TGEJAC | ఆబ్కారీ శాఖ కమిషనర్ హరికిరణ్‌పై చర్యలు తీసుకోండి: మంత్రికి టీజీఈ జేఏసీ వినతి

TGEJAC | త్రినేత్ర.న్యూస్ : ఆబ్కారీ శాఖలో ఉన్నతాధికారి తీరుపై కింది స్థాయి అధికారులు, సిబ్బంది తీవ్ర అసంతృప్తి వ్యక్తం చేస్తున్నారు. నిజామాబాద్ డివిజన్ డిప్యూటీ కమిషనర్‌గా విధులు నిర్వర్తిస్తున్న వి.సోమిరెడ్డి పట్ల ఆబ్కారీ శాఖ కమిషనర్ హరికిరణ్ తీవ్ర దురుసుగా ప్రవర్తించారని తెలంగాణ ఎంప్లాయిస్ జాయింట్ యాక్షన్ కమిటీ (TGEJAC) ఆరోపించింది. ఈ మేరకు కమిషనర్ హరికిరణ్‌పై తక్షణమే చర్యలు తీసుకోవాలని కోరుతూ ఆబ్కారీ శాఖ మంత్రి జూపల్లి కృష్ణారావుకి టీజీఈ జేఏసీ నాయకులు ఒక అధికారిక వినతిపత్రాన్ని సమర్పించారు.

"వెధవ, ఇడియట్" అంటూ పరుష దూషణలు

గత 30 ఏళ్లుగా ఆబ్కారీ శాఖలో వివిధ స్థాయిలో ఎలాంటి మచ్చ లేకుండా, నిజాయితీగా సేవలందిస్తున్న ఉత్తమ అధికారి సోమిరెడ్డిని కమిషనర్ అకారణంగా దూషించారని జేఏసీ తమ లేఖలో పేర్కొంది. తోటి అధికారి అని కూడా చూడకుండా ఇతర అధికారులు, సిబ్బంది ఎదుటే ఆయనను పరుష పదజాలంతో అవమానించారు. సోమిరెడ్డి ఏ తప్పూ చేయకపోయినా.. "వెధవ, ఇడియట్" అంటూ దాదాపు పది నిమిషాల పాటు ఉన్నత స్థాయిలో ఉన్న కమిషనర్ విరుచుకుపడ్డారు. పది నిమిషాల పాటు సాగిన ఈ దూషణలతో తీవ్ర మానసిక ఒత్తిడికి గురైన సోమిరెడ్డి ఆస్పత్రి పాలయ్యారు. కమిషనర్ వ్యవహారశైలితో తీవ్ర అవమానభారానికి లోనైన సోమిరెడ్డి, తన ఆత్మగౌరవాన్ని చంపుకోలేక ఏకంగా ఉద్యోగానికి రాజీనామా చేసేందుకు సిద్ధమయ్యారని జేఏసీ నేతలు ఆవేదన వ్యక్తం చేశారు.

ప్రభుత్వానికి చెడ్డపేరు తెస్తున్న ఒకరిద్దరు అధికారులు

తెలంగాణ రాష్ట్రంలో గత రెండున్నరేళ్లుగా ప్రభుత్వానికి, ఉద్యోగులకు మధ్య స్నేహపూర్వక వాతావరణం ఉందని, ఉద్యోగుల పట్ల ప్రభుత్వం మానవీయ కోణంలో వ్యవహరిస్తోందని జేఏసీ తన వినతిపత్రంలో ప్రస్తావించింది. అయితే, ఇలాంటి ఒకరిద్దరు పై స్థాయి అధికారుల తీరు వల్ల ప్రభుత్వానికి ఉద్యోగ సమాజంతో పాటు ప్రజల్లోనూ చెడ్డపేరు వస్తోందని వారు ఆరోపించారు. కమిషనర్ హరికిరణ్ కేవలం సోమిరెడ్డినే కాకుండా, ఇతర అధికారులు, సిబ్బంది పట్ల కూడా ఇదే తరహాలో వేధింపులకు గురిచేస్తున్నారని వారు తెలిపారు.

టీజీఈ జేఏసీ (TGEJAC) ప్రధాన డిమాండ్లు ఇవే

ఉద్యోగుల పక్షాన టీజీఈ జేఏసీ చైర్మన్ వి. లచ్చిరెడ్డి, సెక్రటరీ జనరల్ వొడ్నాల రాజశేఖర్ ఈ వ్యవహారంపై మంత్రి ముందు పలు డిమాండ్లను ఉంచారు. అకారణంగా దూషించిన ఆబ్కారీ శాఖ కమిషనర్ హరికిరణ్‌పై తక్షణమే కఠిన చర్యలు తీసుకోవాలి. ఈ ఘటనపై వెంటనే ఒక కమిటీని ఏర్పాటు చేసి సమగ్ర విచారణ జరిపించాలి. విచారణ పారదర్శకంగా జరగాలంటే కమిషనర్ హరికిరణ్‌ను వెంటనే ఆయన విధుల నుంచి తప్పించాలి. ఈ ఘటనపై కఠినంగా వ్యవహరించడం ద్వారా.. అకారణంగా ఉద్యోగులను వేధిస్తే ప్రభుత్వం సహించబోదనే బలమైన సందేశాన్ని, భరోసాను ఉద్యోగులకు ఇవ్వాలని జేఏసీ ప్రభుత్వానికి విజ్ఞప్తి చేసింది.