Joint Home Loan | జాయింట్ హోమ్ లోన్ తీసుకుంటున్నారా.. తప్పక తెలుసుకోవాల్సిన కీలక విషయాలు ఇవే..

Joint Home Loan | ఇల్లు కొనుగోలు చేసే సమయంలో జాయింట్ హోమ్ లోన్ తీసుకోవడం వల్ల రుణ అర్హత పెరగడమే కాకుండా, భారీ ఈఎంఐ భారాన్ని ఇద్దరూ పంచుకోవచ్చు. అయితే ఎక్కువ మొత్తంలో లోన్ వస్తుందని మాత్రమే భావించి జాయింట్ హోమ్ లోన్ ఎంచుకోవడం సరైన నిర్ణయం కాదని నిపుణులు హెచ్చరిస్తున్నారు. బ్యాంక్‌బజార్ డైరెక్టర్ అంకిత్ బగాడియా మాట్లాడుతూ అత్యంత తెలివైన హోమ్ లోన్ అంటే కేవలం తక్కువ వడ్డీ రేటు కాద‌ని, సరైన విధంగా నిర్మాణం చేసిన లోన్ అని తెలిపారు. భార్యాభర్తలు జాయింట్ హోమ్ లోన్ తీసుకునే ముందు ఆస్తి యాజమాన్యం ఎలా ఉండాలి, ఈఎంఐని ఎవరు ఎంత మేరకు చెల్లించాలి, తిరిగి చెల్లింపు ప్రణాళిక ఎలా ఉండాలి వంటి అంశాలను ముందుగానే నిర్ణయించుకోవాలి. ప్రతి సందర్భంలో 50:50 నిష్పత్తి సరైనదనే నియమం లేదు. డౌన్ పేమెంట్ ఎవరు చెల్లిస్తున్నారు, ఆస్తి యాజమాన్యం ఎవరి పేరులో ఉంటుంది, ఈఎంఐని వాస్తవంగా ఎవరు చెల్లిస్తారు అనే అంశాల ఆధారంగా వాటా నిర్ణయించాలి.

ఒక‌రు ఈఎంఐ చెల్లించ‌క‌పోతే..

ఒకరు ఈఎంఐ చెల్లించడం ఆపేస్తే పరిస్థితి ఎలా ఉంటుంది అనే విషయం చాలామందికి తెలియదు. ఉద్యోగం కోల్పోవడం, కెరీర్ బ్రేక్ తీసుకోవడం, ఉన్నత విద్య కోసం వెళ్లడం లేదా స్వంత వ్యాపారం ప్రారంభించడం వంటి కారణాలతో ఒకరు ఈఎంఐ చెల్లించకపోయినా, బ్యాంక్ దృష్టిలో వ్యక్తిగత ఒప్పందాలకు ప్రాధాన్యం ఉండదు. ఇద్దరు సహ రుణగ్రహీతలూ రుణానికి సమానంగా బాధ్యత వహించాల్సి ఉంటుంది. బ్యాంక్ దృష్టిలో ఈ రుణ బాధ్యత భార్యాభర్తలిద్దరిదీ. ఒకరు ఈఎంఐ చెల్లించడం నిలిపివేస్తే, మొత్తం రుణ చెల్లింపు బాధ్యత మరొకరిపై పడుతుంది. అంటే ముందుగా నిర్ణయించుకున్న ఈఎంఐ వాటాకు మాత్రమే కాకుండా, మిగిలిన మొత్తం రుణానికీ ఒక్కరే బాధ్యత వహించాల్సిన పరిస్థితి వ‌స్తుంది. ముఖ్యంగా 20 నుంచి 25 సంవత్సరాల పాటు కొనసాగే హోమ్ లోన్లలో దీర్ఘకాలిక ఆర్థిక ప్రణాళిక ఎంతో కీలకమని ఆయన సూచించారు.

50:50 నిష్ప‌త్తి స‌రైందేనా..

పన్ను ప్రయోజనాల విషయంలో కూడా 50:50 నిష్పత్తి ప్రతిసారి లాభదాయకం కాదు. ఒక జీవిత భాగస్వామి 30 శాతం ఆదాయపు పన్ను శ్లాబ్‌లో ఉండగా, మరొకరికి పన్ను చెల్లించాల్సిన ఆదాయం లేకపోతే, పన్ను మినహాయింపు ప్రయోజనం అధిక ఆదాయం ఉన్న వ్యక్తికి ఎక్కువ ఉపయోగపడుతుంది. అయితే ప్రస్తుత ఆదాయాన్ని మాత్రమే పరిగణనలోకి తీసుకోవద్దని నిపుణులు సూచిస్తున్నారు. ప్రస్తుతం కెరీర్ బ్రేక్‌లో ఉన్న వ్యక్తి భవిష్యత్తులో మళ్లీ ఉద్యోగంలో చేరి ఈఎంఐ చెల్లింపులో భాగస్వామి కావచ్చు. అందువల్ల ప్రస్తుత జీతాల కంటే, భవిష్యత్తులో వచ్చే ఆదాయ అవకాశాలను కూడా దృష్టిలో ఉంచుకుని యాజమాన్యం, ఈఎంఐ చెల్లింపు నిర్మాణాన్ని రూపొందించుకోవాలని అంకిత్ బగాడియా తెలిపారు.

లోన్ నుంచి బ‌య‌ట‌కు రావాలంటే..

జాయింట్ హోమ్ లోన్ నుంచి బయటకు రావాలనుకుంటే కూడా అది సులభంగా సాధ్యం కాదు. సహ రుణగ్రహీతను తొలగించాలంటే బ్యాంక్ అనుమతి తప్పనిసరి. మిగిలిన రుణగ్రహీత ఆర్థిక సామర్థ్యాన్ని బ్యాంక్ మళ్లీ పరిశీలించి, కొత్త క్రెడిట్ అంచనా వేసిన తర్వాతే నిర్ణయం తీసుకుంటుంది. అలాగే హోమ్ లోన్ నుంచి పేరు తొలగించుకున్నంత మాత్రాన ఆస్తిపై యాజమాన్య హక్కులు స్వయంచాలకంగా మారవు. రుణ బాధ్యత, ఆస్తి యాజమాన్యం రెండు వేర్వేరు అంశాలు. ఆస్తి యాజమాన్యాన్ని మార్చాలంటే చట్టబద్ధంగా సేల్ డీడ్ లేదా ట్రాన్స్‌ఫర్ డీడ్ ను నమోదు చేయాల్సి ఉంటుంది.