HCL | ఏఐకి సిద్ధం అవ్వాలంటే భారీ ఎత్తున నైపుణ్యాభివృద్ధి అవ‌స‌రం: హెచ్‌సీఎల్ సీఈవో విజ‌య‌కుమార్

HCL | ఏఐ వ‌ల్ల సాఫ్ట్‌వేర్ రంగానికి కొత్త అవ‌కాశాలు విస్తృతంగా క‌నిపిస్తున్నాయ‌ని హెచ్‌సీఎల్ టెక్, మేనేజింగ్ డైరెక్ట‌ర్‌, సీఈవో సి.విజ‌య‌కుమార్ అన్నారు. ముంబైలో జరిగిన నాస్‌కామ్ టెక్నాలజీ అండ్ లీడర్‌షిప్ ఫోరంలో ఆయ‌న మాట్లాడారు. ఏఐ వ‌ల్ల సాఫ్ట్ వేర్ రంగానికి ముప్పు ఉంద‌ని, భారీ ఎత్తున ఉద్యోగాల‌ను కోల్పోవాల్సి వ‌స్తుంద‌ని ఇటీవ‌లి కాలంలో జ‌రుగుతున్న చ‌ర్చ నేప‌థ్యంలో ఆయ‌న ఆయా అంశాల‌పై కీల‌క విష‌యాల‌ను వెల్ల‌డించారు. సాఫ్ట్‌వేర్ రంగానికి ఇప్పటిక‌ప్పుడు వ‌చ్చిన ముప్పు ఏమీ లేద‌ని, ఇప్పుడే అంతా ముగిసిపోలేద‌ని అన్నారు. ఏఐ కోసం సిద్ధం అవ్వాలంటే ఇప్పుడున్న‌వారు భారీ ఎత్తున నైపుణ్యాల‌ను అభివృద్ధి చేసుకోవాల్సిన అవ‌స‌రం ఉంద‌న్నారు.

ఫ‌లితాల‌ను సాధించ‌డ‌మే స‌వాలు..

క్లౌడ్, డిజిటల్, వై2కే వంటి మార్పులు ఎక్కువ మంది ఉద్యోగులను అవసరం చేసేవి. కానీ ఈసారి పరిస్థితి భిన్నం. ప్రస్తుతం మన ఉద్యోగులు చేసే పనిలో చాలా భాగాన్ని అధిక వేగంతో, అధిక సామర్థ్యంతో ఏఐ చేయగలదు. అందువల్ల ఈ మార్పు ఇతర మార్పుల కంటే భిన్నం. ఇది కష్టమైనదే, ఎందుకంటే ఇది నేరుగా మనుషులను ప్రభావితం చేస్తుంది.. అని విజ‌య‌కుమార్ పేర్కొన్నారు. ఏఐ స్వయంగా సమస్య కాదని, కానీ సంస్థల్లో ఏఐ వినియోగాన్ని విస్తృతంగా అమలు చేసి, ఫలితాలు సాధించడమే అసలు సవాలని ఆయన అభిప్రాయపడ్డారు. ఈ దిశగా ఏఐ స్వీకరణను సులభతరం చేసే మేధోసంపత్తిని సృష్టించడంలో సంస్థ భారీగా పెట్టుబడులు పెడుతోందని తెలిపారు.

ఏఐ డేటా సెంట‌ర్ల‌కు అధిక వ్య‌యం..

ఏఐని విస్తృత స్థాయిలో అమలు చేయడానికి అవసరమైన ఇంటెలిజెన్స్ లేయర్‌ను సంస్థలకు అందించడం అతిపెద్ద అవకాశం అని విజ‌య‌కుమార్ అన్నారు. ప్రపంచవ్యాప్తంగా ఏఐ డేటా సెంటర్ల నిర్మాణానికి ట్రిలియన్ డాలర్ల మూలధన వ్యయం వెచ్చించ‌డం జరుగుతోందని, దాని రూపకల్పన, అమలు, నిర్వహణ కోసం కనీసం 100 బిలియన్ డాలర్ల సేవల అవసరం ఉంటుందని ఆయన వివరించారు. ఇది ఐటీ సేవల రంగానికి భారీ అవకాశమని పేర్కొన్నారు. ఫిజికల్ ఏఐ ఒక ట్రిలియన్ డాలర్ల అవకాశం. వివిధ పరిశ్రమల్లో పరిష్కారాలను అభివృద్ధి చేయడం, ప్రూఫ్ ఆఫ్ కాన్సెప్ట్‌లు నిర్మించడం, అమలు చేయడం వంటి సేవలకు కనీసం 100 బిలియన్ డాలర్లు ఖర్చవుతాయని తెలిపారు.

ఇటీవలి కాలంలో సాఫ్ట్‌వేర్ కంపెనీల షేర్లలో భారీ అమ్మకాలు చోటుచేసుకోవడాన్ని ఆయన అతిశయోక్తిగా అభివర్ణించారు. వాస్తవ ప్రపంచంలో సంక్లిష్టతలు అధికంగా ఉన్నందున సంస్థలు పాత వ్యవస్థలను ఒకేసారి ఏఐతో భర్తీ చేయలేవని ఆయన స్పష్టం చేశారు. సాంకేతిక పరిజ్ఞానం అభివృద్ధి, వేగం, సంస్థల్లో దాని అమలు మధ్య గల వ్యత్యాసమే ప్రధాన సవాలుగా మారుతుందని విజయకుమార్ అభిప్రాయపడ్డారు.