Free Pizza Rejection | “ఆ చెత్త మీరే తినండి”.. ఫ్రీగా పిజ్జా ఇస్తానన్న కస్టమర్‌కు షాకిచ్చిన డెలివరీ బాయ్!

Free Pizza Rejection | త్రినేత్ర.న్యూస్ : డెలివరీ బాయ్స్ పడే కష్టాలు చూసి చాలా మంది కస్టమర్లు తమకు తోచిన విధంగా సాయం చేస్తుంటారు. కొందరు క్యాష్ టిప్ ఇస్తే.. మరికొందరు తాగడానికి వాటర్ బాటిల్, స్నాక్స్ లేదా ఫుడ్ ఆఫర్ చేస్తుంటారు. ఇలాగే వర్షంలో తడుస్తూ ఆర్డర్ తీసుకొచ్చిన ఒక డెలివరీ బాయ్‌పై ఓ కస్టమర్ ప్రేమ కురిపించబోయాడు. తన వద్ద ఉన్న ఒక ఫ్రీ పిజ్జాను అతనికి గిఫ్ట్‌గా ఇవ్వబోయాడు. కానీ ఆ డెలివరీ ఏజెంట్ ఇచ్చిన రిప్లై విన్నాక సదరు కస్టమర్‌కు మైండ్ బ్లాంక్ అయింది. సోషల్ మీడియాలో ఇప్పుడు ఈ టాపిక్ తెగ ట్రెండ్ అవుతోంది.

అసలేం జరిగిందంటే..?

ముకుల్ దేఖానే అనే ఎక్స్ యూజర్ ఇటీవల జొమాటో (Zomato) యాప్‌లో 'బై వన్ గెట్ వన్' (Buy 1 Get 1) ఆఫర్ కింద రెండు పిజ్జాలను ఆర్డర్ చేశాడు. నిజానికి అతనికి ఒక పిజ్జా మాత్రమే అవసరం. దాంతో బయట భారీ వర్షం పడుతున్నా లెక్కచేయకుండా కష్టపడి ఆర్డర్ తెచ్చిన డెలివరీ బాయ్‌కు ఆ రెండో పిజ్జాను ఇచ్చేయాలని డిసైడ్ అయ్యాడు.

ఆర్డర్ చేతికి రాగానే.. ఎంతో కృతజ్ఞతతో ఆ ఎక్స్‌ట్రా పిజ్జా బాక్స్‌ను డెలివరీ రైడర్‌కు అందిస్తూ.. "ఏక్ తుమ్హారే లియే" (ఇది నీకోసం) అని ముకుల్ చెప్పాడు. ఆ మాట వినగానే థాంక్యూ చెప్పి పిజ్జా తీసుకుంటాడని ముకుల్ అనుకున్నాడు. కానీ అక్కడ సీన్ రివర్స్ అయింది.

"నేను కేవలం ఇంటి అన్నమే తింటాను!"

ఆ పిజ్జా బాక్స్‌ను చూసిన డెలివరీ బాయ్.. ముకుల్ ఊహించని విధంగా చాలా స్ట్రెయిట్ ఫార్వర్డ్‌గా సమాధానమిచ్చాడు. ఆ పిజ్జాను తిరిగి కస్టమర్‌కే ఇచ్చేస్తూ.. "యే కచరా ఆప్ హీ ఖావో, మైన్ తో ఘర్ కా ఖానా ఖాతా హూన్" (ఈ చెత్తను మీరే తినండి, నేనైతే ఇంట్లో వండిన అన్నమే తింటాను) అని మొహం మీదే చెప్పేసి అక్కడి నుంచి వెళ్ళిపోయాడు.

ఈ ఊహించని ట్విస్ట్‌కు షాక్ అవ్వడం ముకుల్ వంతైంది. ఆ సమయంలో తన ముఖంలో ఎక్స్‌ప్రెషన్స్ ఎలా ఉండి ఉంటాయో ఊహించుకోవాలంటూ ముకుల్ ఈ ఫన్నీ ఇంటరాక్షన్‌ను ఎక్స్‌లో పోస్ట్ చేశాడు.

"నిన్న జొమాటోలో బై1గెట్1 పిజ్జా ఆర్డర్ ఇచ్చా. వర్షంలో తడుస్తూ వచ్చిన డెలివరీ బాయ్‌కు ఒక బాక్స్ ఇచ్చి 'ఇది నీకోసం' అన్నాను. అప్పుడు అతని ముఖంలో ఎక్స్‌ప్రెషన్ ప్రైస్‌లెస్. 'ఈ చెత్త మీరే తినండి, నేను ఇంటి భోజనమే తింటా' అని నాకే రిటర్న్ ఇచ్చాడు. అప్పుడు నా ముఖం ఎలా ఉందంటే.." అంటూ ముకుల్ రాసుకొచ్చాడు.

నెటిజన్ల రియాక్షన్.. "మాకు కూడా ఇలాగే జరిగింది బ్రో!"

ఈ పోస్ట్ కాస్తా సోషల్ మీడియాలో విపరీతంగా వైరల్ అవ్వడంతో నెటిజన్లు రకరకాలుగా స్పందిస్తున్నారు. డెలివరీ బాయ్ ఇచ్చిన రిప్లై చాలా బోల్డ్‌గా, హెల్తీగా ఉందంటూ కొందరు మెచ్చుకుంటున్నారు. జంక్ ఫుడ్‌ను చెత్త అని పిలవడంలో తప్పులేదని సపోర్ట్ చేస్తున్నారు.

మరికొందరు కస్టమర్లు తమకు ఎదురైన ఇలాంటి అనుభవాలను కామెంట్ల రూపంలో పంచుకుంటున్నారు. ఒక యూజర్ స్పందిస్తూ.. "ఒకసారి బర్గర్ కింగ్ పొరపాటున నాకు ఒక ఎక్స్‌ట్రా బర్గర్ పంపింది. దాన్ని డెలివరీ బాయ్‌కు ఇస్తే.. నేనేదో విషం ఇస్తున్నట్లు భయపడిపోయి వద్దని తిరస్కరించాడు" అని రాసుకొచ్చాడు.

ఇంకొక నెటిజన్ ప్రాక్టికల్ పాయింట్ లేవనెత్తుతూ.. "ఇలాంటి పిజ్జాలు, బర్గర్లు ఆఫర్ చేసేకంటే.. ఆ డెలివరీ బాయ్స్‌కు ఒక రూ.30 రూపాయలు క్యాష్ టిప్ (Cash Tip) రూపంలో ఇస్తే వాళ్లు చాలా సంతోషిస్తారు. ఎందుకంటే రోజంతా ఆర్డర్స్ డెలివరీ చేసే వారికి పెట్రోల్ ఖర్చులకైనా ఆ డబ్బు ఉపయోగపడుతుంది" అని సలహా ఇచ్చాడు.