Haier HQLED P7 Pro | హైయ‌ర్ నుంచి కొత్త ఎల్ఈడీ స్మార్ట్ టీవీలు.. ధ‌ర త‌క్కువ‌, ఏఐ ఫీచ‌ర్లు..

Haier HQLED P7 Pro | భారత మార్కెట్లో హోమ్ ఎంటర్‌టైన్‌మెంట్ విభాగాన్ని మరింత బలోపేతం చేస్తూ హైయ‌ర్ అప్ల‌యెన్సెస్ ఇండియా తన కొత్త హెచ్‌క్యూఎల్ఈడీ పీ7 ప్రో సిరీస్ స్మార్ట్ టీవీలను విడుదల చేసింది. ఆధునిక డిస్‌ప్లే టెక్నాలజీ, ఏఐ ఆధారిత పిక్చర్ ప్రాసెసింగ్, గేమింగ్ ఫీచర్లు, గూగుల్ టీవీతో కూడిన ఈ కొత్త సిరీస్ వినియోగదారులకు మరింత మెరుగైన వినోద అనుభవాన్ని అందించేందుకు సిద్ధ‌మైంది. హైయర్ హెచ్‌క్యూఎల్ఈడీ పీ7 ప్రో సిరీస్‌లో కంపెనీ సొంత హెచ్‌క్యూఎల్ఈడీ డిస్‌ప్లే టెక్నాలజీని ఉపయోగించింది. ఇది గరిష్ఠంగా 93 శాతం డీసీఐ-పీ3 కలర్ గామట్‌కు మద్దతు ఇస్తూ మ‌రిన్ని విస్తృతమైన రంగులను చూపిస్తుంది. 50 ఇంచులు, అంతకంటే పెద్ద సైజు డిస్‌ప్లే క‌లిగిన మోడళ్లలో డాల్బీ విజన్, హెచ్‌డీఆర్10 ప్ల‌స్ సపోర్ట్ ను ఇచ్చారు. దీంతో వివిధ లైటింగ్ పరిస్థితుల్లో మెరుగైన కాంట్రాస్ట్, బ్రైట్‌నెస్ కంట్రోల్, స్పష్టమైన డిటెయిల్స్‌ కనిపిస్తాయి.

అద్భుత‌మైన ఆడియో, జెమినీ ఏఐ..

ఆడియో విభాగంలో 50 వాట్ల 2.1 ఛానల్ స్పీకర్ సిస్టమ్‌ను అందించారు. 55 ఇంచులు, అంతకంటే పెద్ద సైజు మోడళ్లలో ఇంటిగ్రేటెడ్ సబ్‌వూఫర్ కూడా ఉంటుంది. దీని ద్వారా డీప్ బాస్, స్పష్టమైన వాయిస్‌లు, సమతుల్యమైన సౌండ్ అనుభవం లభిస్తుంది. అలాగే డాల్బీ అట్మాస్, టోటల్ సోనిక్స్ ఆడియో టెక్నాలజీల మద్దతు కూడా ఉంది. ఇవి మల్టీ-లేయర్డ్, స్పేషియల్ సౌండ్ అనుభవాన్ని అందిస్తాయి. ఈ స్మార్ట్ టీవీలు గూగుల్ టీవీ ప్లాట్‌ఫామ్‌పై పనిచేస్తాయి. ఇందులో జెమినీ ఏఐ ఇంటిగ్రేషన్‌ను అందించారు. దీని సహాయంతో వాయిస్ ఆధారిత సెర్చ్, కంటెంట్ డిస్కవరీ, యాప్‌లలో సెర్చింగ్ వంటి ఫీచర్లను ఉపయోగించుకోవచ్చు. హ్యాండ్స్-ఫ్రీ వాయిస్ కంట్రోల్ ద్వారా టీవీ నావిగేషన్, సెట్టింగ్స్ యాక్సెస్ కూడా చేయవచ్చు. పిక్చర్ క్వాలిటీని మెరుగుపరిచేందుకు ఏఐ పిక్చర్ క్వాలిటీ ఫీచర్లను అందించారు. ఇందులో ఏఐ హెచ్‌డీఆర్ ఎన్‌హాన్సర్, ఏఐ కలర్ బూస్ట్, ఏఐ మోషన్, ఏఐ నాయిస్ రిడక్షన్ వంటి టెక్నాలజీలు ఉన్నాయి. ఇవి కంటెంట్ రకాన్ని బట్టి బ్రైట్‌నెస్, రంగులు, మోషన్, నాయిస్ స్థాయిలను రియల్ టైమ్‌లో అడ్జ‌స్ట్‌ చేస్తాయి.

గేమింగ్ ప్రియుల కోసం..

గేమింగ్ ప్రియుల కోసం 120హెడ్జ్ డీఎల్‌జీ సపోర్ట్, ఎంఈఎంసీ, వీఆర్‌ఆర్ (వేరియబుల్ రిఫ్రెష్ రేట్), ఏఎల్‌ఎల్‌ఎమ్ (ఆటో లో లేటెన్సీ మోడ్), గేమింగ్ బార్ వంటి ఫీచర్లను అందించారు. దీంతో వేగవంతమైన గేమ్‌ప్లే సమయంలో మరింత స్మూత్ అనుభవం లభిస్తుంది. హెచ్‌క్యూఎల్ఈడీ పీ7 ప్రో సిరీస్‌లో 2జీబీ ర్యామ్, 32జీబీ ఇంటర్నల్ స్టోరేజ్ ఉన్నాయి. కనెక్టివిటీ పరంగా హైకాస్ట్ స్క్రీన్ మిర్ర‌రింగ్, బ్లూటూత్ 5.1, వై-ఫై, బ్లూటూత్ స్పీకర్ మోడ్ వంటి ఫీచర్లు అందుబాటులో ఉన్నాయి. డిజైన్ పరంగా స్లిమ్-బెజెల్ యూనిబాడీ డిజైన్‌ను ఉపయోగించారు. కళ్లపై ఒత్తిడిని తగ్గించేందుకు టీయూవీ రైన్‌ల్యాండ్ సర్టిఫైడ్ లో బ్లూ లైట్ టెక్నాలజీని కూడా అందించారు.

ధ‌ర ఎంతంటే..?

ఈ సిరీస్ 43, 50, 55, 65, 75 ఇంచుల స్క్రీన్ సైజుల్లో అందుబాటులోకి వచ్చింది. 43 ఇంచుల మోడల్ ధర రూ.35,990 ఉండ‌గా, 50 ఇంచుల మోడల్ ధ‌ర‌ రూ.43,490గా ఉంది. 55 ఇంచుల మోడల్ ధ‌ర‌ను రూ.49,990గా నిర్ణయించారు. 65 ఇంచుల మోడల్ ధర రూ.67,990 ఉండ‌గా, 75 ఇంచుల మోడల్ ధర రూ.90,990గా ఉంది. ఈ టీవీలు దేశవ్యాప్తంగా రిటైల్ స్టోర్లలో అందుబాటులో ఉన్నాయి. కంపెనీ వీటిపై 3 సంవత్సరాల వారంటీని కూడా అందిస్తోంది.