Amazon Now | మరో 300కు పైగా ప్రాంతాల్లో అమెజాన్ నౌ.. మీ లోకేషన్‌లో ఉందా..?

Amazon Now | భారత్‌లో అత్యంత పెద్ద అల్ట్రా-ఫాస్ట్ డెలివరీ నెట్‌వర్క్‌ను ఏర్పాటు చేయనున్నట్లు అమెజాన్ ప్రకటించింది. తన క్విక్ కామర్స్ సేవ అమెజాన్ నౌ ను దేశవ్యాప్తంగా 300కు పైగా నగరాలకు విస్తరించిన‌ట్లు వెల్లడించింది. గత నెలలోనే అమెజాన్ నౌ సేవను 100 నగరాలకు విస్తరించినట్లు కంపెనీ ప్రకటించగా, ఇప్పుడు మరింత వేగంగా విస్తరణ చేపడుతోంది. ఈ మేర‌కు అమెజాన్ ఒక ప్ర‌క‌ట‌న విడుద‌ల చేసింది. అమెజాన్ ఇండియా చరిత్రలో అత్యంత వేగంగా అభివృద్ధి చెందుతున్న ఈ-కామర్స్ వ్యాపార విభాగంగా అమెజాన్ నౌ నిలిచింది. ప్రారంభమైనప్పటి నుంచి ప్రతి త్రైమాసికంలో ఆర్డర్ల సంఖ్య రెట్టింపవుతూ వస్తోందని కంపెనీ తెలిపింది. ఈ విస్తరణకు మద్దతుగా మైక్రో-ఫుల్‌ఫిల్‌మెంట్ సెంటర్లు, అర్బన్ ఫుల్‌ఫిల్‌మెంట్ సెంటర్ల నెట్‌వర్క్‌తో కూడిన ప్రత్యేక సరఫరా మౌలిక సదుపాయాలను అమెజాన్ మరింత విస్తరించనుంది.

40 ల‌క్ష‌ల‌కు పైగా ఉత్ప‌త్తులు..

అత్యవసరతను బట్టి బహుళ స్థాయి డెలివరీ మోడల్‌ను అందించేలా ఈ మౌలిక వసతులను రూపొందించారు. కొన్ని నిమిషాల నుంచి కొన్ని గంటల వ్యవధిలోనే కిరాణా సరుకులు, తాజా కూరగాయలు, ఫ్రోజన్ ఫుడ్, వ్యక్తిగత సంరక్షణ ఉత్పత్తులు, ఫ్యాషన్, బ్యూటీ ఉత్పత్తులు, చిన్న గృహోపకరణాలు, గృహ అవసరాల వస్తువులు సహా రోజువారీ అవసరాలకు సంబంధించిన వేలాది ఉత్పత్తులను డెలివరీ చేస్తున్నారు. అదే రోజు డెలివరీ కింద 10 లక్షలకు పైగా ఉత్పత్తులు అందుబాటులో ఉంటాయి. మరుసటి రోజు డెలివరీ కోసం 40 లక్షలకు పైగా ఉత్పత్తులు అందించనున్నారు. స్టాండర్డ్ ప్రైమ్ డెలివరీ ద్వారా మరో లక్షలాది ఉత్పత్తులను సాధారణ షిప్పింగ్ విధానంలో వినియోగదారులు పొందవచ్చు. ప్రస్తుతం అమెజాన్ నౌ సేవ బెంగళూరు, ఢిల్లీ-ఎన్‌సీఆర్, ముంబై, పుణే, హైదరాబాద్, అమృత్‌సర్, కొచ్చి సహా 15 మెట్రో, నాన్-మెట్రో నగరాల్లో సుమారు 5 కోట్ల మంది వినియోగదారులకు అందుబాటులో ఉంది.

ప్ర‌పంచ దేశాల‌కు విస్త‌ర‌ణ‌..

ఇటీవల భారత్‌లోని ఓ మైక్రో-ఫుల్‌ఫిల్‌మెంట్ సెంటర్‌ను సందర్శించిన అమెజాన్ సీఈఓ ఆండీ జాస్సీ, భారత మార్కెట్ కోసం అభివృద్ధి చేసిన ఈ మోడల్‌ను ప్రస్తుతం ప్రపంచంలోని పలు దేశాలకు విస్తరిస్తున్నట్లు తెలిపారు. తన పర్యటన సందర్భంగా జాస్సీ డెలివరీ భాగస్వాములు, ఉద్యోగులతో సమావేశమై అల్ట్రా-ఫాస్ట్ డెలివరీ వ్యవస్థకు మద్దతు ఇస్తున్న కార్యకలాపాల విధానాన్ని సమీక్షించారు. అయితే ఇంకా ఎక్కువ‌ నగరాల లక్ష్యాన్ని ఎప్పటికి చేరుకుంటామనే క‌చ్చితమైన టైమ్ ఫ్రేమ్‌ను కంపెనీ వెల్లడించలేదు. వ్యాపార విస్తరణతోపాటు అమెజాన్ తన భారత లాజిస్టిక్స్ నెట్‌వర్క్‌లో పనిచేస్తున్న వేలాది డెలివరీ అసోసియేట్ల కోసం సమ్మాన్ పేరుతో ప్రత్యేక సంక్షేమ కార్యక్రమాన్ని ప్రారంభించింది. అమెజాన్ ఇండియా ఇటీవల ప్రకటించిన 300 మిలియన్ డాలర్ల పెట్టుబడిలో భాగంగా ఈ కార్యక్రమానికి నిధులు సమకూరనున్నాయి. డెలివరీ అసోసియేట్ల పిల్లలకు విద్యా స్కాలర్‌షిప్‌లు, ఆర్థిక సమగ్రత కార్యక్రమాలు, ప్ర‌భుత్వ సంక్షేమ పథకాలలో నమోదు కోసం సహాయం, సమగ్ర ఆరోగ్య, జీవిత బీమా కవరేజ్, రహదారి భద్రతా కార్యక్రమాలు ఇందులో భాగంగా ఉంటాయి.

అలాగే ఆశ్రయ్ విశ్రాంతి కేంద్రాలను ఈ ఏడాది 250 ప్రాంతాలకు విస్తరించనున్నారు. ఈ కేంద్రాలు కేవలం అమెజాన్ ఉద్యోగులకే కాకుండా మొత్తం ఈ-కామర్స్ రంగంలోని డెలివరీ సిబ్బందికి అందుబాటులో ఉంటాయి. వినియోగదారులు తమ ప్రాంతంలో అమెజాన్ నౌ సేవ అందుబాటులో ఉందో లేదో తెలుసుకోవడానికి అమెజాన్ మొబైల్ యాప్‌ను ఓపెన్ చేయాలి. యాప్ హోమ్‌పేజ్ పైభాగంలో కనిపించే లైట్నింగ్ నౌ ఐకాన్ ద్వారా ఈ సేవను వినియోగించుకోవచ్చు.