Lizard | జేఎన్‌టీయూ మంజీరా హాస్ట‌ల్ కూర‌లో బ‌ల్లి.. బాధ్యుల‌పై చ‌ర్య‌లకు విద్యార్థుల డిమాండ్‌

Lizard | త్రినేత్ర న్యూస్‌: హైదరాబాద్‌లోని జేఎన్‌టీయూ (JNTU) మంజీరా హాస్టల్ భోజనంలో బల్లి (Lizard) కనిపించడం తీవ్ర కలకలం రేపింది. గ‌త రాత్రి మంజీరా బాయ్స్‌ హాస్టల్‌లో (Manjeera Boys Hostel) విద్యార్థులకు రాత్రి వ‌డ్డించిన కూరలో బల్లి పడి ఉండటాన్ని విద్యార్థులు గుర్తించారు. ఒక్క‌సారిగా భ‌యాందోళ‌న‌ల‌కు గురైన విద్యార్థులు.. మెస్ నిర్వహణ నిర్లక్ష్యంపై తీవ్ర ఆగ్రహం వ్యక్తం చేస్తూ ఆందోళనకు దిగారు. బాధ్యులైన మెస్ కాంట్రాక్ట‌ర్‌, నిర్వాహ‌కుల‌పై క‌ఠిన చ‌ర్య‌లు తీసుకోవాల‌ని డిమాండ్ చేశారు. హాస్ట‌ల్ విద్యార్థుల‌కు శుభ్ర‌మైన‌, నాణ్య‌మైన భోజ‌నం అందించేలా త‌క్ష‌ణ‌మే చ‌ర్య‌లు చేప‌ట్టాల‌న్నారు.

భోజ‌నం నాణ్య‌త‌, ప‌రిశుభ్ర‌త విష‌యంలో మెస్ (mess) నిర్వాహ‌కులు తీవ్ర నిర్ల‌క్ష్యం వ‌హిస్తున్నార‌ని విద్యార్థులు (Students Protest) మండిప‌డ్డారు. హాస్ట‌ల్ రూమ్ రెంట్లు, మెస్ చార్జీలు క్ర‌మం త‌ప్పుకుండా వ‌సూలు చేస్తున్న అధికారులు.. త‌మ‌కు అందించే భోజ‌నం నాణ్య‌త‌ను గాలికొదిలేశార‌ని ఆగ్ర‌హం వ్య‌క్తం చేశారు. గ‌తంలో ఆహార నాణ్య‌త‌పై ఎన్నిసార్లు అధికారుల దృష్టికి తీసుకెళ్లినా ఎలాంటి మార్పు లేద‌ని మండిప‌డుతున్నారు.