TG Weather | తెలంగాణ‌లో మూడురోజులు వాన‌లు.. ఎల్లో అలెర్ట్ జారీ చేసిన ఐఎండీ..!

TG Weather | తెలంగాణ‌లో మూడురోజులు వ‌ర్షాలు కురిసే అవ‌కాశం ఉంద‌ని హైద‌రాబాద్ వాతావ‌ర‌ణ కేంద్రం హెచ్చ‌రించింది. ఉరుములు, మెరుపులుతో కూడిన వాన‌లు ప‌డుతాయ‌ని తెలిపింది. ఈ మేర‌కు ఆయా జిల్లాల‌కు ఎల్లో అలెర్ట్ జారీ చేసింది. హిందూ మ‌హాస‌ముద్రం, దానికి అనుకొని ఉన్న ఆగ్నేయ బంగాళాఖాతంలో అల్ప‌పీడ‌నం ఏర్ప‌డింది. ప్ర‌స్తుతం ఇది నైరుతి బంగాళాఖాతం, ప‌రిస‌రాల‌ను ఆనుకొని హిందూ మ‌హ‌స‌ముద్రం మీదుగా కేంద్రీకృత‌మైంది. అనుబంధంగా ఉప‌రిత‌ల ఆవ‌ర్త‌నం స‌గ‌టు స‌ముద్ర‌మ‌ట్టానికి 5.8 కిలోమీట‌ర్ల ఎత్తు వ‌ర‌కు విస్త‌రించి ఉంది. రాగ‌ల 24గంట‌ల్లో వాయువ్య‌-ప‌శ్చిమ దిశ‌గా క‌దులుతూ నైరుతి బంగాళాఖాతం, ఆనుకొని ఉన్న భూమ‌ధ్య రేఖా హిందూ మ‌హాస‌ముద్రం మీదుగా మ‌రింత బ‌ల‌ప‌డుతుంద‌ని పేర్కొంది.

తెలంగాణ‌లో ఆదివారం తేలిక‌పాటి నుంచి మోస్త‌రు వ‌ర్షాలు కురిసే అవ‌కాశాలున్నాయ‌ని తెలిపింది. మంగ‌ళ‌శారం ఆదిలాబాద్‌, కుమ్రంభీం ఆసిఫాబాద్‌, మంచిర్యాల‌, నిర్మ‌ల్‌, నిజామాబాద్‌, జ‌గిత్యాల‌, రాజ‌న్న సిరిసిల్ల‌, క‌రీంన‌గ‌ర్‌, పెద్ద‌ప‌ల్లి, జ‌య‌శంక‌ర్ భూపాల‌ప‌ల్లి, మ‌హ‌బూబాబాద్‌, వ‌రంగ‌ల్‌, హ‌న్మ‌కొండ‌, జ‌న‌గాం, సిద్దిపేట‌, సంగారెడ్డి, మెద‌క్‌, కామారెడ్డి జిల్లాల్లో అక్క‌డ‌క్క‌డ వ‌ర్షాలు కురిసే అవ‌కాశాలున్నాయ‌ని తెలిపింది. అలాగే, మంగ‌ళ‌వారం రాజ‌న్న సిరిసిల్ల‌, క‌రీంన‌గ‌ర్‌, పెద్ద‌ప‌ల్లి, భూపాల‌ప‌ల్లి, మ‌హ‌బూబాబాద్‌, వ‌రంగ‌ల్‌, హ‌న్మ‌కొండ‌, జ‌న‌గాం, సిద్దిపేట‌, సంగారెడ్డి, మెద‌క్‌, కామారెడ్డి జిల్లాల్లో అక్క‌డ‌క్క‌డ ఉరుములు, మెరుపుల‌తో వ‌ర్షాలు కురుస్తాయ‌ని చెప్పింది. ఈ మేర‌కు రెండురోజులు ఆయా జిల్లాల‌కు హైద‌రాబాద్ వాతావ‌ర‌ణ కేంద్రం ఎల్లో అలెర్ట్ జారీ చేసింది.