KBC Sushil Kumar | కేబీసీలో రూ.5 కోట్ల‌ను గెలుచుకున్నాడు.. త‌రువాత అంతా పోయింది..

KBC Sushil Kumar | కౌన్ బనేగా క్రోర్పతి (కేబీసీ) షో గురించి అందరికీ తెలిసిందే. అప్పట్లో ఈ షోలో మొత్తం ప్రశ్నలకు సమాధానాలు చెబితే ఏకంగా రూ.1 కోటి గెలుచుకునే అవకాశం కల్పించారు. ఆ తరువాత క్రమంగా ఆ మొత్తాన్ని పెంచుతూ వచ్చారు. రూ.2, రూ.3, రూ.5 కోట్లు ఇలా పెంచారు. ఇటీవల నిర్వహించిన షోకు రూ.7 కోట్ల ప్రైజ్ మనీని ప్రకటించారు. అయితే కేబీసీ 5వ సీజన్లో బీహార్కు చెందిన సుశీల్ కుమార్ అనే వ్యక్తి మొత్తం అన్ని ప్రశ్నలకు సమాధానాలు చెప్పి అప్పట్లో రూ.5 కోట్ల ప్రైజ్ మనీని గెలుచుకున్నాడు. దీంతో ఆ సమయంలో అతను ఒక సెలబ్రిటీ అయ్యాడు. మీడియా సంస్థలు అతన్ని ఇంటర్వ్యూ చేసేందుకు పోటీలు పడ్డాయి. అయితే ఎంత వేగంగా అతనికి డబ్బు వచ్చిందో అంతే వేగంగా అది అతని వద్ద నుంచి మాయం అయింది. మొత్తం డబ్బును పోగొట్టుకున్నాడు. చివరకు దీనస్థితిలో జీవితం గడుపుతున్నాడు. అన్ని వ్యాపారాల్లోనూ నష్టమే.. కేబీసీ 5వ సీజన్లో తనకు డబ్బు వచ్చిన తరువాత తన జీవితం ఎలా మారిపోయిందో సుశీల్ కుమార్ గతంలో వివరించాడు. అది 2015-16 సమయం. అప్పట్లో ఆ షోలో రూ.5 కోట్లను గెలుచుకోవడం సంచలనంగా మారింది. అది నాకు గోల్డెన్ పీరియడ్ అని చెప్పాలో, తీవ్రంగా నష్టపోయిన విచారకరమైన సమయం అని చెప్పాలో తెలియడం లేదు. అంత మొత్తం డబ్బు వచ్చాక నేను ఒక సెలబ్రిటీని అయిపోయా. నెలలో 10 నుంచి 15 రోజుల పాటు లోకల్గా నిర్వహించే అనేక కార్యక్రమాల్లో నేనే చీఫ్ గెస్ట్గా పాల్గొన్నా. దీంతో నా చదువులకు ఆటంకం ఏర్పడింది. మీడియా వారు కూడా తరచూ నన్ను ఏం చేస్తున్నావని అడిగేవారు. నేను బిజినెస్ చేస్తున్నా అని చెప్పేవాడిని. అయితే నేను ఏ వ్యాపారం చేసినా అందులో నష్టమే వచ్చింది తప్ప ఎన్నడూ లాభపడింది లేదు. అన్ని వ్యాపారాల్లోనూ తీవ్రంగా నష్టాలు వచ్చి చాలా వరకు డబ్బు పోగొట్టుకున్నాను.. అని సుశీల్ తెలిపాడు. మద్యం, సిగరెట్లకు బానిసగా మారి.. అప్పట్లో నెలకు రూ.50వేల వరకు చాలా మందికి విరాళాలు ఇచ్చేవాడినని సుశీల్ పేర్కొన్నాడు. అయితే వ్యాపారాల్లో నష్టం రావడంతో ఉన్న డబ్బు అంతా పోయింది. మరోవైపు నా భార్య కూడా నాకు దూరమైంది. నన్ను విడిచిపెట్టింది. నాతో ఉండలేనని చెప్పింది. దాంతో మరింత కుంగిపోయా. ఆ తరువాత ఢిల్లీకి మకాం మార్చాను. అక్కడ జేఎన్యూ విద్యార్థులతో చాలాకాలం పాటు సహవాసం చేశాను. ఆ దశలో మద్యం, సిగరెట్లు తాగడం అలవాటైంది. వాటికి నేను బానిసైపోయా. కానీ కొంత కాలం తరువాత అన్ని చెడు అలవాట్లకు స్వస్తి చెప్పా. మళ్లీ ఎంట్రన్స్ పరీక్షల కోసం ప్రిపేర్ అవడం మొదలు పెట్టా. టీచర్ అయ్యేందుకు కష్టపడుతున్నా.. అని సుశీల్ తెలిపాడు. అయితే సుశీల్ కుమార్కు డబ్బును నిర్వహించడం తెలియకపోవడం, వ్యాపారాల్లో అనుభవం లేకపోవడంతోనే చాలా వరకు నష్టపోయాడని అతని జీవితాన్ని గమనించిన విశ్లేషకులు చెబుతున్నారు. అతనికి అదృష్టం ఎలా వచ్చిందో దాని వెనుకే దురదృష్టం కూడా అంతకన్నా అధిక మొత్తంలో వచ్చి అతని జీవితం దీనావస్థకు చేరుకుందని నెటిజన్లు కామెంట్లు చేస్తున్నారు.