Union Budget 2026 | బడ్జెట్ 2026: బయోఫార్మా, SMEలకు భారీ కేటాయింపులు – కీలక ప్రకటనలు ఇవే

Union Budget 2026 | కేంద్ర బడ్జెట్ 2026 ప్రసంగంలో ఆర్థిక మంత్రి నిర్మలా సీతారామన్ పారిశ్రామిక రంగానికి, ముఖ్యంగా ఫార్మా, చిన్న పరిశ్రమలకు (MSME) పెద్దపీట వేశారు. దేశీయ తయారీ రంగాన్ని బలోపేతం చేయడం, స్వయం సమృద్ధి సాధించడమే లక్ష్యంగా పలు కీలక పథకాలను ప్రకటించారు.

ఆరు రంగాల్లో కీలక జోక్యం – స్వయం సమృద్ధే లక్ష్యం

ప్రభుత్వ విధానాల్లో 'స్వయం సమృద్ధి' (Self-reliance) కేంద్ర బిందువుగా ఉందని ఆర్థిక మంత్రి స్పష్టం చేశారు. బలమైన దేశీయ తయారీ రంగాన్ని నిర్మించడం, ఇంధన భద్రతను మెరుగుపరచడం, దిగుమతులపై ఆధారపడటాన్ని తగ్గించడంపై ప్రభుత్వం దృష్టి సారించింది.

ఈ లక్ష్యాల కోసం 6 కీలక రంగాల్లో ప్రభుత్వం జోక్యం చేసుకుంటుందని కేంద్ర మంత్రి తెలిపారు.

ఫలితాలు: ఉద్యోగాల కల్పన, వ్యవసాయ ఉత్పాదకత పెంపు, గృహాల కొనుగోలు శక్తిని పెంచే సంస్కరణల వల్ల భారత్ సగటున 7 శాతం వృద్ధి రేటును సాధించిందని, పేదరికం తగ్గిందని ఆమె పేర్కొన్నారు.

'బయోఫార్మా శక్తి'కి రూ.10,000 కోట్లు

భారతదేశాన్ని ప్రపంచ బయోఫార్మా తయారీ హబ్‌గా (Global Biopharma Hub) తీర్చిదిద్దేందుకు 'బయోఫార్మా శక్తి' (Biopharma Shakti) అనే కొత్త కార్యక్రమాన్ని మంత్రి ప్రకటించారు. దీని కోసం రాబోయే ఐదేళ్లలో రూ10,000 కోట్లు కేటాయిస్తున్నట్లు తెలిపారు.

MSME(చిన్న, మధ్య తరహా పరిశ్రమలు)కు ఊతమిచ్చేలా ఆర్థిక మంత్రి పలు వరాలు ప్రకటించారు.

SME గ్రోత్ ఫండ్: చిన్న, మధ్య తరహా పరిశ్రమల కోసం ప్రత్యేకంగా రూ.10,000 కోట్ల నిధిని (SME Growth Fund) ఏర్పాటు చేయనున్నారు.

సూక్ష్మ పరిశ్రమలకు మద్దతు: మైక్రో ఎంటర్‌ప్రైజెస్ (Micro Enterprises) కోసం రూ.2,000 కోట్ల నిధిని ప్రకటించారు.

లిక్విడిటీ మద్దతు: MSMEలకు నగదు లభ్యత (Liquidity) పెంచేందుకు TReDS ప్లాట్‌ఫామ్ ద్వారా సెటిల్మెంట్లను తప్పనిసరి చేశారు.

టెక్స్‌టైల్స్, ఇతర ముఖ్యాంశాలు

నేషనల్ ఫైబర్ స్కీమ్: జౌళి రంగాన్ని ప్రోత్సహించేందుకు 'నేషనల్ ఫైబర్ స్కీమ్'ను ప్రతిపాదించారు.

స్కిల్ డెవలప్‌మెంట్: టెక్స్టైల్ రంగంలో నైపుణ్యాభివృద్ధి (Skilling system) కోసం కొత్త ప్రణాళికను రూపొందించనున్నారు.

రేర్ ఎర్త్ కారిడార్లు: దేశంలో 3 'రేర్ ఎర్త్ కారిడార్ల'ను (Rare Earth Corridors) ఏర్పాటు చేయనున్నారు.