Amrabad Tiger Reserve | తెలంగాణ అడవుల్లో పచ్చని శుభవార్త.. అమ్రాబాద్ టైగర్ రిజర్వ్‌లో 42 పులులు

• అమ్రాబాద్ టైగర్ రిజర్వ్‌లో విజయవంతంగా ముగిసిన ఆల్-ఇండియా టైగర్ ఎస్టిమేషన్ (AITE) 2026
• కొత్త సర్వేలో 18 ఆడ, 14 మగ, 10 పిల్ల పులులతో కలుపుకుని మొత్తం 42 పులులు ఉన్నట్లు గుర్తింపు
• నవంబర్ 2025 నుంచి జూన్ 2026 వరకు 1,120 ప్రాంతాల్లో కెమెరా ట్రాప్‌ల ద్వారా నిరంతర పర్యవేక్షణ
• పులుల సంతతి పెరుగుతుండటం స్థానిక పర్యావరణ సమతుల్యతకు, అటవీ ఆరోగ్యానికి శుభసూచకం అంటున్న అధికారులు

Amrabad Tiger Reserve | త్రినేత్ర.న్యూస్ : తెలంగాణ అటవీప్రాంతం నుంచి వన్యప్రాణి ప్రేమికులకు ఒక అద్భుతమైన వార్త. ప్రతిష్టాత్మకంగా చేపట్టిన ఆల్-ఇండియా టైగర్ ఎస్టిమేషన్ (AITE) 2026 సర్వేలో అమ్రాబాద్ టైగర్ రిజర్వ్‌ (ATR)లో పులుల సంఖ్య గణనీయంగా ఉన్నట్లు తేలింది. నవంబర్ 2025 నుంచి జూన్ 2026 వరకు (సుమారు ఎనిమిది నెలల పాటు) రిజర్వ్ అటవీ ప్రాంతంలో నిర్వహించిన ఈ సర్వే విజయవంతంగా ముగిసింది. ప్రాథమిక నివేదికల ప్రకారం, ఈ రిజర్వ్‌లో ఆడ, మగ, అలాగే పిల్ల పులులతో కలుపుకుని మొత్తం 42 పులులు ఉన్నట్లు అధికారులు గుర్తించారు. 2,611 చదరపు కిలోమీటర్ల మేర విస్తరించి ఉన్న ఈ దట్టమైన అటవీ ప్రాంతం ఇప్పుడు పులులకు సురక్షితమైన ఆవాసంగా మారింది.

కెమెరా ట్రాప్స్‌తో పక్కాగా డేటా సేకరణ

ఈ సర్వేను చాలా పకడ్బందీగా, టెక్నాలజీ సాయంతో నిర్వహించారు. అడవిని 2 చదరపు కిలోమీటర్ల గ్రిడ్స్‌గా విభజించి, మొత్తం 1,120 వ్యూహాత్మక ప్రాంతాల్లో 2,240 కెమెరా ట్రాప్స్‌ (Camera Traps) అమర్చారు. ఈ మొత్తం అటవీ ప్రాంతాన్ని నాలుగు బ్లాక్‌లుగా విభజించి, ఒక్కో బ్లాక్‌లో 30 రోజుల పాటు కెమెరాలను రికార్డింగ్ మోడ్‌లో ఉంచారు. దీనివల్ల వన్యప్రాణుల కదలికలను ఖచ్చితత్వంతో ఫొటోలు తీయడానికి, డేటాను అనాలిసిస్ చేయడానికి వీలైంది.

కెమెరాల్లో రికార్డైన డేటాను పరిశీలించిన అధికారులకు సంతోషకరమైన విషయాలు తెలిశాయి. ఈ 42 పులులలో 18 ఆడ పులులు, 14 మగ పులులు, 2 సబ్-అడల్ట్స్ (ఎదుగుతున్నవి), 8 పులి కూనలు ఉన్నాయి.  అడవిలో సబ్-అడల్ట్స్, అలాగే పులి కూనలు ఉండటం అనేది అక్కడి బ్రీడింగ్ వాతావరణం అద్భుతంగా ఉందని చెప్పడానికి నిదర్శనం. పులులు తమ సంతతిని పెంచుకోవడానికి అమ్రాబాద్ అడవులు అత్యంత అనుకూలంగా ఉన్నాయని అటవీశాఖ అధికారులు హర్షం వ్యక్తం చేస్తున్నారు.

అటవీశాఖ సిబ్బంది కృషి

ఇంతటి కష్టతరమైన, సవాలుతో కూడిన సర్వే వెనుక అటవీశాఖ సిబ్బంది కృషి ఎంతో ఉంది. అమ్రాబాద్ టైగర్ రిజర్వ్ ఫీల్డ్ డైరెక్టర్ డాక్టర్ సునీల్ ఎస్. హిరేమత్, నాగర్‌కర్నూల్ జిల్లా ఫారెస్ట్ ఆఫీసర్ రేవంత్ చంద్ర పర్యవేక్షణలో ఈ సర్వే జరిగింది.

డివిజనల్ ఆఫీసర్లు, రేంజ్ ఆఫీసర్లు, ఫ్రంట్‌లైన్ స్టాఫ్, రిజర్వ్ బయాలజిస్టులతో పాటు 'హైటికోస్' (Hyticos) టీమ్ అంతా కలిసి డేటా మేనేజ్‌మెంట్, కెమెరాల ఏర్పాటు, అనాలిసిస్‌లో సమన్వయంతో పనిచేశారు. జాతీయ స్థాయిలో పులుల జనాభా, వాటి ఆవాసాలు, ఆహార లభ్యతను అంచనా వేయడంలో ఈ సైంటిఫిక్ డేటా ఎంతగానో ఉపయోగపడుతుందని అధికారులు స్పష్టం చేశారు. కొండలు, గుట్టలతో కూడిన కఠినమైన అటవీ ప్రాంతంలో కెమెరా ట్రాప్‌లను ప్లాన్ చేయడం, వాటిని మానిటర్ చేయడం నిజంగా ఒక గొప్ప ప్రయత్నం.