GST Collections | సెప్టెంబర్‌లో జీఎస్‌టీ వసూళ్లు రూ.2.04 లక్షల కోట్లు.. 14.7 శాతం వృద్ధి..

GST Collections | సెప్టెంబర్ లో వస్తు, సేవల పన్ను (జీఎస్‌టీ) వసూళ్లు గణనీయమైన వృద్ధిని నమోదు చేశాయి. గురువారం విడుదలైన అధికారిక గణాంకాల ప్రకారం, సెప్టెంబర్‌లో స్థూల జీఎస్‌టీ వసూళ్లు ఏడాది ప్రాతిపదికన 14.7 శాతం పెరిగి రూ.2.04 లక్షల కోట్లకు చేరుకున్నాయి. దేశీయంగా వసూలైన స్థూల జీఎస్‌టీ ఆదాయం రూ.1.38 లక్షల కోట్లుగా నమోదైంది. ఇది గతేడాది ఇదే నెలతో పోలిస్తే 10.1 శాతం వృద్ధిని నమోదు చేసింది. దిగుమతులపై వచ్చిన జీఎస్‌టీ ఆదాయం 25.9 శాతం పెరిగి సెప్టెంబర్‌లో రూ.65,525 కోట్లకు చేరుకుంది.

త‌గ్గిన జీఎస్టీ రీఫండ్లు..

మరోవైపు, సెప్టెంబర్‌లో జీఎస్‌టీ రీఫండ్లు రూ.27,001 కోట్లకు తగ్గాయి. గతేడాది ఇదే నెలతో పోలిస్తే రీఫండ్లలో 3 శాతం తగ్గుదల నమోదైంది. రీఫండ్లను మినహాయించిన తర్వాత సెప్టెంబర్‌లో నికర జీఎస్‌టీ ఆదాయం 18.1 శాతం పెరిగి రూ.1.77 లక్షల కోట్లకు చేరుకుంది. ఈ విషయాన్ని కేంద్ర ప్రభుత్వ అధికారిక గణాంకాలు వెల్లడించాయి. 2026-27 ఆర్థిక సంవత్సరం తొలి ఆరు నెలల కాలంలో అంటే ఏప్రిల్ నుంచి సెప్టెంబర్ వరకు స్థూల జీఎస్‌టీ వసూళ్లు 11.6 శాతం పెరిగి రూ.12.46 లక్షల కోట్లకు పైగా నమోదయ్యాయి. ఇదే కాలంలో నికర జీఎస్‌టీ వసూళ్లు 10.4 శాతం పెరిగి రూ.10.66 లక్షల కోట్లకు పైగా చేరుకున్నాయి.