TG Weather | తెలంగాణ‌ను వ‌ణికిస్తున్న చ‌లి.. మ‌రింత త‌గ్గ‌నున్న ఉష్ణోగ్ర‌త‌లు..!

TG Weather | తెలంగాణ‌ను చ‌లి వ‌ణికిస్తున్న‌ది. చ‌లికి తోడు ద‌ట్టంగా పొగ‌మంచు క‌మ్మేస్తున్న‌ది. రాత్రి నుంచి ఉద‌యం వ‌ర‌కు చ‌లి తీవ్ర‌త ఉండ‌డంతో జ‌నం తీవ్ర ఇబ్బందులు ప‌డుతున్నారు. ఈ క్ర‌మంలో హైద‌రాబాద్ వాతావ‌ర‌ణ శాఖ కీల‌క అప్‌డేట్ జారీ చేసింది. రాగ‌ల మూడురోజులు చ‌లి కొన‌సాగే అవ‌కాశం ఉంద‌ని పేర్కొంది. రాబోయే రెండురోజుల్లో రాష్ట్రంలో అక్క‌డ‌క్క క‌నిష్ట ఉష్ణోగ్ర‌త‌లు సాధార‌ణం కంటే రెండు నుంచి మూడు డిగ్రీలు త‌క్కువ‌గా న‌మోద‌య్యే అవ‌కాశం ఉంద‌ని పేర్కొంది.

మంగ‌ళ‌వారం ఆదిలాబాద్‌, ఆసిఫాబాద్‌, మంచిర్యాల‌, వ‌రంగ‌ల్‌, హ‌నుమ‌కొండ‌, జ‌న‌గాం, సిద్దిపేట‌, రంగారెడ్డి, మెద‌క్ జిల్లాల్లో అక్క‌డ‌క్క‌డ పొగ మంచు ఉండే అవ‌కాశం ఉంద‌ని పేర్కొంది. బుధ‌వారం ఆదిలాబాద్‌, ఆసిఫాబాద్‌, మంచిర్యాల‌, వ‌రంగ‌ల్‌, హ‌నుమ‌కొండ‌, జ‌న‌గాం, సిద్దిపేట‌, రంగారెడ్డి, సంగారెడ్డి, మెద‌క్‌, కామారెడ్డి జిల్లాల్లో పొగ‌మంచు ఉంటుంద‌ని పేర్కొంది. ఇదిలా ఉండ‌గా రాష్ట్రంలో ఉష్ణోగ్ర‌త‌లు భారీగా ప‌డిపోతున్నాయి. సోమ‌వారం హైద‌రాబాద్‌తో పాటు రాష్ట్ర‌వ్యాప్తంగా 16 డిగ్రీల‌కు ప‌డిపోయాయి. అత్య‌ల్పంగా ఆదిలాబాద్ జిల్లా బేలాలో 9 డిగ్రీల క‌నిష్ట ఉష్ణోగ్ర‌త‌లు న‌మోద‌య్యాయ‌ని టీజీడీపీఎస్ వివ‌రించింది.

ఇదిలా ఉండ‌గా.. ఆగ్నేయ బంగాళాఖాతాన్ని ఆనుకొని హిందూ మ‌హాస‌ముద్రంలో తీవ్ర అల్ప‌పీడ‌నం కొన‌సాగుతుంద‌ని.. అనుబంధంగా ఉప‌రిత‌ల ఆవ‌ర్త‌నం స‌ముద్ర‌మ‌ట్టానికి 5.8 కిలోమీట‌ర్ల ఎత్తు వ‌ర‌కు కొన‌సాగుతుంద‌ని వాతావ‌ర‌ణ కేంద్రం పేర్కొంది. రాబోయే 24గంట‌ల్లో ప‌శ్చిమ-వాయువ్య దిశ‌గా క‌దిలి నైరుతి బంగాళాఖాతంలో వాయుగుండంగా మారే అవ‌కాశం ఉంద‌ని చెప్పింది. రాబోయే 48 గంట‌ల్లో నైరుతి బంగాళాఖాతంలో ప‌శ్చిమ‌-వాయువ్య దిశ‌గా ప్ర‌యాణించే ఛాన్స్ ఉంద‌ని చెప్పింది.