Qualcomm Layoffs November 2026 | క్వాల్‌కామ్‌లో మళ్లీ లేఆఫ్స్.. ఇండియాలో వేలాది మంది ఉద్యోగాలకు ఎసరు

• నవంబర్‌లో క్వాల్‌కామ్‌ భారీ లేఆఫ్స్
• సీఈవో మెమోలో ఏముంది?

Qualcomm Layoffs November 2026 | త్రినేత్ర న్యూస్ : టెక్ రంగంలో ఉద్యోగాల కోత పర్వం ఇప్పట్లో ముగిసేలా కనిపించడం లేదు. ప్రముఖ స్మార్ట్‌ఫోన్ చిప్‌మేకర్ ‘క్వాల్‌కామ్’ (Qualcomm) నవంబర్‌లో మరో విడత లేఆఫ్స్‌కు సిద్ధమైనట్లు కంపెనీ సీఈవో క్రిస్టియానో అమోన్ స్వయంగా అంతర్గత మెమో ద్వారా ఉద్యోగులకు సంకేతాలు ఇచ్చారు. గ్లోబల్ మార్కెట్‌తో పాటు ముఖ్యంగా భారత్‌లోని ఇంజనీరింగ్, టెక్నాలజీ విభాగాల్లో పనిచేస్తున్న ఉద్యోగులపై ఈ ప్రభావం తీవ్రంగా ఉండే అవకాశం ఉందని పరిశ్రమ వర్గాల అంచనాలు చెబుతున్నాయి.

పనితీరు మెరుగుదల కోసమే: సీఈవో క్రిస్టియానో అమోన్

సంస్థలో ‘స్ట్రాంగ్ పెర్ఫార్మెన్స్ కల్చర్’ను పెంపొందించడం, ఆశించిన స్థాయిలో ఫలితాలు ఇవ్వని విభాగాలను రీస్ట్రక్చర్ చేయడమే ఈ నిర్ణయం వెనుక ముఖ్య ఉద్దేశమని సీఈవో తన మెమోలో పేర్కొన్నారు. బిజినెస్ ప్రాధాన్యతలు, ఆర్గనైజేషన్ అవసరాలు, నైపుణ్యాల ఆధారంగా మాత్రమే ఏయే రోల్స్‌ను తొలగించాలనేది నిర్ణయిస్తామని స్పష్టం చేశారు. కంపెనీ కొత్త రంగాల్లోకి విస్తరిస్తున్న కొద్దీ దానికి తగిన కొత్త స్కిల్స్ అవసరమవుతాయని, సరైన స్థానంలో సరైన వ్యక్తులు ఉండటమే సంస్థ భవిష్యత్ విజయానికి కీలకమని ఆయన వివరించారు.

ఇండియాలో ఎందరిపై ప్రభావం?

క్వాల్‌కామ్‌కు ప్రపంచవ్యాప్తంగా దాదాపు 52,000 మంది ఉద్యోగులు ఉండగా, కేవలం భారతదేశంలోనే (ముఖ్యంగా హైదరాబాద్, బెంగళూరు క్యాంపస్‌లలో) దాదాపు 20,000 మంది పనిచేస్తున్నారు. పరిశ్రమ వర్గాల అంచనాల ప్రకారం.. దేశీయంగా 3 శాతం నుంచి 6 శాతం సిబ్బందిపై వేటు పడే అవకాశం ఉంది. మార్కెట్ రీసెర్చ్ సంస్థల లెక్కల ప్రకారం సుమారు 1,000 మందికి పైగా ఉద్యోగులు ప్రభావితం కావచ్చని తెలుస్తోంది. అంతర్జాతీయంగా చూస్తే మొత్తం ఉద్యోగుల్లో 6 నుంచి 7 శాతం వరకు తొలగింపులు ఉండవచ్చని సమాచారం. అయితే అధికారికంగా ఎంతమందిని తొలగిస్తారనే దానిపై కంపెనీ ఇంకా స్పష్టమైన ప్రకటన చేయలేదు.

ఈ లేఆఫ్స్‌కు అసలు కారణమేంటి?

ప్రపంచవ్యాప్తంగా కన్స్యూమర్ ఎలక్ట్రానిక్స్ మార్కెట్ మందగించడం, కాంపోనెంట్ల ధరలు పెరగడం క్వాల్‌కామ్ స్మార్ట్‌ఫోన్ చిప్స్ విక్రయాలపై నేరుగా ప్రభావం చూపింది. యాపిల్ వంటి ప్రధాన క్లయింట్ల నుంచి వచ్చే ఆదాయం తగ్గిపోతుండటం కూడా కంపెనీ ఆదాయ అంచనాలను దెబ్బతీసింది. దీంతో స్మార్ట్‌ఫోన్లపైనే పూర్తిగా ఆధారపడకుండా, ప్రస్తుతం మార్కెట్‌లో విపరీతమైన డిమాండ్ ఉన్న ‘ఏఐ డేటా సెంటర్లు’ (AI Data Centers), కొత్త టెక్నాలజీ సొల్యూషన్స్‌పై క్వాల్‌కామ్ దృష్టి మళ్లిస్తోంది. ఈ బిజినెస్ డైవర్సిఫికేషన్‌లో భాగంగానే ప్రస్తుత టీమ్‌లను ప్రక్షాళన చేస్తోంది.

2026లో ఆగని టెక్ లేఆఫ్స్ సునామీ

ఈ పరిణామంతో ఈ ఏడాది భారీగా ఉద్యోగులను తొలగిస్తున్న ప్రముఖ టెక్ దిగ్గజాల జాబితాలో క్వాల్‌కామ్ కూడా చేరినట్లయింది. ఇటీవల మైక్రోసాఫ్ట్ 60,000 మందికి వాలంటరీ రిటైర్మెంట్ ఆఫర్ చేయగా, అమెజాన్ సైతం రెండు విడతల్లో ఉద్యోగులను సాగనంపింది. నిన్నటికి నిన్న క్లౌడ్ స్టోరేజ్ దిగ్గజం డ్రాప్‌బాక్స్ 9 శాతం సిబ్బందిని తొలగించింది. ‘Layoffs.fyi’ గణాంకాల ప్రకారం.. 2026లో ఇప్పటివరకు 334 టెక్ కంపెనీలు కలిసి ఏకంగా 1,35,446 మంది ఉద్యోగులను ఇంటికి పంపించడం పరిశ్రమలోని తీవ్ర అనిశ్చితికి అద్దం పడుతోంది.