Dhanteras 2026 | ధన్‌తేరస్‌కు బంగారం కొంటున్నారా? ఈ ఐదు విషయాలు తప్పక తెలుసుకోవాల్సిందే..!

Dhanteras 2026 | ధన్‌తేరస్‌, దీపావళి పండుగల వేళ బంగారం కొనుగోలు చేయడం తరతరాలుగా వస్తున్న సంప్రదాయంగా వస్తోంది. ఈ సమయంలో ఆభరణాలు, బంగారు నాణేలు, బిస్కెట్లు కొనుగోలు చేసేందుకు చాలామంది ఆసక్తి చూపుతారు. పండుగ రద్దీలో తొందరపడి కొనుగోలు చేస్తే నాణ్యత, ధర, తరుగు, తిరిగి విక్రయించే సమయంలో నష్టపోయే అవకాశాలు ఉంటాయి. అందుకే బంగారం కొనేముందు కొన్ని ముఖ్యమైన విషయాలు తెలుసుకోవడం అవసరం. బ్యాంక్‌బజార్‌ సీఈఓ ఆదిల్‌ శెట్టి సూచిస్తున్న ఐదు నియమాలు ఏంటో తెలుసుకుందాం..!

నమ్మకమైన విక్రేత దగ్గరే కొనండి..

బంగారం కొనుగోలు చేసేటప్పుడు ముందుగా విక్రేత విశ్వసనీయతను పరిశీలించాలి. మంచి పేరున్న జువెలరీ సంస్థలు, బీఐఎస్‌ (BIS) నిబంధనలకు అనుగుణంగా హాల్‌మార్క్‌ చేసిన బంగారాన్ని విక్రయించే దుకాణాలకు ప్రాధాన్యం ఇవ్వాలి. ధర, బరువు, స్వచ్ఛత, మేకింగ్‌ ఛార్జీల వివరాలను బిల్లులో స్పష్టంగా చూపించే విక్రేతను ఎంచుకోవాలి. పెద్ద జువెలరీ సంస్థలు సాధారణంగా బైబ్యాక్‌, ఎక్స్ఛేంజ్‌ సదుపాయాలు కల్పిస్తుంటాయి. ప్రతి సంస్థ నిబంధనలు ఒకేలా ఉండవు. కొనుగోలు చేసే ముందే వాటిని తెలుసుకోవాలి. వీలైనంత వరకు నగదు చెల్లింపులకు బదులుగా డిజిటల్‌ చెల్లింపులు లేదా బ్యాంకింగ్‌ మార్గాలను ఉపయోగించాలి. దీనివల్ల లావాదేవీకి సంబంధించిన రికార్డు అందుబాటులో ఉంటుంది.

హాల్‌మార్క్‌ చెక్‌ చేయాల్సిందే..

బంగారం విలువను నిర్ణయించడంలో దాని స్వచ్ఛత కీలకం. అందుకే ఆభరణం కొనుగోలు చేసే ముందు బీఐఎస్‌ హాల్‌మార్క్‌ ఉందో లేదో తప్పనిసరిగా చూడాలి. హాల్‌మార్క్‌ చేసిన బంగారంపై బీఐఎస్‌ గుర్తుతో పాటు స్వచ్ఛత స్థాయి, ఆ ఆభరణానికి సంబంధించిన ఆరు అంకెల హెచ్‌యూఐడీ (Hallmark Unique Identification) నంబర్‌ ఉంటాయి. ఉదాహరణకు 22 క్యారెట్ల బంగారం అంటే 91.6 శాతం స్వచ్ఛమైన బంగారం కాగా, 24 క్యారెట్లు సాధారణంగా 99.9 శాతం స్వచ్ఛతను సూచిస్తాయి. ఆభరణాల తయారీకి అవసరమైన మన్నిక కోసం ఇతర లోహాలను కలుపుతారు కాబట్టి వాటి క్యారెట్‌ స్థాయి తక్కువగా ఉంటుంది. హెచ్‌యూఐడీ నంబర్‌ను బీఐఎస్‌ కేర్‌ యాప్‌ ద్వారా తనిఖీ చేయవచ్చు. దీనివల్ల హాల్‌మార్క్‌ వివరాలను ధ్రువీకరించుకునే అవకాశం ఉంటుంది. మార్కెట్‌ ధరతో పోలిస్తే అసాధారణంగా తక్కువ ధరకు బంగారం ఇస్తామని చెప్పే గుర్తింపు లేని విక్రేతల విషయంలో అప్రమత్తంగా ఉండాలి.

బంగారం ధరతోపాటు అదనపు ఛార్జీలను తెలుసుకోండి

బంగారం ధరలు అంతర్జాతీయ మార్కెట్‌ పరిణామాలు, డాలర్‌తో రూపాయి మారకం విలువ, దేశీయ డిమాండ్‌ వంటి అంశాల ఆధారంగా రోజువారీగా మారుతుంటాయి. సాధారణంగా ప్రకటించే ధర 24 క్యారెట్ల బంగారానికి సంబంధించినదై ఉండవచ్చు. కానీ మీరు కొనుగోలు చేసే ఆభరణం 22 క్యారెట్లదైతే దాని స్వచ్ఛతకు అనుగుణంగా ధర లెక్కిస్తారు. తుది బిల్లులో బంగారం విలువతోపాటు మేకింగ్‌ ఛార్జీలు, వర్తించే ఇతర ఛార్జీలు, జీఎస్టీ కూడా ఉంటాయి. ప్రస్తుతం బంగారు ఆభరణాలు, నాణేలపై 3 శాతం జీఎస్టీ వర్తిస్తుంది. మేకింగ్‌ ఛార్జీలపై వర్తించే పన్ను లెక్కింపు కూడా బిల్లులో ఎలా చూపించారో పరిశీలించాలి. ముఖ్యంగా మేకింగ్‌ ఛార్జీల విషయంలో జాగ్రత్త అవసరం. చేతితో తయారుచేసిన డిజైనర్‌ ఆభరణాలకు ఈ ఛార్జీలు ఎక్కువగా ఉండవచ్చు. బంగారు నాణేలు, బిస్కెట్లలో సాధారణంగా తయారీ ఛార్జీలు తక్కువగా ఉంటాయి. కాబట్టి పెట్టుబడి కోసమే బంగారం కొనాలనుకుంటే ఆభరణాల కంటే నాణేలు లేదా బిస్కెట్ల ధర, అదనపు ఛార్జీలను పోల్చి చూడాలి. ఒకే బరువు, స్వచ్ఛత ఉన్న బంగారానికి వేర్వేరు దుకాణాలు ఎంత వసూలు చేస్తున్నాయో తెలుసుకోవడం మంచిది.

బైబ్యాక్‌, ఎక్స్ఛేంజ్‌ నిబంధనలు ముందే తెలుసుకోండి

బంగారం కొనుగోలు చేసే సమయంలో దాన్ని భవిష్యత్తులో తిరిగి విక్రయించాల్సి రావచ్చు లేదా కొత్త ఆభరణాలతో మార్చుకోవాల్సి రావచ్చు. అందువల్ల విక్రేత బైబ్యాక్‌, ఎక్స్ఛేంజ్‌ విధానాలను ముందుగానే తెలుసుకోవాలి. కొన్ని దుకాణాలు బంగారం తిరిగి కొనుగోలు చేసే సమయంలో స్వచ్ఛత పరీక్ష, ఇతర నిబంధనల పేరుతో నిర్దిష్ట మొత్తాన్ని తగ్గించవచ్చు. మరికొన్ని సంస్థలు తమ దగ్గర కొనుగోలు చేసిన ఆభరణాలకే లేదా హాల్‌మార్క్‌ ఉన్న బంగారానికే ఎక్స్ఛేంజ్‌ సదుపాయం కల్పించవచ్చు. కొన్ని సందర్భాల్లో రాళ్లు, ఇతర అలంకరణల విలువను బంగారం విలువ నుంచి మినహాయిస్తారు. కొన్ని విక్రేతల వద్ద బైబ్యాక్‌ సమయంలో 5 నుంచి 10 శాతం వరకు కోత ఉండవచ్చని ఆదిల్‌ శెట్టి సూచిస్తున్నారు. అయితే ఇది అన్ని దుకాణాలకు వర్తించే ఒకే విధమైన నియమం కాదు. విక్రేతను బట్టి, ఆభరణం రకం, స్వచ్ఛత, కొనుగోలు చేసిన సమయం వంటి అంశాల ఆధారంగా నిబంధనలు మారవచ్చు. కాబట్టి ఎంత కోత విధిస్తారు? మేకింగ్‌ ఛార్జీలు తిరిగి చెల్లిస్తారా? ఇతర దుకాణాల్లో కొనుగోలు చేసిన బంగారాన్ని తీసుకుంటారా? వంటి వివరాలను ముందుగానే అడిగి తెలుసుకోవాలి.

బిల్లు, హాల్‌మార్క్‌ సర్టిఫికెట్‌ దాచాల్సిందే..

బంగారం కొనుగోలు చేసిన తర్వాత బిల్లు, హాల్‌మార్క్‌ వివరాలను భద్రంగా ఉంచుకోవడం చాలా ముఖ్యం. చెల్లుబాటయ్యే కొనుగోలు బిల్లులో బంగారం బరువు, స్వచ్ఛత, గ్రాముకు ధర, మేకింగ్‌ ఛార్జీలు, పన్నులు వంటి వివరాలు ఉండాలి. హాల్‌మార్క్‌ వివరాలు, హెచ్‌యూఐడీ నంబర్‌ను కూడా దాచాల్సిందే. భవిష్యత్తులో బంగారాన్ని విక్రయించేటప్పుడు, ఎక్స్ఛేంజ్‌ చేసేటప్పుడు లేదా గోల్డ్‌ లోన్‌ తీసుకునేటప్పుడు ఈ పత్రాలు ఉపయోగపడతాయి. బిల్లు లేకపోతే కొనుగోలు వివరాలను నిరూపించడం కష్టమవుతుంది. అందుకే బిల్లు, సంబంధిత ధ్రువపత్రాల భౌతిక ప్రతులతోపాటు డిజిటల్‌ కాపీలను కూడా భద్రపరచుకోవాలని నిపుణులు సూచిస్తున్నారు. ధన్‌తేరస్‌, దీపావళి వేళ బంగారం కొనడం సంప్రదాయమే అయినా, అది ఆర్థికపరమైన నిర్ణయం కూడా. కేవలం పండుగ ఆఫర్లు, డిస్కౌంట్లను చూసి కొనుగోలు చేయకుండా బంగారం స్వచ్ఛత, తుది ధర, అదనపు ఛార్జీలు, తిరిగి విక్రయించే నిబంధనలను పరిశీలించాలని పేర్కొంటున్నారు.

Read Also :

Gold Rate | దీపావళి వేళ మళ్లీ మెరిసిన బంగారం.. ధరలు ఎంత పెరిగాయంటే..?

ICICI Bank | ఐసీఐసీఐ బ్యాంక్ గుడ్‌న్యూస్.. ఎఫ్‌డీలపై వడ్డీ రేట్లు పెంపు..