Telangana SC ST Sub Plan | ఎస్సీ, ఎస్టీలకు గుడ్ న్యూస్: 1,300 ఎకరాల భూమి పంపిణీకి రంగం సిద్ధం

• సచివాలయంలో డిప్యూటీ సీఎం భట్టి కీలక నిర్ణయాలు

Telangana SC ST Sub Plan | త్రినేత్ర న్యూస్ : తెలంగాణలోని ఎస్సీ, ఎస్టీ వర్గాల సామాజిక, ఆర్థిక సమగ్ర వికాసానికి రాష్ట్ర ప్రభుత్వం కీలక నిర్ణయాలు తీసుకుంటోంది. సబ్ ప్లాన్ ప్రత్యేక అభివృద్ధి నిధులు కేవలం కాగితాలకే పరిమితం కాకుండా, క్షేత్రస్థాయిలో అర్హులైన ప్రతి లబ్ధిదారుడి గడపకూ చేరాలని ఉప ముఖ్యమంత్రి మల్లు భట్టి విక్రమార్క అధికారులను ఆదేశించారు. గురువారం డాక్టర్ బీఆర్ అంబేద్కర్ రాష్ట్ర సచివాలయంలో సాంఘిక సంక్షేమ శాఖ మంత్రి అడ్లూరి లక్ష్మణ్‌తో కలిసి వ్యవసాయం, ఇంధనం, వైద్యారోగ్యం, పంచాయతీరాజ్, మున్సిపల్ శాఖల ఉన్నతాధికారులతో ఆయన ఉన్నత స్థాయి సమీక్ష నిర్వహించారు.

1,300 ఎకరాల భూమిపై క్లారిటీ.. ఇళ్ల స్థలాల కోసం భూసేకరణ

ఈ సమీక్షలో జిల్లా కలెక్టర్ల నుంచి అందిన డేటా ఆధారంగా రాష్ట్రవ్యాప్తంగా ప్రస్తుతం సుమారు 1,300 ఎకరాల ప్రభుత్వ ఖాళీ భూమి అందుబాటులో ఉన్నట్లు అధికారులు తెలిపారు. ఈ భూములను త్వరితగతిన వినియోగంలోకి తెచ్చి, అర్హులైన నిరుపేద కుటుంబాలకు అందించేందుకు అవసరమైన అన్ని అనుమతులను వేగవంతం చేయాలని డిప్యూటీ సీఎం స్పష్టం చేశారు. అలాగే నివాస స్థలాలు లేని ఎస్సీ, ఎస్టీ కుటుంబాలకు స్థలాల కొనుగోలు, అవసరమైతే భూసేకరణ ప్రతిపాదనలను కూడా వెంటనే పరిశీలించాలని అధికారులను ఆదేశించారు.

రైతు ప్రయోజనాలపై డిజిటల్ ట్రాకింగ్

రైతు భరోసా, సబ్సిడీ విత్తనాలు, వ్యవసాయ యంత్రాల పంపిణీ వంటి పథకాల అమలుపై ప్రత్యేక శ్రద్ధ పెట్టాలని భట్టి విక్రమార్క చెప్పారు. భూమి ఉన్న రైతులతో పాటు ఎస్సీ రైతులందరికీ పూర్తి ప్రయోజనం అందేలా నిబంధనల్లో మార్పులు అవసరమైతే ప్రత్యేక పథకాల ప్రతిపాదనలు సిద్ధం చేయాలన్నారు. పథకాల వారీగా లబ్ధి పొందిన రైతుల పేర్లు, గ్రామాలు, సామాజిక వర్గాల వివరాలను పక్కాగా ధ్రువీకరించి, డేటాను పూర్తిగా డిజిటలైజ్ చేయాలని స్పష్టం చేశారు.

నియోజకవర్గానికో కమ్యూనిటీ హాల్.. ఏజెన్సీలో మొబైల్ క్లినిక్‌లు

ప్రతి అసెంబ్లీ నియోజకవర్గంలో ఎస్సీ, ఎస్టీ ప్రజల అవసరాలకు అనుగుణంగా కమ్యూనిటీ హాళ్లు, వైకుంఠ ధామాలు (శ్మశాన వాటికలు) నిర్మించాలని, మౌలిక వసతులకు అత్యధిక ప్రాధాన్యం ఇవ్వాలని ఉప ముఖ్యమంత్రి సూచించారు.

మంత్రి అడ్లూరి లక్ష్మణ్ మాట్లాడుతూ.. గిరిజన గూడేలు, ఎస్సీ కాలనీల్లో విద్యుత్ స్తంభాలు, కొత్త వైరింగ్ పనులను త్వరితగతిన పూర్తి చేయాలని కోరారు. ముఖ్యంగా ఏజెన్సీ ఏరియాల్లో అత్యవసర వైద్య సేవల విస్తరణకు వీలుగా 'మొబైల్ మెడికల్ యూనిట్లు' ఏర్పాటు చేసే ప్రతిపాదనలను వేగవంతం చేయాలని అధికారులకు సూచించారు.

ఈ ఉన్నత స్థాయి సమీక్షా సమావేశంలో ప్రభుత్వ సీనియర్ ఉన్నతాధికారులు నవీన్ మిట్టల్, సందీప్ కుమార్ సుల్తానియా, సురేంద్ర మోహన్, సిక్తా పట్నాయక్, క్రిస్టినా, విజయేంద్ర బోయి, గోపి, గుగులోతు రవి నాయక్, సంతోష్ తదితరులు పాల్గొన్నారు.