Basara Temple Reconstruction : 9 అంతస్తుల రాజగోపురం, పూర్తిగా రాతి కట్టడాలు.. బాసర ఆలయ పునర్నిర్మాణానికి బృహత్తర ప్రణాళిక

Basara Temple Reconstruction : త్రినేత్ర.న్యూస్ : దక్షిణ భారతదేశంలోనే అక్షరాభ్యాసాలకు ఆలవాలమైన, భక్తుల కొంగుబంగారమైన బాసర శ్రీ జ్ఞాన సరస్వతీ దేవస్థానం రూపురేఖలు మారనున్నాయి. వేదవ్యాస మహర్షితో ప్రతిష్టించబడిన ముగ్గురు అమ్మల (సరస్వతి, మహాలక్ష్మి, మహాకాళి) ఆలయం ఆగమ శాస్త్ర ఆచారాలకు అనుగుణంగా అద్భుతమైన కట్టడాలతో అభివృద్ధి చెందబోతోంది. వేల ఏళ్ల ఘన చరిత్ర కలిగిన ఈ ఆలయ పునర్నిర్మాణం కోసం రాష్ట్ర ప్రభుత్వం ఏకంగా రూ. 225 కోట్లను కేటాయించింది. సోమవారం ముఖ్యమంత్రి రేవంత్ రెడ్డి ఈ బృహత్తర పనులకు భూమిపూజ చేయనున్నారు.

పెరుగుతున్న భక్తుల రద్దీ.. కొత్త మాస్టర్ ప్లాన్

దక్షిణ గంగగా పిలిచే గోదావరి నదీ తీరంలో కొలువైన ఈ క్షేత్రానికి వసంత పంచమితో పాటు ఇతర పర్వదినాల్లో లక్షలాదిగా భక్తులు తరలివస్తుంటారు. తమ పిల్లలకు అక్షరాభ్యాసం చేయించేందుకు తెలుగు రాష్ట్రాల నుంచే కాకుండా పొరుగు రాష్ట్రాల నుంచి కూడా భక్తులు వస్తుంటారు. అయితే భక్తుల సంఖ్యకు తగినట్లుగా ఆలయంలో వసతులు లేకపోవడంతో తీవ్ర ఇబ్బందులు ఎదుర్కొంటున్నారు. దీనిని గమనించిన సీఎం రేవంత్ రెడ్డి.. ఆలయ సమగ్ర అభివృద్ధి కోసం ప్రత్యేక మాస్టర్ ప్లాన్ రూపొందించాలని అధికారులను ఆదేశించారు.

శృంగేరి పీఠాధిపతుల అనుమతితో..

పునర్నిర్మాణ పనులకు సంబంధించిన డిజైన్లు, మాస్టర్ ప్లాన్ రూపకల్పనలో అధికారులు శృంగేరి పీఠాధిపతుల సలహాలు, సూచనలు తీసుకున్నారు. గర్భాలయం, అర్ధ మండపం, రాజగోపురం, కోనేరు తదితర నిర్మాణాలకు సంబంధించి వారి అనుమతులు పొందిన తర్వాతే తుది ప్రణాళికను సిద్ధం చేశారు.

మాస్టర్ ప్లాన్ లోని ముఖ్యాంశాలు

మూడు రెట్లు పెరగనున్న విస్తీర్ణం: ప్రస్తుతం 20 వేల చదరపు అడుగులుగా ఉన్న ఆలయ ప్రాంగణాన్ని ఏకంగా 62 వేల చదరపు అడుగులకు (మూడు రెట్లు) పెంచుతున్నారు. 2 వేల చదరపు అడుగుల్లో ఉన్న గర్భాలయం, అర్ధ మండపాన్ని 5 వేల చదరపు అడుగులకు విస్తరిస్తున్నారు.

సువిశాల గోపురాలు: ఉత్తరం వైపున 9 అంతస్తుల రాజగోపురం, మిగిలిన మూడు దిక్కుల్లో 7 అంతస్తుల గోపురాలను నిర్మించనున్నారు.

మాడ వీధులు: ఆలయం చుట్టూ 33 అడుగుల వెడల్పుతో నాలుగు దిక్కులా విశాలమైన మాడ వీధులు, నూతనంగా ఉత్తర ద్వారం ఏర్పాటు కానున్నాయి.

పూర్తిగా కృష్ణ శిలలతో నిర్మాణాలు.. సకల వసతులు

ఆలయ పవిత్రత ఉట్టిపడేలా ప్రతి నిర్మాణాన్ని శిలలతోనే (రాతి కట్టడాలు) చేపట్టనున్నారు. భక్తుల సౌకర్యార్థం ప్రత్యేకంగా వసతులను ఏర్పాటు చేయనున్నారు.

క్యూ కాంప్లెక్స్: ఒకేసారి 6 వేల మంది భక్తులు వేచి ఉండేలా ఫీడింగ్ రూమ్స్, ఫుడ్ స్టాల్స్, బయో టాయిలెట్స్ తో కూడిన 70 వేల చదరపు అడుగుల భారీ క్యూ కాంప్లెక్స్.

ధ్యాన మందిరం: ఏకకాలంలో 200 మంది ప్రశాంతంగా కూర్చుని ధ్యానం చేసుకునేందుకు ప్రత్యేక మందిరం.

అన్నదానం, కోనేరు: 20 వేల చదరపు అడుగుల వైశాల్యంతో అధునాతన వంటశాల, భోజనశాలలు, ప్రసాద పంపిణీ కేంద్రం. వాస్తు ప్రకారం ఈశాన్య దిక్కున కోనేరు నిర్మాణం.

ఇతర సదుపాయాలు: తూర్పు దిక్కున అద్భుతమైన తోరణాలు, సమాచార కేంద్రం, భద్రత కోసం అండర్ పాస్, సోలార్ రూఫ్ టాప్ తో కూడిన విశాలమైన పార్కింగ్ స్థలం, హెల్త్ సెంటర్ ఏర్పాటు చేయనున్నారు. ఆలయ ప్రాంగణంలో పచ్చదనం కోసం పుష్పవనం, వెనుక భాగంలో భారీ వృక్షాలను పెంచనున్నారు.

గోదావరి పుష్కరాలకు సన్నద్ధం

వచ్చే ఏడాది (2027) జూన్‌లో గోదావరి నది పుష్కరాలు ప్రారంభం కానున్నాయి. ఈ సమయంలో పుణ్యస్నానాలు ఆచరించేందుకు, అమ్మవారిని దర్శించుకునేందుకు లక్షలాది మంది భక్తులు బాసరకు చేరుకుంటారు. పుష్కరాల నాటికి భక్తులకు ఎలాంటి ఇబ్బందులు తలెత్తకుండా, వారి విశ్వాసాలకు అనుగుణంగా అన్ని వసతులు కల్పించేలా పనులను వేగవంతం చేయాలని సీఎం రేవంత్ రెడ్డి అధికారులకు స్పష్టమైన ఆదేశాలు జారీ చేశారు.