Traffic Jam | ఊర్ల‌కు బారులు తీరిన వాహ‌నాలు.. టోల్ ప్లాజాల వ‌ద్ద భారీగా ట్రాఫిక్ జామ్

Traffic Jam | త్రినేత్ర న్యూస్ : బ‌తుక‌మ్మ‌, ద‌స‌రా పండుగ నేప‌థ్యంలో న‌గ‌ర వాసులు సొంతూర్ల బాట పట్టారు. ఈ క్ర‌మంలో న‌గ‌ర రోడ్ల‌న్నీ నిర్మానుష్యంగా మారాయి. ఇక హైద‌రాబాద్ సిటీ నుంచి జిల్లాల‌కు వెళ్లే ప్రధాన ర‌హ‌దారుల‌న్నీ వాహ‌నాల‌తో నిండిపోయాయి. ఆయా టోల్ ప్లాజాల వ‌ద్ద వాహ‌నాలు కిలోమీట‌ర్ల మేర బారులు తీరాయి. దీంతో వాహ‌నాలు ముందుకు క‌ద‌ల్లేని ప‌రిస్థితి ఏర్ప‌డింది.

ప్ర‌ధానంగా హైద‌రాబాద్ - విజ‌య‌వాడ‌, హైద‌రాబాద్ - వ‌రంగ‌ల్, హైద‌రాబాద్ - క‌రీంన‌గ‌ర్, హైద‌రాబాద్ - క‌ర్నూల్ హైవేల‌పై భారీగా ట్రాఫిక్ ఏర్ప‌డింది. ఈ మార్గాల్లో ఉన్న టోల్ ప్లాజాల వ‌ద్ద సుమారు 2 నుంచి 3 కిలోమీట‌ర్ల వ‌ర‌కు వాహ‌నాలు బారులు తీరాయి. దీంతో వృద్ధులు, చిన్నారులు తీవ్ర ఇబ్బందులు ఎదుర్కొంటున్నారు.

హైద‌రాబాద్ - విజ‌య‌వాడ హైవేపై ఉన్న పంతంగి టోల్ ప్లాజా వ‌ద్ద నెమ్మ‌దిగా ట్రాఫిక్ ముందుకు క‌దులుతుంది. కార్లు అయితే బారులు తీరాయి. చౌటుప్ప‌ల్ వ‌ద్ద ఫ్లై ఓవ‌ర్ ప‌నులు కొన‌సాగుతుండ‌డంతో.. వాహ‌నాలు నెమ్మ‌దిగా క‌దులుతున్నాయి.

హైద‌రాబాద్ - క‌ర్నూల్ హైవేపై ఉన్న రాయిక‌ల్ టోల్ ప్లాజా వ‌ద్ద మ‌రింత ర‌ద్దీ ఏర్ప‌డింది. బాలాన‌గ‌ర్‌లో ఫ్లై ఓవ‌ర్ ప‌నులు కొన‌సాగుతున్న నేప‌థ్యంలో అక్క‌డ కూడా వాహ‌నాలు నెమ్మ‌దిగా క‌దులుతున్నాయి. దీంతో జ‌డ్చ‌ర్ల, మ‌హబూబ్‌న‌గ‌ర్‌, నారాయ‌ణ‌పేట‌, నాగ‌ర్‌క‌ర్నూల్, వ‌న‌ప‌ర్తి వైపు వెళ్లే వాహ‌న‌దారులు ఇబ్బందులు ఎదుర్కొంటున్నారు.

ఇక జేబీఎస్, ఎంజీబీఎస్ బ‌స్టాండ్ల వ‌ద్ద ప్ర‌యాణికులు బ‌స్సుల కోసం ప‌డిగాపులు కాస్తున్నారు. పిల్ల‌లు, మ‌హిళ‌లు అయితే సీట్ల కోసం పాట్లు ప‌డుతున్నారు.