Dr Gadala Srinivasa Rao | పట్టభద్రుల ఎమ్మెల్సీ బరిలో జనసేన: డాక్టర్ గడల శ్రీనివాసరావుకు పవన్ కళ్యాణ్ గ్రీన్ సిగ్నల్

• ఉమ్మడి ఖమ్మం-వరంగల్-నల్గొండ పట్టభద్రుల ఎమ్మెల్సీ బరిలో జనసేన పార్టీ
• అభ్యర్థిగా మాజీ హెల్త్ డైరెక్టర్ డాక్టర్ గడల శ్రీనివాసరావు పేరు ఖరారు
• నిరుద్యోగులు, మేధావులు, ఉద్యోగుల పక్షాన పోరాడుతామని డాక్టర్ గడల ప్రకటన
• ఎన్నికలకు ముందే క్యాండిడేట్‌ను అనౌన్స్ చేసి రేసులో ముందు నిలిచిన జనసేన

Dr Gadala Srinivasa Rao | త్రినేత్ర.న్యూస్ : ఉమ్మడి ఖమ్మం - వరంగల్ - నల్గొండ జిల్లాల గ్రాడ్యుయేట్ (పట్టభద్రుల) ఎమ్మెల్సీ స్థానానికి జనసేన పార్టీ తమ క్యాండిడేట్‌ను ఖరారు చేసింది. పార్టీ చీఫ్ పవన్ కళ్యాణ్ ఆదేశాల మేరకు, తెలంగాణ మాజీ డైరెక్టర్ ఆఫ్ పబ్లిక్ హెల్త్ డాక్టర్ గడల శ్రీనివాసరావును బరిలోకి దించుతున్నట్లు జనసేన పార్టీ అధికారిక ప్రకటన విడుదల చేసింది. నిరుద్యోగులు, ఉద్యోగులు, యువత సమస్యల కోసం శాసనమండలిలో బలంగా వాయిస్ వినిపించడమే లక్ష్యంగా ఆయనను ఎంపిక చేశారు.

ఎవరీ డాక్టర్ గడల శ్రీనివాసరావు?

గతంలో తెలంగాణ రాష్ట్ర పబ్లిక్ హెల్త్ డైరెక్టర్‌గా, వైద్య ఆరోగ్య శాఖలో ఆయన విశేష సేవలు అందించారు. ప్రస్తుతం జనసేన పార్టీ రాష్ట్ర నాయకుడిగా, అధికార ప్రతినిధిగా, ఉమ్మడి ఖమ్మం జిల్లా కో-ఆర్డినేటర్‌గా ఆయన యాక్టివ్‌గా పని చేస్తున్నారు. ఆయన ట్రాక్ రికార్డ్, అనుభవాన్ని దృష్టిలో ఉంచుకుని తెలంగాణ జనసేన అధ్యక్షుడు శంకర్ గౌడ్, జాతీయ కార్యదర్శి రామ్ తాళ్లూరి ఆయన పేరును పవన్ కళ్యాణ్ ముందు ప్రతిపాదించారు. దీనికి హైకమాండ్ వెంటనే గ్రీన్ సిగ్నల్ ఇచ్చింది.

పట్టభద్రుల గొంతుకగా నిలుస్తా..

తన అభ్యర్థిత్వాన్ని ముందస్తుగా ఖరారు చేసినందుకు పవన్ కళ్యాణ్, రామ్ తాళ్లూరి, శంకర్ గౌడ్‌లకు డాక్టర్ గడల స్పెషల్ థాంక్స్ చెప్పారు. "మేధావులు, విద్యావంతులు, యువత సమస్యల పరిష్కారం కోసమే నేను ఈ ఎమ్మెల్సీ రేసులో నిలబడుతున్నాను. శాసన మండలిలో పట్టభద్రుల వాయిస్‌గా ఉంటాను" అని ఆయన కాన్ఫిడెంట్‌గా చెప్పారు. తెలంగాణలో జనసేన సత్తా చాటేందుకు ఉమ్మడి మూడు జిల్లాల గ్రాడ్యుయేట్లు, ఉన్నత విద్యావంతులు తనకు సపోర్ట్ చేయాలని ఆయన విజ్ఞప్తి చేశారు.