India Visa Form Simplification | ఇక ఇండియా వీసా చాలా ఈజీ: 9 పేజీల దరఖాస్తులకు చెక్.. 70% కాలమ్స్ కట్

• భారత్ వీసా రూల్స్‌లో పెను మార్పు
• 70% తగ్గుతున్న ఫారమ్స్
• కేంద్రం కీలక నిర్ణయం

India Visa Form Simplification | త్రినేత్ర న్యూస్ : భారతదేశాన్ని సందర్శించాలనుకునే విదేశీ ప్రయాణికులకు కేంద్ర ప్రభుత్వం గుడ్ న్యూస్ చెప్పబోతోంది. అంతర్జాతీయ ప్రమాణాలకు అనుగుణంగా ఇండియన్ వీసా అప్లికేషన్ ప్రక్రియను అత్యంత సులభతరం చేసేందుకు రంగం సిద్ధమైంది. ప్రస్తుతం భారత్ అందిస్తున్న 22 వీసా కేటగిరీల్లోని అప్లికేషన్ ఫారమ్‌లను సమీక్షించి, దాదాపు 70 శాతం అనవసర కాలమ్స్‌ను తొలగించనున్నట్లు సీనియర్ ప్రభుత్వ అధికారి ఒకరు వెల్లడించారు. ఈ సరికొత్త మార్పులు వచ్చే ఏడాది నుంచి అమల్లోకి రానున్నాయి.

బోరింగ్ ఫారమ్స్‌కు స్వస్తి.. గ్లోబల్ స్టాండర్డ్స్‌తో కొత్త లుక్

ప్రస్తుతం భారత్‌కు వచ్చేందుకు ఈ-వీసా (e-Visa) దరఖాస్తు చేయాలంటే దాదాపు తొమ్మిది పేజీల భారీ ఫారమ్‌ను నింపాల్సి వస్తోంది. సైబర్ క్రైమ్, తీవ్రవాదం, విధ్వంసకర చర్యలు వంటి పలు అంశాలపై సుదీర్ఘమైన వివరాలు అడుగుతున్నారు. గ్లోబల్ లెవెల్‌లో ఎక్కడా లేని ‘డిస్ట్రిక్ట్’ (జిల్లా) వంటి వివరాలతో పాటు లోకల్ అడ్రస్ నిబంధనలను సడలించనున్నారు. ఇకపై విదేశీయులు తాము బస చేసే హోటల్ లేదా గెస్ట్‌హౌస్ అడ్రస్‌ ఇస్తే సరిపోయేలా నిబంధనలను కేంద్ర హోం మంత్రిత్వ శాఖ సులభతరం చేస్తోంది.

కరోనా ముందటి రికార్డుల కోసమే ఈ ముందడుగు

భారత పర్యాటక రంగాన్ని పూర్వ వైభవానికి తీసుకురావడమే ఈ సంస్కరణల ప్రధాన ఉద్దేశం. టూరిజం మంత్రిత్వ శాఖ గణాంకాల ప్రకారం.. కొవిడ్‌కు ముందు, అంటే 2019లో భారత్‌కు వచ్చిన విదేశీ పర్యాటకుల సంఖ్య 1.093 కోట్లు. కొవిడ్ తర్వాత కోలుకుంటున్న క్రమంలో 2023లో 95 లక్షలు, 2024లో 99 లక్షలు, 2025లో 91.5 లక్షల మంది మాత్రమే వచ్చారు.

ప్రీ-కొవిడ్ మార్కును అందుకోవడంలో దేశం ఇంకా వెనుకబడి ఉండటంతో, ట్రావెల్ అండ్ టూరిజం ఇండస్ట్రీ చేసిన విజ్ఞప్తి మేరకు కేంద్రం ఈ యూజర్-ఫ్రెండ్లీ మార్పులకు శ్రీకారం చుట్టింది.

పర్యాటక రంగం నుంచి కీలక ప్రతిపాదనలు

ప్రస్తుతం భారత్ 147 దేశాలకు 9 సబ్-కేటగిరీల్లో ఎలక్ట్రానిక్ ట్రావెల్ ఆథరైజేషన్ (ETA) ద్వారా ఈ-వీసాలు ఇస్తోంది. టూరిజం రంగాన్ని మరింత పరుగులు పెట్టించేందుకు పరిశ్రమ వర్గాలు మరికొన్ని డిమాండ్లను ప్రభుత్వం ముందుంచాయి.

• అన్ని దేశాల ప్రయాణికులకు ఒకే రకమైన 120 రోజుల అప్లికేషన్ విండో అమలు చేయాలి.
• అరుణాచల్ ప్రదేశ్, మణిపూర్, నాగాలాండ్, సిక్కిం, అండమాన్ నికోబార్ వంటి ప్రాంతాల్లో పర్యటించేందుకు అవసరమైన ప్రొటెక్టెడ్ ఏరియా పర్మిట్ (PAP/RAP)ను ఇక్కడికి వచ్చాక కాకుండా, వీసాతో పాటే జారీ చేయాలి.
• ఇంగ్లిష్‌తో పాటు స్పానిష్, జర్మన్, ఇటాలియన్ వంటి ప్రముఖ విదేశీ భాషల్లోనూ దరఖాస్తులు అందుబాటులో ఉంచాలి.                                                                                                                                                                                                                                                                                                                                                                                                                                                                                                   ఈ వెసులుబాట్లు పూర్తయితే రాబోయే రోజుల్లో భారత్‌కు విదేశీ టూరిస్టుల తాకిడి గణనీయంగా పెరిగే అవకాశం ఉంది.