Health Department | రాబోయే ఏడు రోజులు వ‌ర్షాలు.. ఆరోగ్య శాఖ అప్ర‌మ‌త్తం

Health Department | త్రినేత్ర‌.న్యూస్ : రాష్ట్ర వ్యాప్తంగా రాబోయే ఏడు రోజుల పాటు మోస్త‌రు వ‌ర్షాలు కురిసే అవ‌కాశం ఉంద‌ని హైద‌రాబాద్ వాతావ‌ర‌ణ కేంద్రం వెల్ల‌డించింది. ప‌లు జిల్లాల్లో భారీ వ‌ర్షాలు కురిసే అవ‌కాశం ఉంద‌ని అధికారులు తెలిపారు. ఈ నేప‌థ్యంలో రాష్ట్ర వైద్యారోగ్య శాఖ అప్ర‌మ‌త్త‌మైంది. భారీ వ‌ర్షాల నేప‌థ్యంలో ప్ర‌జ‌లు అప్ర‌మ‌త్తంగా ఉండాల‌ని వైద్యారోగ్య శాఖ సూచించింది. సీజ‌నల్ వ్యాధులు ప్ర‌బ‌లే అవ‌కాశం ఉన్నందున జాగ్ర‌త్త‌గా ఉండాల‌న్నారు.

వైద్యారోగ్య శాఖ సూచ‌న‌లివే..

• ప్ర‌తి ఒక్క‌రూ కూడా త‌మ నివాసాన్ని ప‌రిశుభ్రంగా ఉంచుకోవ‌డంతో పాటు త‌లుపుల‌కు, కిటికీల‌కు దోమ తెర‌ల‌ను ఏర్పాటు చేసుకోవాల‌ని సూచించారు.
• ఇంటి ప‌రిస‌రాల్లో వ‌ర్ష‌పు నీరు, మురుగు నీరు నిల్వ లేకుండా చూసుకోవాల‌న్నారు.
• డొమెస్టిక్ సెప్టిక్ ట్యాంకుల వ‌ద్ద దోమ‌ల నివార‌ణ‌కు చ‌ర్య‌లు తీసుకోవాల‌న్నారు.
• ప్ర‌తి శుక్ర‌వారం డ్రై డేగా ప‌రిగ‌ణించాల‌న్నారు.
• ఇక కుటుంబ స‌భ్యులంద‌రూ కూడా ఫిల్ట‌ర్ చేసిన నీటిని లేదా వేడి చేసిన నీళ్ల‌ను తాగాల‌ని సూచించారు.
• ఆహారం తినే ముందు చేతుల‌ను ప‌రిశుభ్రంగా క‌డుక్కోవాలి.
• బ‌య‌టి ఆహార ప‌దార్థాల‌కు దూరంగా ఉండాలి.
• ద‌గ్గు, జ‌లుబుతో బాధ‌ప‌డేవారు ఇత‌రుల‌కు దూరంగా ఉండాలి.
• జ్వ‌రం, జ‌లుబు, త‌ల‌నొప్పి, గొంతు నొప్పితో బాధ‌ప‌డేవారు త‌క్ష‌ణ‌మే డాక్ట‌ర్‌ను సంప్ర‌దించాలి.