Cognizant | ఉద్యోగుల‌కు గుడ్ న్యూస్‌.. 25వేల మందిని రిక్రూట్ చేసుకోనున్న కాగ్నిజెంట్‌

Cognizant | ఐటీ రంగంలో లేఆఫ్స్ కొన‌సాగుతున్న వేళ‌.. అమెరికాకు చెందిన ఐటీ సేవ‌ల సంస్థ కాగ్నిజెంట్ (Cognizant) శుభ‌వార్త చెప్పింది. ప్ర‌స్తుత ఏడాది 25 వేల మంది ఫ్రెష‌ర్స్‌ను (freshers) నియ‌మించుకోనున్న‌ట్లు ప్ర‌క‌టించింది. 2025లో చేపట్టిన 20,000 నియామకాలతో పోలిస్తే ఇది 20 శాతం అధికం. ఈ విష‌యాన్ని కంపెనీ సీఈవో రవి కుమార్‌ ఎస్ అధికారికంగా ప్ర‌క‌టించారు.

"ఫ్రెష‌ర్స్‌ను అధిక సంఖ్య‌లో చేర్చుకుంటున్నాం. 2025లో దాదాపు 20వేల మంది ఫ్రెష‌ర్స్‌ను తీసుకున్నాం. ప్ర‌స్తుత ఏడాదికి అది 20 శాతం పెంచాల‌ని ప్లాన్ చేస్తున్నాం. 2026లో 24వేల నుంచి 25 వేల మందిని రిక్రూట్ చేసుకోవ‌డం మాకు చాలా సంతోషంగా ఉంది" అని ఆయ‌న తెలిపారు. కొత్తగా నియమించుకునే వారిలో ఏఐ టెక్నాలజీపై మంచి పట్టున్న వారిని తీసుకోనున్నట్టు చెప్పారు. నూతన టెక్నాలజీ సేవలకు పెరుగుతున్న డిమాండ్‌ను దృష్టిలో పెట్టుకొని వ్యూహాత్మకంగా అడుగులు వేస్తున్నట్టు తెలిపారు. అంతేకాదు, గతేడాది కంపెనీ ఆదాయంలో 6.4 శాతం వృద్ధి నమోదైన‌ట్లు ఆయ‌న వెల్ల‌డించారు. ప్రస్తుతం సంస్థలో 3,51,600 మంది ఉద్యోగులు ఉన్నారు. ఈ ప్ర‌క‌ట‌న‌తో ఐటీ ఉద్యోగులు సంతోషం వ్య‌క్తం చేస్తున్నారు.