త్రినేత్ర News Logo
DIGITAL-NEWS

Gold | పెట్టుబ‌డిదారుల‌కు బంగారం భారీ షాక్‌.. వారం రోజుల్లోనే 9 శాతం ప‌త‌నం..

Gold | అమెరికా ఫెడరల్ రిజర్వ్ వడ్డీ రేట్ల పెంపు సంకేతాలు, కృత్రిమ మేధ (ఏఐ) షేర్లలో అమ్మకాల ఒత్తిడి కారణంగా అంతర్జాతీయ మార్కెట్లో బంగారం, వెండి ధరలు భారీగా పడిపోయాయి. బంగారం ధర వరుసగా ఐదో రోజు క్షీణించి ఔన్సుకు 4వేల డాలర్ల కీలక స్థాయి దిగువకు చేరింది. మార్చి తర్వాత ఈ వారం బంగారం అతిపెద్ద వారపు పతనాన్ని నమోదు చేసింది.

S

Business | Published On Nov 21, 2026, 9.59 am IST

Gold | పెట్టుబ‌డిదారుల‌కు బంగారం భారీ షాక్‌.. వారం రోజుల్లోనే 9 శాతం ప‌త‌నం..
Advertisement

Gold | అమెరికా ఫెడరల్ రిజర్వ్ వడ్డీ రేట్ల పెంపు సంకేతాలు, కృత్రిమ మేధ (ఏఐ) షేర్లలో అమ్మకాల ఒత్తిడి కారణంగా అంతర్జాతీయ మార్కెట్లో బంగారం, వెండి ధరలు భారీగా పడిపోయాయి. బంగారం ధర వరుసగా ఐదో రోజు క్షీణించి ఔన్సుకు 4వేల డాలర్ల కీలక స్థాయి దిగువకు చేరింది. మార్చి తర్వాత ఈ వారం బంగారం అతిపెద్ద వారపు పతనాన్ని నమోదు చేసింది.

వారం రోజుల్లోనే 9 శాతం ప‌త‌నం..

అంతర్జాతీయ మార్కెట్లో పసిడి ధరలు భారీ నష్టాలను చవిచూస్తున్నాయి. బంగారం ధర ఔన్సుకు సుమారు 3,500 డాలర్ల స్థాయికి పడిపోయింది. ఈ ఒక్క వారంలోనే దాదాపు 9 శాతం క్షీణించింది. సెప్టెంబర్ 2025 తర్వాత కనిష్ఠ స్థాయికి చేరుకుంది. మరోవైపు వెండి ధరలు గత ఐదు ట్రేడింగ్ సెషన్లలో 15 శాతానికి పైగా పడిపోయాయి. కేంద్ర బ్యాంకులు కొనుగోళ్లు జరుపుతుండడం, ధరలు తగ్గినప్పుడు కొనుగోలు చేసే ఇన్వెస్టర్లు ఉండడంతో 4వేల డాలర్ల స్థాయి బంగారానికి మద్దతుగా నిలుస్తుందని కొందరు భావించినప్పటికీ, తాజా పతనంతో ఆ అంచనాలు తలకిందులయ్యాయి.

బంగారం ధ‌ర‌ల ప‌త‌నం వెనుక కార‌ణాలేమిటి..?

బంగారం ధరలు ఇంత భారీగా పడిపోవడానికి నిర్దిష్టమైన భారీ విక్రయదారులు కనిపించడం లేదని మార్కెట్ నిపుణులు చెబుతున్నారు. గోల్డ్ ఎక్స్ఛేంజ్ ట్రేడెడ్ ఫండ్స్ (ఈటీఎఫ్)ల‌లో బంగారం నిల్వలు వేసవి కాలం నుంచి ఎక్కువగా పెరుగుతూనే ఉన్నాయని, కామెక్స్ ఫ్యూచర్స్ మార్కెట్లోనూ ఇన్వెస్టర్లు పెద్దఎత్తున కొనుగోలు స్థానాలను తగ్గించలేదని డాయిష్ బ్యాంక్‌కు చెందిన లోహాల వ్యూహ విభాగం అధిపతి డేనియల్ ఘాలీ పేర్కొన్నారు. మార్కెట్లో కొనుగోలుదారులు వెనక్కి తగ్గడంతో ఏర్పడిన ద్రవ్య లభ్యత లోటు ధరల పతనాన్ని మరింత తీవ్రత‌రం చేసిందని వివరించారు. ఫిబ్రవరి చివర్లో అమెరికా-ఇరాన్ యుద్ధం ప్రారంభమైనప్పటి నుంచి అధిక ఇంధన ధరలు ద్రవ్యోల్బణాన్ని పెంచడం, వడ్డీ రేట్ల కోతపై అంచనాలు వెనక్కి వెళ్లడం వంటి పరిణామాలతో బంగారం విలువలో దాదాపు మూడో వంతు తగ్గుదల నమోదైంది. దీనికి తోడు ఏఐ రంగానికి సంబంధించిన షేర్లలో అమ్మకాల ఒత్తిడి ప్రపంచ మార్కెట్లను ప్రభావితం చేస్తోంది. షాంఘై ఫ్యూచర్స్ ఎక్స్ఛేంజ్, చైనా ఈటీఎఫ్‌ల‌లో ఇన్వెస్టర్లు తమ భారీ పెట్టుబడి స్థానాలను తగ్గించుకోవడం కూడా పసిడి పతనానికి కారణమైందని టీడీ సెక్యూరిటీస్ విశ్లేషకులు అభిప్రాయపడ్డారు.

పెట్టుబ‌డులు పెట్ట‌వ‌చ్చా..?

అమెరికా ఫెడరల్ రిజర్వ్ అధికారులు వడ్డీ రేట్ల పెంపుపై చేస్తున్న వ్యాఖ్యలు కూడా బంగారంపై ఒత్తిడి పెంచుతున్నాయి. ఫెడ్ గవర్నర్ లిసా కుక్ ద్రవ్యోల్బణాన్ని నియంత్రించేందుకు వడ్డీ రేట్లను అత్యవసరంగా పెంచాల్సిన అవసరం ఉందని పేర్కొన్నారు. అంతకుముందు గవర్నర్ క్రిస్టోఫర్ వాలర్ డిసెంబర్ సమావేశంలో 0.25 శాతం కాకుండా 0.50 శాతం మేర వడ్డీ రేట్లు పెంచే అంశాన్ని పరిశీలించాల్సి వ‌స్తుంద‌ని తెలిపారు. వడ్డీ రేట్లు పెరిగితే వడ్డీ ఆదాయం అందించని బంగారం వంటి ఆస్తులపై పెట్టుబడుల ఆకర్షణ తగ్గుతుంది. దీంతో అమెరికా పదేళ్ల ట్రెజరీ బాండ్ల రాబడులు దాదాపు 5 శాతం వద్ద కొనసాగుతున్నాయి. గ‌త సెష‌న్‌లో స్పాట్ బంగారం ధర 2.4 శాతం తగ్గి ఔన్సుకు 3,538.49 డాలర్లకు చేరగా, వెండి ధర 4.2 శాతం క్షీణించి 41.16 డాలర్లకు పడిపోయింది. ప్లాటినం, పల్లాడియం ధరలు కూడా తగ్గాయి. అయితే ధ‌ర‌లు త‌గ్గుతున్నాయ‌ని పెట్టుబ‌డిదారులు ఇప్పుడే కొనుగోళ్లు చేయ‌వ‌ద్ద‌ని, ధ‌ర‌లు మ‌ళ్లీ పుంజుకుని గ‌రిష్ట స్థాయిల్లో ఉంటేనే కొనుగోళ్లు చేయాల‌ని విశ్లేష‌కులు సూచిస్తున్నారు. భారీ మొత్తంలో పెట్టుబ‌డులు పెడితే న‌ష్టం వ‌చ్చే ప్ర‌మాదం ఉంటుంద‌ని హెచ్చ‌రిస్తున్నారు.

Advertisement
Advertisement