Gold Price | ఆర్‌బీఐ రేటు పెంపుతో బంగారం మరింత పడుతుందా? కీలక స్థాయిలివే..

Gold Price | బంగారం ధరలపై బుధ‌వారం ఒత్తిడి కనిపించింది. భారతీయ రిజర్వ్ బ్యాంక్ రెపో రేటును 5.25 శాతం నుంచి 25 బేసిస్ పాయింట్లు పెంచి 5.50 శాతానికి చేర్చడంతో, వడ్డీ రేట్ల పెంపు బంగారం ధరలపై ఎలాంటి ప్రభావం చూపుతుందనే అంశంపై ఇన్వెస్టర్లు దృష్టి పెట్టారు. అంతర్జాతీయ మార్కెట్లో స్పాట్ గోల్డ్ ఔన్స్‌కు సుమారు 4,144 డాలర్ల వద్ద, దాదాపు 0.5 శాతం నష్టంతో ట్రేడయ్యింది. దేశీయంగా మల్టీ కమోడిటీ ఎక్స్ఛేంజ్‌లో 24 క్యారెట్ల బంగారం 10 గ్రాములకు సుమారు రూ.1,49,500 వద్ద ఉంది. ఇప్పటికే ఈ వారంలో బంగారం ధర దాదాపు 1 శాతం తగ్గింది. సెప్టెంబర్ చివర్లో ఔన్స్‌కు 4,168 డాలర్ల వద్ద ఉన్న ధర, సెప్టెంబర్ 28న నమోదైన ఏడు వారాల కనిష్ఠ స్థాయి 4,110.55 డాలర్లకు కొద్దిగా పైనే కొనసాగుతోంది.

మరోవైపు, జనవరి 28న నమోదైన రికార్డు గరిష్ఠం 5,589 డాలర్లతో పోలిస్తే ప్రస్తుతం బంగారం ధర సుమారు 26 శాతం దిగువన ఉంది. దీంతో ఇటీవలి వడ్డీ రేట్ల మార్పుల్లో కొంత ప్రభావం ఇప్పటికే బంగారం ధరల్లో ప్రతిబింబించి ఉంటుంద‌ని నిపుణులు భావిస్తున్నారు. అయితే ఆర్‌బీఐ రేటు పెంపుతో బంగారం మరోసారి భారీగా పడిపోతుందా? లేక వడ్డీ రేట్లతోపాటు ఇతర అంతర్జాతీయ అంశాలు కూడా బంగారం దిశను నిర్ణయిస్తాయా? అనేది ఇప్పుడు ఇన్వెస్టర్లలో ప్రధాన ప్రశ్నగా మారింది.

ధర‌లు ఇంకా త‌గ్గుతాయా..

వడ్డీ రేటు పెంపు జరిగిన ప్రతిసారీ బంగారం ధరలు కచ్చితంగా పడిపోతాయని చెప్పలేమని ఇన్వెస్ట్‌మెంట్ నిపుణుడు, ఐఎన్‌వీ అసెట్ పీఎంఎస్ బిజినెస్ హెడ్ హర్షల్ దసాని తెలిపారు. బంగారం ధరలపై కేవలం పాలసీ రేటు మాత్రమే ప్రభావం చూపదని, వాస్తవ రాబడులు, డాలర్ విలువ, రేటు పెంపు వెనుక ఉన్న కారణాలు మరింత కీలకమని వివరించారు. ఇటీవల అమెరికా వడ్డీ రేట్ల చక్రం దీనికి ఉదాహరణగా నిలుస్తోంది. సెప్టెంబర్ 16న ఫెడరల్ రిజర్వ్ రేటు పెంచిన తర్వాత బంగారం ధర సుమారు 4,490 డాలర్ల నుంచి 6 శాతానికి పైగా పడిపోయింది. అయితే ఆ తర్వాతి రోజే రాబడులు తగ్గడం, చమురు ధరలు సడలడంతో బంగారం 2.5 శాతం పెరిగింది. 2022లోనూ ఇదే పరిస్థితి కనిపించింది. ఆ ఏడాది అమెరికా ఫెడరల్ రిజర్వ్ మొత్తం 425 బేసిస్ పాయింట్ల మేర వడ్డీ రేట్లు పెంచింది. అయినప్పటికీ ద్రవ్యోల్బణం కూడా దాదాపు అదే వేగంతో పెరగడంతో సంవత్సరం చివరికి బంగారం ధర దాదాపు స్థిరంగానే ముగిసింది.

వాస్తవ రాబడులు పెరగడం, డాలర్ బలపడడం, భౌగోళిక రాజకీయ ఉద్రిక్తతలు తగ్గడం అనే మూడు అంశాలు కలిసి వస్తే బంగారానికి ప్రతికూల పరిస్థితి ఏర్పడుతుందని దసాని పేర్కొన్నారు. ప్రస్తుతం మార్కెట్ ఈ అంశాల్లో కొన్నింటిని ఇప్పటికే ధరల్లో ప్రతిబింబిస్తోంది. ఫెడరల్ రిజర్వ్ డాట్ ప్లాట్ మరోసారి వడ్డీ రేటు పెంపునకు అవకాశం చూపుతుండగా, ఇరాన్‌కు సంబంధించిన భౌగోళిక రాజకీయ రిస్క్ కూడా గరిష్ఠ స్థాయి నుంచి తగ్గింది.

ఆర్‌బీఐ రేటు పెంపు ప్రభావం ఉంటుందా..

భారతీయ బంగారం ఇన్వెస్టర్లకు ఆర్‌బీఐ నిర్ణయం మరో ప్రభావ మార్గాన్ని సృష్టిస్తుంది. రెపో రేటు 5.50 శాతానికి పెరగగా, 10 సంవత్సరాల ప్రభుత్వ బాండ్ రాబడి దాదాపు 7.2 శాతంగా ఉంది. దేశీయ రాబడులు పెరగడం వల్ల ఎలాంటి వడ్డీ లేదా ఆదాయం ఇవ్వని బంగారాన్ని కలిగి ఉండడానికి అయ్యే అవకాశ వ్యయం పెరుగుతుంది. ఇదే సమయంలో కరెన్సీ ప్రభావం కూడా ఉంటుంది. వడ్డీ రేటు పెంపు రూపాయికి మద్దతు ఇచ్చి రూపాయి విలువను బలోపేతం చేస్తే, అంతర్జాతీయ బంగారం ధరల్లో మార్పు లేకపోయినా దేశీయంగా బంగారం ధరలపై అదనపు ఒత్తిడి ఏర్ప‌డుతుంది. ఈ ఏడాది రూపాయి సుమారు 6 శాతం బలహీనపడడం భారతీయ బంగారం రాబడులకు అదనపు మద్దతు ఇచ్చింది. రూపాయి స్థిరపడితే ఈ ప్రయోజనం తగ్గే అవకాశం ఉంటుంది. అందువల్ల భారతీయ ఇన్వెస్టర్లకు అంతర్జాతీయ బంగారం ధరతోపాటు రూపాయి-డాలర్ మారకం రేటు కూడా కీలకంగా మారుతుంది.

ఆర్‌బీఐ రేటు పెంపును మార్కెట్ ముందుగానే ఎక్కువగా అంచనా వేసింది. రాయిటర్స్ నిర్వహించిన ఆర్థికవేత్తల సర్వేలో 60 శాతం మంది 25 బేసిస్ పాయింట్ల పెంపును అంచనా వేశారు. అయితే అసలు కీలక అంశం పాలసీ వైఖరిలో వచ్చిన మార్పు. ఆర్‌బీఐ తన పాలసీ వైఖరిని క్యాలిబ్రేటెడ్ టైటనింగ్ గా మార్చింది. ఆరుగురు ద్రవ్య విధాన కమిటీ సభ్యుల్లో నలుగురు ఈ వైఖరికి అనుకూలంగా ఓటు వేశారు. సమీప కాలంలో వడ్డీ రేట్ల కోతకు అవకాశం లేదని కూడా ఆర్‌బీఐ సంకేతాలు ఇచ్చింది. భవిష్యత్ నిర్ణయాలు మారుతున్న స్థూల ఆర్థిక పరిస్థితులపై ఆధారపడి ఉంటాయని స్పష్టం చేసింది. బంగారానికి ఈ పరిస్థితి రెండు వైపుల ప్రభావాన్ని కలిగిస్తుంది. ఒకవైపు అధిక వడ్డీ రేట్లు, అధిక బాండ్ రాబడులు బంగారాన్ని కలిగి ఉండే అవకాశ వ్యయాన్ని పెంచుతాయి. మరోవైపు నిరంతర ద్రవ్యోల్బణం, భౌగోళిక రాజకీయ అనిశ్చితి బంగారాన్ని రక్షణాత్మక పెట్టుబడిగా కొనుగోలు చేసే డిమాండ్‌ను పెంచుతాయి.

నిపుణులు ఏమంటున్నారు?

ఈక్వినామిక్స్ రీసెర్చ్ ప్రైవేట్ లిమిటెడ్ వ్యవస్థాపకుడు చొక్కలింగం ప్రకారం దేశీయ వడ్డీ రేట్లు, బంగారం ధరల మధ్య సంబంధం సాపేక్షంగా బలహీనంగా ఉంటుంద‌ని తెలిపారు. దేశీయ బంగారం ధరలను ప్రధానంగా అంతర్జాతీయ బంగారం ధరలు, రూపాయి మారకం రేటు నిర్ణయిస్తాయని ఆయన తెలిపారు. అదే సమయంలో ప్రపంచ బంగారం ధరలపై అమెరికా, యూరప్‌లోని వడ్డీ రేట్ల చక్రాలు ప్రధాన ప్రభావం చూపుతాయని వివరించారు. పాశ్చాత్య దేశాల్లో వడ్డీ రేట్ల పెంపు కొనసాగితే అంతర్జాతీయ బంగారం ధరల్లో మరింత బలహీనత వచ్చే అవకాశం ఉందని అంచనా వేశారు.

వెల్త్‌మిల్స్ సెక్యూరిటీస్ ఈక్విటీ స్ట్రాటజీ డైరెక్టర్ క్రాంతి బాథిని మాట్లాడుతూ ప్రస్తుతం బలపడుతున్న డాలర్, అధిక స్థాయిలో ఉన్న ముడి చమురు ధరలు స్వల్ప, మధ్యకాలంలో బంగారంపై ఒత్తిడి పెంచుతున్నాయని తెలిపారు. పెరుగుతున్న వడ్డీ రేట్లు బంగారం ధరలను స్థిరంగా ఉంచుతాయ‌ని, రష్యా నుంచి వస్తున్న సరఫరాకు సంబంధించిన తాజా పరిణామాలు కూడా బంగారంపై మరో ఒత్తిడిగా మారాయని చెప్పారు.

అంద‌రి చూపు ఫెడ్ పైనే..

ప్రపంచ బంగారం ఇన్వెస్టర్ల తక్షణ దృష్టి ఆర్‌బీఐ కంటే అమెరికా ఫెడరల్ రిజర్వ్‌పైనే ఉండనుంది. సెప్టెంబర్ 15-16 తేదీల్లో జరిగిన ఫెడ్ సమావేశ వివరాల కోసం మార్కెట్లు ఎదురుచూస్తుండడంతో బుధవారం బంగారం ధరలు తగ్గాయి. స్పాట్ గోల్డ్ ఔన్స్‌కు 4,150.23 డాలర్ల వద్ద ఉండగా, అమెరికా గోల్డ్ ఫ్యూచర్స్ సుమారు 4,177.60 డాలర్ల వద్ద ఉన్నాయి. ఫెడ్ అధికారులు ఇటీవల చేసిన వ్యాఖ్యలు కూడా వడ్డీ రేట్ల అంచనాలను కీలకంగా మార్చాయి. శాన్‌ఫ్రాన్సిస్కో ఫెడ్ అధ్యక్షురాలు మేరీ డాలీ ద్రవ్యోల్బణ ఒత్తిళ్లు తగ్గుతున్నాయా లేదా కొనసాగుతున్నాయా అన్నదానిపై ఆధారపడి తదుపరి రేటు పెంపులు ఉంటాయని చెప్పారు. కాన్సాస్ సిటీ ఫెడ్ అధ్యక్షుడు జెఫ్ ష్మిడ్ ద్రవ్యోల్బణాన్ని తగ్గించేందుకు వడ్డీ రేట్లు ఇంకా పెరగాల్సిన అవసరం ఉందని అన్నారు. అక్టోబర్‌లో రేటు పెంపుపై అంచనాలు తగ్గినప్పటికీ, డిసెంబర్‌లో వడ్డీ రేటు పెంపునకు మార్కెట్ 85 శాతం అవకాశాన్ని అంచనా వేసింది. దీంతో సమీప కాలంలో బంగారం ఇన్వెస్టర్లు అమెరికా వాస్తవ బాండ్ రాబడులు, డాలర్ విలువను ముఖ్యమైన సూచికలుగా పరిగణించాల్సి ఉంటుంది.

కీల‌క స్థాయిలు ఇవే..

బంగారం ధరల్లో ఇప్పటికే గణనీయమైన దిద్దుబాటు జరిగింది. జనవరి 28న నమోదైన 5,589 డాలర్ల రికార్డు స్థాయి నుంచి స్పాట్ గోల్డ్ సుమారు 26 శాతం తగ్గింది. ప్రస్తుతం 4,110.55 డాలర్ల ఏడు వారాల కనిష్ఠ స్థాయికి సమీపంలో ట్రేడవుతోంది. హర్షల్ దసాని ప్రకారం 4,110 డాలర్లు కీలక సాంకేతిక స్థాయి. ఈ స్థాయి కంటే దిగువన బంగారం ధర స్థిరంగా ముగిస్తే తదుపరి 4,000 డాలర్ల జోన్ వైపు పతనం కొనసాగే అవకాశం ఉంటుంది. మరోవైపు జనవరి రికార్డు గరిష్ఠం ప్రధాన నిరోధ స్థాయిగా కొనసాగుతుంది. అయితే భారతీయ ఇన్వెస్టర్లు అంతర్జాతీయ బంగారం ధరను మాత్రమే పరిగణనలోకి తీసుకోకూడదు. రూపాయి-డాలర్ మారకం రేటు కూడా అంతర్జాతీయ మార్కెట్‌లో వచ్చే పతనం దేశీయ బంగారం ధరలకు ఎంత మేరకు బదిలీ అవుతుందో నిర్ణయిస్తుంది.

అందువ‌ల్ల‌ ఇన్వెస్టర్లు ఆర్‌బీఐ రేటు పెంపును చూసి బంగారాన్ని పూర్తిగా వదిలేయడం కంటే, తమ బంగారం కేటాయింపును, కొనుగోలు స్థాయిలను పునఃసమీక్షించుకోవడం సముచితంగా ఉంటుంది. జనవరి గరిష్ఠ స్థాయి నుంచి బంగారం ఇప్పటికే సుమారు 26 శాతం దిగివచ్చి, 4,110 డాలర్ల కీలక మద్దతు స్థాయికి చేరువలో ఉన్న నేపథ్యంలో, తదుపరి దిశను ఊహించడానికి బదులుగా విడతల వారీ పెట్టుబడి, క్రమశిక్షణతో కూడిన పెట్టుబడి పరిమాణం మరింత కీలకంగా మారుతాయ‌ని నిపుణులు చెబుతున్నారు.