Mutual Funds | మ్యూచువ‌ల్ ఫండ్స్ అస‌లు ఎన్ని ర‌కాలు.. ఎందులో ఎలా లాభాలు వ‌స్తాయి..?

Mutual Funds | దేశంలో మ్యూచువల్ ఫండ్లు ప్రస్తుతం అత్యంత ప్రజాదరణ పొందిన పెట్టుబడి సాధనాలలో ఒకటిగా మారాయి. ఒకప్పుడు ఆర్థిక మార్కెట్లో చిన్న పాత్ర మాత్రమే పోషించిన మ్యూచువల్ ఫండ్లు, ఇప్పుడు స్టాక్స్, బాండ్ల వంటి ఆస్తుల విలువ నిర్ణయంలో కీలక పాత్ర పోషిస్తున్నాయి. మ్యూచువల్ ఫండ్‌లో పెట్టుబడి పెట్టినప్పుడు, పెట్టుబడిదారులు యూనిట్లను పొందుతారు. ఈ యూనిట్లు ఫండ్‌లో వారి వాటాను సూచిస్తాయి. ఫండ్‌లోని పెట్టుబడుల విలువ పెరిగితే, ఖర్చులు మినహాయించిన తర్వాత ఆ లాభం యూనిట్ హోల్డర్లకు వారి యూనిట్ల నిష్పత్తిలో అందుతుంది. మ్యూచువల్ ఫండ్లు ప్రత్యక్షంగా షేర్లు లేదా ఇతర సెక్యూరిటీల్లో పెట్టుబడి పెట్టడంపై కొన్ని ప్రయోజనాలు, కొన్ని పరిమితులు కలిగి ఉంటాయి. అయినప్పటికీ, ముఖ్యంగా రిటైర్మెంట్ ప్లానింగ్‌లో ఇవి గృహ ఆర్థిక వ్యవస్థలో కీలక భాగంగా మారాయి. దేశంలో మ్యూచువల్ ఫండ్లు వివిధ పెట్టుబడి అవసరాలకు అనుగుణంగా అనేక రకాలుగా అందుబాటులో ఉన్నాయి. పెట్టుబడిదారుల రిస్క్ సామర్థ్యం, పెట్టుబడి కాలవ్యవధి, లక్ష్యాలు, పెట్టుబడి మొత్తాన్ని బట్టి సరైన పథకాన్ని ఎంచుకునే అవకాశం ఉంటుంది.

ఓపెన్ ఎండెడ్ స్కీమ్‌..

ఓపెన్ ఎండెడ్ స్కీమ్ లో పెట్టుబడిదారులు ఎప్పుడైనా యూనిట్లను కొనుగోలు చేయవచ్చు లేదా విక్రయించవచ్చు. దీనికి నిర్దిష్ట మెచ్యూరిటీ తేదీ ఉండదు. పెట్టుబడి, రిడంప్షన్ నేరుగా మ్యూచువల్ ఫండ్ సంస్థతో జరుగుతుంది. ఈ స్కీమ్‌లో ప్రధాన ప్రయోజనం లిక్విడిటీ. నెట్ అసెట్ వ్యాల్యూ (ఎన్‌ఏవీ) ఆధారంగా యూనిట్లను సులభంగా కొనుగోలు లేదా విక్రయించవచ్చు. దేశంలో ఉన్న మ్యూచువల్ ఫండ్లలో ఎక్కువ భాగం ఓపెన్ ఎండెడ్ ఫండ్లే కావ‌డం విశేషం. ఇక క్లోజ్ ఎండెడ్ స్కీమ్ పథకాలకు నిర్దిష్ట మెచ్యూరిటీ కాలం ఉంటుంది. ప్రారంభ దశలో నిర్వహించే న్యూ ఫండ్ ఆఫర్ (ఎన్‌ఎఫ్‌వో) సమయంలో మాత్రమే పెట్టుబడి పెట్టే అవకాశం ఉంటుంది. ఎన్‌ఎఫ్‌వో ముగిసిన తర్వాత కొత్త పెట్టుబడుల‌ను అనుమతించరు. యూనిట్లు స్టాక్ ఎక్స్చేంజ్‌లో ట్రేడ్ అవుతాయి. మార్కెట్ డిమాండ్, సరఫరా, పెట్టుబడిదారుల అంచనాల కారణంగా మార్కెట్ ధర ఎన్‌ఏవీతో భిన్నంగా ఉంటుంది. ఇంటర్వల్ స్కీమ్ ఓపెన్ ఎండెడ్, క్లోజ్ ఎండెడ్ స్కీమ్‌ల మిశ్రమం. ముందుగా నిర్ణయించిన వ్యవధుల్లో మాత్రమే యూనిట్ల కొనుగోలు, విక్రయం లేదా రిడంప్షన్‌కు అవకాశం ఉంటుంది.

5 ప్ర‌ధాన ర‌కాలు..

సెబీ మార్గదర్శకాల ప్రకారం మ్యూచువల్ ఫండ్ల‌ను ప్రధానంగా ఐదు విభాగాలుగా విభజించారు. ఈక్విటీ స్కీమ్స్, డెట్ స్కీమ్స్, హైబ్రిడ్ స్కీమ్స్, సొల్యూషన్ ఓరియెంటెడ్ స్కీమ్స్, ఇతర స్కీమ్స్ అని ఉన్నాయి. ఈక్విటీ స్కీమ్స్ లో ఈక్విటీ ఫండ్లు ప్రధానంగా షేర్లలో పెట్టుబడి పెడతాయి. సెబీ మొత్తం 11 కేటగిరీలను నిర్వచించింది. మార్కెట్ క్యాపిటలైజేషన్‌లో టాప్ 100 కంపెనీలను లార్జ్ క్యాప్ కంపెనీలుగా, 101 నుంచి 250వ స్థానంలోని కంపెనీలను మిడ్ క్యాప్ లుగా, 251వ స్థానం నుంచి మిగిలిన కంపెనీలను స్మాల్ క్యాప్ కంపెనీలుగా విభ‌జించింది. ఇక ఈక్విటీ ఫండ్ల‌లోనూ ప‌లు ర‌కాలు ఉన్నాయి. మ‌ల్టీ క్యాప్ ఫండ్లు, లార్జ్ క్యాప్ ఫండ్లు, లార్జ్ అండ్ మిడ్ క్యాప్ ఫండ్లు, మిడ్ క్యాప్ ఫండ్లు, స్మాల్ క్యాప్ ఫండ్లు, డివిడెండ్ యీల్డ్ ఫండ్లు, వాల్యూ ఫండ్లు, కాంట్రా ఫండ్లు, ఫోకస్డ్ ఫండ్లు, సెక్టోరల్ లేదా థీమాటిక్ ఫండ్లు, ఈఎల్‌ఎస్‌ఎస్ ఫండ్లు అని అవి చెలామ‌ణీలో ఉన్నాయి. ఈఎల్‌ఎస్‌ఎస్ ఫండ్లు అంటే ఈక్విటీ లింక్డ్ సేవింగ్స్ స్కీమ్ (ఈఎల్‌ఎస్‌ఎస్) పన్ను ప్రయోజనాలను అందించే పథకం. కనీసం 3 సంవత్సరాల లాక్-ఇన్ కాలం ఉంటుంది.

డెట్ ఫండ్లు ఇలా ఉంటాయి..

డెట్ ఫండ్లు ప్రధానంగా బాండ్లు, ట్రెజరీ బిల్లులు, మనీ మార్కెట్ ఇన్‌స్ట్రుమెంట్లు వంటి స్థిర ఆదాయ సాధనాల్లో పెట్టుబడి పెడతాయి. సెబీ మొత్తం 16 డెట్ ఫండ్ కేటగిరీలను నిర్వచించింది. ఓవర్‌నైట్ ఫండ్లు, లిక్విడ్ ఫండ్లు, అల్ట్రా షార్ట్ డ్యూరేషన్ ఫండ్లు, లో డ్యూరేషన్ ఫండ్లు, మనీ మార్కెట్ ఫండ్లు, షార్ట్ డ్యూరేషన్ ఫండ్లు, మీడియం డ్యూరేషన్ ఫండ్లు, మీడియం టు లాంగ్ డ్యూరేషన్ ఫండ్లు, లాంగ్ డ్యూరేషన్ ఫండ్లు, డైనమిక్ బాండ్ ఫండ్లు, కార్పొరేట్ బాండ్ ఫండ్లు, క్రెడిట్ రిస్క్ ఫండ్లు, బ్యాంకింగ్ అండ్ పీఎస్‌యూ ఫండ్లు, గిల్ట్ ఫండ్లు, 10 సంవత్సరాల కాన్స్టెంట్ డ్యూరేషన్ గిల్ట్ ఫండ్లు, ఫ్లోటర్ ఫండ్లు అని ప‌లు ర‌కాలు ఉన్నాయి. అయితే డెట్ ఫండ్లు సాధారణంగా ఈక్విటీ ఫండ్లతో పోలిస్తే తక్కువ రిస్క్ కలిగి ఉంటాయి. హైబ్రిడ్ ఫండ్లు ఈక్విటీ, డెట్ ఆస్తుల మిశ్రమంగా ఉంటాయి. రిస్క్, రిటర్న్ మధ్య సమతుల్యతను అందించడమే వీటి లక్ష్యం.

హైబ్రిడ్ ఫండ్ల‌లో ర‌కాలు..

ఇక హైబ్రిడ్ ఫండ్ల‌లోనూ ప‌లు ర‌కాలు ఉన్నాయి. కన్జర్వేటివ్ హైబ్రిడ్ ఫండ్లు 75 నుంచి 90 శాతం వరకు డెట్ ఇన్‌స్ట్రుమెంట్లలో పెట్టుబడి పెడతాయి. అగ్రెసివ్ హైబ్రిడ్ ఫండ్లు 65 నుంచి 80 శాతం వరకు ఈక్విటీల‌లో పెట్టుబడి పెడతాయి. డైనమిక్ అసెట్ అలోకేషన్ లేదా బాలెన్స్‌డ్ అడ్వాంటేజ్ ఫండ్లు మార్కెట్ పరిస్థితులకు అనుగుణంగా ఈక్విటీ, డెట్ కేటాయింపుల‌ను మార్చుకుంటాయి. మల్టీ అసెట్ అలోకేషన్ ఫండ్లు కనీసం మూడు వేర్వేరు ఆస్తి తరగతుల్లో పెట్టుబడి పెడతాయి. ఆర్బిట్రాజ్ ఫండ్లు మార్కెట్ ధరల వ్యత్యాసాల ద్వారా లాభాలు పొందే వ్యూహాన్ని అనుసరిస్తాయి. ఈక్విటీ సేవింగ్స్ ఫండ్లు ఈక్విటీ, ఆర్బిట్రాజ్, డెట్ కలయికతో పనిచేస్తాయి. సొల్యూషన్ ఓరియెంటెడ్ స్కీమ్స్ ను ప్రత్యేక జీవిత లక్ష్యాలను దృష్టిలో ఉంచుకుని రూపొందించారు. అలాగే రిటైర్మెంట్ ఫండ్ లో కనీసం 5 సంవత్సరాల లాక్-ఇన్ లేదా రిటైర్మెంట్ వయస్సు వరకు పెట్టుబడిని కొనసాగించాల్సి ఉంటుంది. చిల్డ్రన్స్ ఫండ్ ను పిల్లల భవిష్యత్ అవసరాల కోసం రూపొందించారు. కనీసం 5 సంవత్సరాల లాక్-ఇన్ ఉంటుంది.

నిపుణుల సూచ‌న అవ‌స‌రం..

ఇక ఇవే కాకుండా ప‌లు ఇత‌ర ర‌కాల ఫండ్లు కూడా ఉన్నాయి. ఇండెక్స్ ఫండ్లు లేదా ఈటీఎఫ్‌లు నిర్దిష్ట సూచీ (ఇండెక్స్)ను అనుసరిస్తూ పెట్టుబడి పెడతాయి. నిఫ్టీ 50 లేదా సెన్సెక్స్ వంటి సూచీల పనితీరును ప్రతిబింబిస్తాయి. ఫండ్ ఆఫ్ ఫండ్స్ (ఎఫ్‌ఓఎఫ్) నేరుగా స్టాక్స్ లేదా బాండ్లలో కాకుండా ఇతర మ్యూచువల్ ఫండ్లలో పెట్టుబడి పెడతాయి. ఇలా మ్యూచువ‌ల్ ఫండ్ల‌లో అనేక ర‌కాలు ఉంటాయి. అయిత మ్యూచువల్ ఫండ్ ఎంపికలో రిస్క్ సామర్థ్యం, పెట్టుబడి లక్ష్యం, కాలవ్యవధి, ఆర్థిక పరిస్థితులను పరిగణనలోకి తీసుకోవాలి. అధిక రాబడుల కోసం ఈక్విటీ ఫండ్లు, స్థిరత్వం కోసం డెట్ ఫండ్లు, రెండింటి సమతుల్యత కోసం హైబ్రిడ్ ఫండ్లు అనుకూలంగా ఉంటాయి. మార్కెట్ల‌లో పెట్టుబ‌డులు పెట్టేముందు నిపుణుల స‌ల‌హా తీసుకోవాల్సి ఉంటుంది.