున్నారు. కెనడా-భారత్‌ ఆర్థిక వ్యవహారాల తదుపరి మంత్రుల స్థాయి చర్చలు 2027లో నిర్వహించాలని భావిస్తున్నారు. పరస్పర ప్రయోజనాలకు సంబంధించిన రంగాల్లో స్పష్టమైన సహకారం, ఆచరణాత్మక ఫలితాలు సాధించే దిశగా నిరంతరం చర్చలు కొనసాగించాలని ఇరు దేశాలు నిర్ణయించాయి.