AP Cyclone Power Restoration | ఏపీకి తెలంగాణ బిగ్ సపోర్ట్: చంద్రబాబు ఫోన్ కాల్‌తో భట్టి కీలక నిర్ణయం

• తుఫాన్ విలయం
• ఏపీకి తెలంగాణ ప్రభుత్వం బిగ్ రిలీఫ్
• చంద్రబాబు ఫోన్ చేయగానే రంగంలోకి విద్యుత్ బృందాలు

AP Cyclone Power Restoration | త్రినేత్ర న్యూస్ : తీవ్ర తుఫాన్ ప్రభావంతో విద్యుత్ వ్యవస్థ పూర్తిగా స్తంభించిపోయి అంధకారంలో చిక్కుకున్న ఆంధ్రప్రదేశ్‌కు తెలంగాణ ప్రభుత్వం మానవతా దృక్పథంతో బాసటగా నిలిచింది. ఏపీలో విద్యుత్ పునరుద్ధరణ పనులను పరుగులు పెట్టించేందుకు ప్రత్యేక టెక్నికల్ టీమ్స్, అవసరమైన భారీ యంత్రాలను తక్షణమే పంపించింది. ఏపీ ముఖ్యమంత్రి నారా చంద్రబాబు నాయుడు చేసిన విజ్ఞప్తికి రాష్ట్ర ప్రభుత్వం వెనువెంటనే సానుకూలంగా స్పందించి ఈ నిర్ణయం తీసుకుంది.

చంద్రబాబు ఫోన్ కాల్.. 16 వేల స్తంభాలు ధ్వంసం

ఆంధ్రప్రదేశ్ ముఖ్యమంత్రి నారా చంద్రబాబు నాయుడు, ఆ రాష్ట్ర మంత్రి గొట్టిపాటి రవికుమార్‌ గురువారం తెలంగాణ ఉపముఖ్యమంత్రి, విద్యుత్ శాఖ మంత్రి భట్టి విక్రమార్కకు ఫోన్ చేశారు. తుఫాన్ ధాటికి అనకాపల్లి, విశాఖపట్నం, విజయనగరం, శ్రీకాకుళం, ఏలూరు, ఎన్టీఆర్, గుంటూరు, పార్వతీపురం మన్యం, అల్లూరి సీతారామరాజు జిల్లాల్లో తీవ్ర నష్టం వాటిల్లిందని వివరించారు. ప్రాథమిక అంచనాల ప్రకారమే ఏకంగా 16 వేలకు పైగా కరెంట్ స్తంభాలు విరిగిపడ్డాయని, వందలాది పల్లెల్లో చీకట్లు అలుముకున్నాయని తెలిపారు. దెబ్బతిన్న విద్యుత్ నెట్‌వర్క్‌ను వేగంగా రీస్టోర్ చేసేందుకు అనుభవజ్ఞులైన సిబ్బంది, హైటెక్ మెషినరీతో కూడిన సాంకేతిక సహాయక బృందాలను పంపాలని కోరారు.

సీఎం రేవంత్‌తో చర్చ.. భట్టి గ్రీన్ సిగ్నల్

చంద్రబాబు విజ్ఞప్తిపై డిప్యూటీ సీఎం భట్టి విక్రమార్క వెంటనే ముఖ్యమంత్రి ఎ. రేవంత్ రెడ్డితో చర్చించారు. విపత్తు వేళ పక్క రాష్ట్ర ప్రజలకు తక్షణ సాయం అందించడమే సరైన నిర్ణయమని భావించి, వెంటనే విద్యుత్ ఉన్నతాధికారులను అప్రమత్తం చేశారు. ఇంధన శాఖ ప్రత్యేక ప్రధాన కార్యదర్శి నవీన్ మిట్టల్, టీజీఎస్పీడీసీఎల్ (TGSPDCL) సీఎండీ జితేష్ వి. పాటిల్, ఎన్పీడీసీఎల్ (TGNPDCL) సీఎండీ వరుణ్ రెడ్డిలతో మాట్లాడి.. యుద్ధప్రాతిపదికన ఏపీకి టీమ్స్‌ను పంపాలని ఆదేశాలు జారీ చేశారు.

తక్షణమే బయల్దేరిన టీజీఎస్పీడీసీఎల్ బృందాలు

డిప్యూటీ సీఎం ఆదేశాలు వెలువడిన కొద్ది గంటల్లోనే టీజీఎస్పీడీసీఎల్ సీఎండీ జితేష్ వి. పాటిల్ ప్రత్యేక కార్యాచరణ చేపట్టారు. నైపుణ్యం కలిగిన విద్యుత్ ఇంజనీర్లు, లైన్‌మెన్లతో కూడిన ప్రత్యేక బృందాలను అవసరమైన పరికరాలతో సిద్ధం చేసి ఆంధ్రప్రదేశ్‌కు సాగనంపారు. క్షేత్రస్థాయిలో విరిగిపడిన స్తంభాలను సరిచేయడం, దెబ్బతిన్న హైటెన్షన్ లైన్లను పునరుద్ధరించడం, ట్రాన్స్‌ఫార్మర్ల రిపేర్లలో ఈ టీమ్స్ స్థానిక సిబ్బందితో కలిసి పనిచేయనున్నాయి.

రాజకీయ, ప్రాంతీయ విభేదాలకు తావులేకుండా ఆపద సమయంలో ఇరు తెలుగు రాష్ట్రాల మధ్య వెల్లివిరిసిన ఈ సోదరభావంపై సర్వత్రా ప్రశంసలు వ్యక్తమవుతున్నాయి. తెలంగాణ సర్కార్ అందించిన ఈ చేయూతతో తుఫాన్ ప్రభావిత ప్రాంతాల్లో పవర్ సప్లై మరింత వేగంగా సాధారణ స్థితికి వచ్చే అవకాశం ఉంది.