Amazon | అమెజాన్‌లో ఇక 1 గంట‌లోనే డెలివ‌రీ.. ముందుగా అక్క‌డే..

Amazon | అమెరికాలో తన వేగవంతమైన డెలివరీ సేవలను మరింత విస్తరించేందుకు అమెజాన్ కొత్తగా 1 గంట , 3 గంటల డెలివరీ ఆప్ష‌న్‌లను ప్రారంభించింది. రోజువారీ అవసరాలు, సాధారణ వస్తువులను త్వరగా వినియోగదారులకు అందించేందుకు ఈ చర్య తీసుకున్నట్లు సంస్థ తెలిపింది. ఇప్పటికే ఉన్న సేమ్ డే డెలివరీ నెట్‌వర్క్‌పై ఆధారపడి ఈ సేవను విస్తరిస్తూ, వివిధ నగరాలు, పట్టణాలకు ఈ సౌకర్యాన్ని అందుబాటులోకి తీసుకొస్తోంది. అమెజాన్ ప్రకారం, అమెరికాలోని వినియోగదారులు ఇప్పుడు 90వేల‌కు పైగా ఉత్పత్తుల జాబితా నుంచి ఆర్డర్ చేసి 3 గంటల లోపే డెలివరీ పొందవచ్చు. ఇందులో గృహావసరాలైన పేపర్ ఉత్పత్తులు, శుభ్రపరిచే వస్తువులు, ఆరోగ్య, సౌందర్య ఉత్పత్తులు, ఓవర్-ది-కౌంటర్ ఔషధాలు మాత్రమే కాకుండా ఎలక్ట్రానిక్స్, బొమ్మలు, దుస్తులు, గృహోపకరణాలు కూడా ఉన్నాయి. అదనంగా పిల్లల కార్ సీట్లు, హ్యూమిడిఫైయర్లు, ఎయిర్ మ్యాట్రెస్‌లు వంటి ప్రత్యేక అవసరాల వస్తువులు కూడా ఇందులో భాగంగా ఉన్నాయి.

కావ‌ల్సిన డెలివ‌రీ ఆప్ష‌న్‌ను ఎంచుకోవ‌చ్చు..

ఈ సేవ వారంలో ఏడు రోజులూ అందుబాటులో ఉంటుందని, భవిష్యత్తులో మరిన్ని ప్రాంతాలకు విస్తరించనున్నట్లు సంస్థ తెలిపింది. వినియోగదారులు అమెజాన్ వెబ్‌సైట్‌లో Get It Fast పేజీ ద్వారా ఈ సేవ అందుబాటులో ఉందో లేదో చెక్‌ చేసుకోవచ్చు. అర్హత ఉన్న ఉత్పత్తులపై 1 గంటలో లేదా 3 గంటల్లో వంటి లేబుళ్లు కనిపిస్తాయి. వినియోగదారులు ఫిల్టర్ ద్వారా తమకు కావాల్సిన వేగవంతమైన డెలివరీ ఆప్ష‌న్‌లను ఎంచుకోవచ్చు. స‌పోర్ట్‌ ఉన్న ప్రాంతాల్లో ప్రత్యేక స్టోర్‌ఫ్రంట్ కూడా అందుబాటులో ఉంది. ప్రస్తుతం 1 గంట డెలివరీ సేవ అమెరికాలోని లాస్ ఏంజెల్స్, చికాగో, ఓక్లహోమా సిటీ, నాష్‌విల్, హ్యూస్టన్, వాషింగ్టన్ డీసీ వంటి ప్రధాన నగరాల్లోనే కాకుండా డెస్ మోయిన్స్, బోయ్సీ, అమెరికన్ ఫోర్క్ వంటి చిన్న నగరాల్లో కూడా అందుబాటులో ఉంది. 3 గంటల డెలివరీ సేవ 2వేల‌కి పైగా నగరాలు, పట్టణాలలో ల‌భిస్తోంది. ఇందులో పెన్సిల్వేనియాలోని కార్న్‌వాల్, ఓక్లహోమాలోని హర్రా, లూసియానాలోని అరబీ వంటి ఉపనగరాలు కూడా ఉన్నాయి.

సేమ్ డే అయితే ఫ్రీ.. 1, 3 గంట‌ల డెలివ‌రీలకు చార్జిలు..

ధరల విషయంలో ప్రైమ్ సభ్యులు 1 గంటలో డెలివరీ కోసం 9.99 డాలర్లు (సుమారు రూ.900), 3 గంటలలో డెలివరీ కోసం 4.99 డాలర్లు (సుమారు రూ.400) చెల్లించాలి. ప్రైమ్ కాని వినియోగదారులు వరుసగా 19.99 డాలర్లు (సుమారు రూ.1,800), 14.99 డాలర్లు (సుమారు రూ.1,400) చెల్లించాల్సి ఉంటుంది. ప్రైమ్ సభ్యత్వంతో 35కు పైగా కేటగిరీలలో 300 మిలియన్లకు పైగా ఉత్పత్తులపై ఉచిత డెలివరీ లభిస్తుంది. అలాగే అనేక ఉత్పత్తులపై సేమ్ డే లేదా త‌రువాతి రోజు డెలివరీ సౌకర్యం కూడా ఉంటుంది. అర్హత ఉన్న ఆర్డర్లపై స్టాండర్డ్ సేమ్-డే డెలివరీ ఉచితంగానే కొనసాగుతుందని అమెజాన్ తెలిపింది. ఈ కొత్త సేవలు 2015లో ప్రారంభించిన అమెజాన్ సేమ్-డే డెలివరీ మౌలిక వసతుల ఆధారంగా పనిచేస్తాయి. సరుకు నిల్వ, చివరి దశ డెలివరీ ప్రక్రియలను సమగ్రంగా నిర్వహించే ఈ వ్యవస్థ, తరచుగా ఆర్డర్ అయ్యే వస్తువులను వినియోగదారులకు దగ్గరగా ఉంచే విధంగా ప్రిడిక్టివ్ ఇన్వెంటరీ ప్లేస్‌మెంట్ సాంకేతికతను ఉపయోగిస్తుంది. అదనంగా, అమెజాన్ కొన్ని ప్రాంతాల్లో అమెజాన్ నౌ అనే సేవను పరీక్షిస్తోంది. ఈ సేవ ద్వారా రోజువారీ అవసరాల వస్తువులు, త్వరగా పాడయ్యే కిరాణా సరుకులను సుమారు 30 నిమిషాల్లో డెలివరీ చేయాలని లక్ష్యంగా పెట్టుకుంది.