Gold Reserves Of India | బంగారం నిల్వ‌లు అత్య‌ధికంగా క‌లిగిన దేశాలు ఇవే.. భారత్ వద్ద ఎంత ఉందంటే..?

Gold Reserves Of India | ప్రపంచవ్యాప్తంగా అన్ని దేశాలకూ బంగారం అత్యంత కీలకమైన ఆస్తిగా కొనసాగుతోంది. ఆర్థిక అనిశ్చితి, ద్రవ్యోల్బణం, కరెన్సీ ఊగిసలాటలు, భౌగోళిక రాజకీయ ఉద్రిక్తతల సమయంలో బంగారం సుర‌క్షిత‌మైన పెట్టుబడిగా భావించబడుతోంది. ఈ కారణంగా కేంద్ర బ్యాంకులు బంగారంపై ఎక్కువగా ఆధారపడుతున్నాయి. ప్రపంచవ్యాప్తంగా ఇప్పటివరకు తవ్వబడిన మొత్తం బంగారంలో సుమారు 20 శాతం కేంద్ర బ్యాంకుల వద్దనే ఉంది. బంగారు నిల్వలపై సమాచారం International Monetary Fund (IMF) కు చెందిన ఇంటర్నేషనల్ ఫైనాన్షియల్ స్టాటిస్టిక్స్ (IFS), దేశాల అధికారిక ప్రకటనల ఆధారంగా సేకరించబడుతుంది. దేశాలవారీగా బంగారం పరిమాణం, కొనుగోలు-అమ్మకాల లావాదేవీలు, మొత్తం విదేశీ నిల్వల్లో బంగారం వాటా వంటి అంశాలు ఇందులో ప్రతిబింబిస్తాయి.

అమెరికా టాప్‌..

2026 నాటికి బంగారం మరోసారి ప్రపంచంలోనే అత్యంత నమ్మకమైన ఆస్తిగా నిలిచింది. ధరలు గణనీయంగా పెరగడంతో, అనేక దేశాలు తమ ఆర్థిక వ్యవస్థలను రక్షించుకోవడానికి బంగారు నిల్వలను పెంచుతున్నాయి. World Gold Council IMF డేటా, అధికారిక నివేదికల ఆధారంగా దేశాలవారీ బంగారు నిల్వలను తరచుగా నవీకరిస్తారు. కేంద్ర బ్యాంకులు నిరంతరం బంగారం కొనుగోలు-అమ్మకాలు చేస్తుండటంతో ర్యాంకులు కొంతమేర మారుతుంటాయి. ఈ క్ర‌మంలోనే ప్ర‌స్తుతం అమెరికా వ‌ద్ద 8133 ట‌న్నుల‌కు పైగా బంగారం ఉండ‌గా ప్రపంచంలోనే అత్య‌ధిక స్థాయిలో బంగారం నిల్వ‌లు క‌లిగిన దేశంగా అమెరికా నిలిచింది. అమెరికాలో బంగారం ఎక్కువ‌గా ఫోర్ట్ నాక్స్‌, న్యూయార్క్ ఫెడ‌ర‌ల్ రిజ‌ర్వ్ వంటి సంస్థ‌ల వ‌ద్ద ఉంద‌ని నివేదిక‌లు చెబుతున్నాయి.

భార‌త్ వ‌ద్ద ఎంతంటే..?

ఇక అమెరికా త‌రువాత రెండు, మూడు, నాలుగు స్థానాల‌లో వ‌రుస‌గా జ‌ర్మ‌నీ, ఇటలీ, ఫ్రాన్స్‌లు నిలిచాయి. ఈ దేశాల్లోనూ అత్య‌ధిక స్థాయిలో బంగారం నిల్వ‌లు ఉన్నాయి. జ‌ర్మ‌నీ వ‌ద్ద 3350 ట‌న్నుల బంగారం ఉండ‌గా, ఇట‌లీ వ‌ద్ద 2451 టన్నుల బంగారం ఉంది. ఫ్రాన్స్ 2437 ట‌న్నుల బంగారాన్ని క‌లిగి ఉంది. అలాగే ఆ త‌రువాతి స్థానాల్లో వ‌రుస‌గా ర‌ష్యా (2329 టన్నులు), చైనా (2303), భార‌త్ (880), జ‌పాన్ (845), ట‌ర్కీ (641), నెద‌ర్లాండ్స్ (612 ట‌న్నులు) నిలిచాయి. అయితే ఆసియాలో చైనా, భార‌త్‌, జ‌పాన్ దేశాలు ప్ర‌స్తుతం ట్రంప్ చర్య‌ల కార‌ణంగా డాల‌ర్‌పై ఆధార ప‌డ‌డాన్ని త‌గ్గించుకుంటున్నాయి. అందులో భాగంగానే ఆయా దేశాలు బంగారు నిల్వ‌ల‌ను పెంచుకుంటున్నాయి. ఈ క్ర‌మంలోనే అనేక దేశాల‌కు చెందిన కేంద్ర బ్యాంకులు గ‌తంలో ఎన్న‌డూ లేని విధంగా బంగారం కొనుగోళ్ల‌ను పెంచాయి. బంగారం ధ‌ర‌లు పెరిగేందుకు ఇది కూడా ఒక కార‌ణ‌మ‌ని విశ్లేష‌కులు చెబుతున్నారు.