TGCHE Syllabus Revamp | తెలంగాణలో డిగ్రీ, పీజీ సిలబస్ మార్పు.. ఉన్నత విద్యా మండలి కీలక నిర్ణయం

TGCHE Syllabus Revamp | త్రినేత్ర.న్యూస్: తెలంగాణలోని ఉన్నత విద్యా వ్యవస్థలో కీలక మార్పులకు రాష్ట్ర ఉన్నత విద్యా మండలి (TGCHE) శ్రీకారం చుట్టింది. మంగళవారం టీజీసీహెచ్ఈ చైర్మన్ ప్రొఫెసర్ వి. బాలకిస్టా రెడ్డి అధ్యక్షతన జరిగిన ఎగ్జిక్యూటివ్ కౌన్సిల్ (EC) సమావేశంలో అండర్ గ్రాడ్యుయేట్ (UG), పోస్ట్ గ్రాడ్యుయేట్ (PG) సిలబస్‌ను మార్చాలని నిర్ణయించారు.

ఇండస్ట్రీ అవసరాలకు తగ్గట్టుగా సిలబస్

విద్యార్థులను అంతర్జాతీయ స్థాయి నైపుణ్యాలతో తీర్చిదిద్దేందుకు, సిలబస్‌ను ఇండస్ట్రీ అవసరాలకు అనుగుణంగా రూపొందించనున్నారు. ఇందుకోసం వీసీల నేతృత్వంలో సబ్జెక్టుల వారీగా కమిటీలను ఏర్పాటు చేయనున్నారు. ఈ మార్పుల కోసం CCMB, IITs, IICT, DRDO వంటి ప్రతిష్టాత్మక సంస్థల నుంచి సూచనలు తీసుకోనున్నారు. ఇప్పటికే మొదటి సంవత్సరం యూజీలో మార్చిన సిలబస్‌కు ఆమోదం తెలిపిన మండలి, రెండు, మూడో సంవత్సరం డిగ్రీ, పీజీ సిలబస్‌ను త్వరలోనే సవరించనుంది.

చదువుకుంటూ సంపాదన.. కోర్సుల విస్తరణ

విద్యార్థులు చదువుకుంటూనే సంపాదించుకునేందుకు వీలుగా ప్రవేశపెట్టిన 'అప్రెంటిస్‌షిప్-ఎంబెడెడ్ (apprenticeship-embedded)' కోర్సులను వచ్చే విద్యా సంవత్సరం నుంచి NAAC గుర్తింపు ఉన్న అన్ని ప్రభుత్వ డిగ్రీ కళాశాలలకు విస్తరించనున్నారు. ప్రస్తుతం 23 కళాశాలల్లో 1,071 మంది విద్యార్థులు ఈ కోర్సులను అభ్యసిస్తున్నారు. విశేషమేమిటంటే, ఈ కోర్సుల్లో చేరే విద్యార్థుల స్కిల్ డెవలప్‌మెంట్ రిజిస్ట్రేషన్ ఫీజు రూ.5000 ను ఉన్నత విద్యా మండలి, ఆయా విశ్వవిద్యాలయాలే భరిస్తాయి.

పాలిటెక్నిక్ కళాశాలలకు సహకారం

యూనివర్సిటీల పరిధిలోని పాలిటెక్నిక్ కళాశాలలకు అండగా నిలవాలని వర్సిటీలను మండలి కోరింది. పాలిటెక్నిక్ విద్యార్థులు విశ్వవిద్యాలయాల్లోని ప్రయోగశాలలు (Laboratories), సాంకేతిక వనరులను ఉపయోగించుకునే అవకాశం కల్పించాలని సూచించింది.

ఈ సమావేశంలో విద్యాశాఖ కార్యదర్శి డాక్టర్ యోగితా రాణా, ఉన్నత విద్యా మండలి వైస్ చైర్మన్లు ప్రొఫెసర్ ఇ. పురుషోత్తం, ప్రొఫెసర్ ఎస్.కె. మహమూద్, కళాశాల విద్య కమిషనర్ ఎ. శ్రీదేవసేన, పలు విశ్వవిద్యాలయాల ఉపకులపతులు పాల్గొన్నారు.