Cyclone Arnab | సంక్రాంతికి పొంచి ఉన్న వాయుగండం.. నేడు తుఫానుగా మారే అవకాశం

trinethra.news : సంక్రాంతి పండుగ ముందు ద‌క్షిణాది రాష్ట్రాల‌కు వాయుగుండం (Low Pressure) ముప్పు పొంచి ఉన్న‌ది. నైరుతి బంగాళాఖాతంలో ఏర్ప‌డిన‌ వాయుగుండం.. తీవ్ర వాయుగుండంగా బ‌ల‌ప‌డింది. శుక్ర‌వారం అది తుఫానుగా బ‌ల‌ప‌డే అవ‌కాశం ఉంద‌ని భారత వాతావరణ విభాగం (IMD) తెలిపింది. శ్రీలంక తీరం వైపు దూసుకొస్తున్న‌ద‌ని వెల్ల‌డించింది. గురువారం సాయంత్రానికి కరైకల్‌ (పుదుచ్చేరి)కు 780, చెన్నైకి 940 కి.మీ. దూరంలో కేంద్రీకృతమై ఉంద‌ని వెల్ల‌డించింది.

ప‌రిస్థితులు అనుకూలిస్తే తీవ్ర వాయుగుండం తుఫానుగా రూపాంతరం చెందుంద‌ని ఐఎండీ అంచనా వేస్తున్న‌ది. ఒక‌వేళ అది తుఫానుగా మారితే దానికి ‘ఓర్ణబ్‌ (అర్ణబ్‌)’గా (Cyclone Arnab) నామకరణం చేయనున్నారు. ఓర్ణ‌బ్ అంటే స‌ముద్రం అని అర్ధం. ఈ పేరును బంగ్లాదేశ్‌ సూచించింది.

ఇది వాయవ్య దిశగా కదులుతూ శ్రీలంకలో పొట్టువిల్, ట్రింకోమలి మధ్యలో శుక్రవారం రాత్రి తీరం దాటే అవకాశముంది. దీని ప్రభావంతో శుక్ర, శనివారాల్లో తమిళనాడు, కేరళలోని కొన్ని ప్రాంతాల్లో భారీ నుంచి అతిభారీ వర్షాలు కురుస్తాయని అంచనా వేసింది. అదేవిధంగా ఆంధ్ర‌ప్ర‌దేశ్‌లోని దక్షిణ కోస్తా, రాయలసీమలోని కొన్ని ప్రాంతాల్లో తేలికపాటి నుంచి ఓ మోస్తరు వర్షాలు కురిసే అవకాశం ఉందని వాతావరణ కేంద్రం పేర్కొంది.