New Ration Cards | 48 గంట‌ల్లోనే కొత్త రేష‌న్ కార్డులు జారీ : మంత్రి పొన్నం

New Ration Cards | త్రినేత్ర‌.న్యూస్ : రాష్ట్రంలో కొత్త రేష‌న్ కార్డుల( New Ration Cards ) జారీ ప్ర‌క్రియ‌పై రాష్ట్ర ర‌వాణా శాఖ మంత్రి పొన్నం ప్ర‌భాక‌ర్ కీల‌క వ్యాఖ్య‌లు చేశారు. అర్హులైన వారు కొత్త‌గా రేష‌న్ కార్డుకు ద‌ర‌ఖాస్తు చేసుకుంటే.. 48 గంట‌ల్లోనే జారీ చేస్తామ‌ని ఆయ‌న స్ప‌ష్టం చేశారు. ఆదివారం హైదరాబాద్ జిల్లా కలెక్టరేట్ సమావేశ మందిరంలో రాష్ట్ర మైనారిటీల సంక్షేమ, ప్రభుత్వ రంగ సంస్థల శాఖ మంత్రి మహ్మద్ అజహరుద్దీన్, ప్రభుత్వ విప్ అద్దంకి దయాకర్, శాసనసభ్యులు అక్బరుద్దీన్ ఓవైసీ, మాజీద్ హుస్సేన్, జిల్లా కలెక్టర్ డాక్టర్ ప్రియాంక ఆలాతో కలిసి 2 బీహెచ్‌కే గృహాల పట్టాల‌ను మంత్రి పొన్నం ప్ర‌భాక‌ర్ అంద‌జేశారు.

ఈ సంద‌ర్భంగా మంత్రి పొన్నం మాట్లాడుతూ.. రాష్ట్రంలో అర్హులైన ప్రతి కుటుంబానికి రేషన్ కార్డులు అందజేశామ‌ని చెప్పారు. అలాగే అర్హత కలిగిన వారు దరఖాస్తు చేసుకున్న 48 గంటల్లోనే రేషన్ కార్డు జారీ చేసే విధానాన్ని ప్రభుత్వం అమలు చేస్తోందని తెలిపారు. రేషన్ కార్డుతో పాటు నాణ్యమైన సన్నబియ్యం పంపిణీ, అర్హత గల కుటుంబాలకు 200 యూనిట్ల ఉచిత విద్యుత్ వంటి సంక్షేమ కార్యక్రమాలను ప్రభుత్వం సమర్థవంతంగా అమలు చేస్తోందన్నారు.

మహిళల ఆర్థిక సాధికారతకు ప్రభుత్వం అత్యంత ప్రాధాన్యం ఇస్తోందని పేర్కొంటూ, హైదరాబాద్‌లో మహిళా స్వయం సహాయక సంఘాల సభ్యత్వాన్ని విస్తృతంగా పెంచాలని పిలుపునిచ్చారు. మహిళలకు వడ్డీ లేని రుణాలు, స్వయం ఉపాధి అవకాశాలు కల్పిస్తున్నామని, మహిళలకు ఉచిత బస్సు ప్రయాణం ద్వారా విద్య, ఉపాధి, కుటుంబ అవసరాలు, ప్రార్థనా స్థలాలకు వెళ్లేందుకు ఎంతో సౌలభ్యం కలిగిందన్నారు. నిరుద్యోగ యువతకు ఉద్యోగ అవకాశాల కల్పనపై ప్రభుత్వం ప్రత్యేక దృష్టి సారించిందని, వివిధ శాఖల్లో ఖాళీల భర్తీ ప్రక్రియ కొనసాగుతోంద‌ని మంత్రి పొన్నం ప్ర‌భాక‌ర్ స్ప‌ష్టం చేశారు.