Telangana Global Summit | గ్లోబల్ సమ్మిట్‌కు తెలంగాణ గ్రాండ్ ప్లాన్

• ప్రతి డెలిగేట్‌కు ప్రత్యేక ఆఫీసర్
• టూరిజం, విద్యకు గ్లోబల్ వేదిక
• నవంబర్ 15 డెడ్‌లైన్
• పటిష్ట భద్రతా వలయం
• సీఎం రేవంత్ రెడ్డి కీలక ఆదేశాలు

Telangana Global Summit  త్రినేత్ర న్యూస్ : తెలంగాణ బ్రాండ్ ఇమేజ్‌ను అంతర్జాతీయ స్థాయిలో చాటిచెప్పేలా ప్రతిష్టాత్మకంగా నిర్వహించతలపెట్టిన 'గ్లోబల్ సమ్మిట్' సన్నాహాలపై ముఖ్యమంత్రి ఎ.రేవంత్ రెడ్డి ఉన్నతాధికారులతో కీలక సమీక్షా సమావేశం నిర్వహించారు. ప్రపంచ నలుమూలల నుంచి హాజరయ్యే అతిథులకు అత్యుత్తమ ఆతిథ్యం, పటిష్ట భద్రత కల్పించడంలో ఎక్కడా ఎలాంటి లోటుపాట్లకు తావులేకుండా వ్యవహరించాలని సీఎం ఆదేశించారు. ఈ భారీ సదస్సుకు సంబంధించిన పూర్తి కార్యాచరణ ప్రణాళికను నవంబర్ 15 నాటికి సిద్ధం చేయాలని అధికారులకు స్పష్టమైన డెడ్‌లైన్ విధించారు.

ఎయిర్‌పోర్ట్‌లోనే వెల్‌కమ్

సదస్సుకు వచ్చే ప్రతినిధులకు ప్రయాణం నుంచి మొదలుకొని బస, సమావేశాల వరకు అత్యున్నత స్థాయి సౌకర్యాలు కల్పించాలని సీఎం అధికారులకు దిశానిర్దేశం చేశారు. సమ్మిట్‌కు హాజరయ్యే ప్రతి డెలిగేట్‌కు తోడుగా ఉండేందుకు ఒక ప్రత్యేక 'లైజనింగ్ ఆఫీసర్'ను నియమించాలన్నారు. ప్రతినిధులు ఎయిర్‌పోర్టులో దిగిన వెంటనే వారి రిజిస్ట్రేషన్, అధికారిక పాస్‌ల ప్రక్రియను ఎటువంటి ఆలస్యం లేకుండా పూర్తి చేయాలని సూచించారు. సదస్సు ప్రారంభానికి ముందే కార్యక్రమ పూర్తి వివరాలు, సెషన్ల సమాచారాన్ని అతిథులకు ముందుగానే అందజేయాలని స్పష్టం చేశారు.

వరల్డ్ వేదికపై తెలంగాణ టూరిజం

ఈ అంతర్జాతీయ సదస్సును కేవలం పెట్టుబడుల చర్చలకే పరిమితం చేయకుండా, తెలంగాణ సంస్కృతి, పర్యాటక వైభవాన్ని ప్రపంచానికి పరిచయం చేసే వేదికగా మలచాలని సీఎం సూచించారు. రాష్ట్రంలోని ప్రముఖ పర్యాటక ప్రాంతాలను ఆకర్షణీయమైన రీతిలో ప్రదర్శించి, టూరిజం ప్రమోషన్‌కు పెద్దపీట వేయాలని ఆదేశించారు. అంతర్జాతీయంగా చర్చనీయాంశమైన వాతావరణ మార్పులపై సమ్మిట్‌లో ప్రత్యేక చర్చా వేదికను ఏర్పాటు చేయాలన్నారు. అదే విధంగా రాష్ట్ర ప్రభుత్వం ప్రతిష్టాత్మకంగా చేపడుతున్న విద్యా సంస్కరణలను ప్రతిబింబించేలా 'నర్సరీ నుంచి ఆక్స్‌ఫర్డ్ వరకు' తెలంగాణ ఎడ్యుకేషన్ విజన్‌పై సమగ్ర చర్చ జరిగేలా సెషన్లను డిజైన్ చేయాలని స్పష్టం చేశారు.

ఇతర రాష్ట్రాల సీఎంలకు ఆహ్వానం

ఈ గ్లోబల్ సమ్మిట్‌కు ఇతర రాష్ట్రాల ముఖ్యమంత్రులను సైతం గౌరవపూర్వకంగా ఆహ్వానించాలని రేవంత్ రెడ్డి సూచించారు. భారీ సంఖ్యలో అంతర్జాతీయ, జాతీయ ప్రముఖులు తరలివస్తున్నందున భద్రతా ఏర్పాట్లలో అత్యంత అప్రమత్తంగా ఉండాలన్నారు. సమ్మిట్ నిర్వహణలోని ప్రతి విభాగానికి ఒక ప్రత్యేక నోడల్ అధికారితో పాటు, ఒక ప్రత్యేక సెక్యూరిటీ అధికారిని బాధ్యుడిగా నియమించాలని ఆదేశించారు. వీఐపీ కదలికలు, వేదికల వద్ద బందోబస్తు, రవాణా సమన్వయం పక్కాగా ఉండాలని పేర్కొంటూ.. నవంబర్ 15 నాటికి పూర్తి స్థాయి కార్యాచరణ ప్రణాళికతో సమగ్ర నివేదిక సమర్పించాలని ఉన్నతాధికారులను ఆదేశించారు.