N Ramchander Rao | ఓవైపు కరవుతో రైతులు ఇబ్బందులు పడుతుంటే.. కేబినేట్ సమావేశం రద్దు చేసి ఢిల్లీకి వెళ్లిన సీఎం

• రైతులు ఇబ్బందుల్లో ఉంటే ఢిల్లీకి పయనం
• సీఎం రేవంత్‌పై తెలంగాణ బీజేపీ చీఫ్ రామచందర్‌రావు ఘాటు విమర్శలు

N Ramchander Rao | త్రినేత్ర న్యూస్ : రాష్ట్ర ముఖ్యమంత్రి రేవంత్ రెడ్డి, కాంగ్రెస్ ప్రభుత్వంపై బీజేపీ రాష్ట్ర అధ్యక్షుడు ఎన్. రామచందర్‌రావు తీవ్రస్థాయిలో విరుచుకుపడ్డారు. రాష్ట్రంలో రైతాంగం కరవు పరిస్థితులతో తీవ్ర ఇబ్బందులు ఎదుర్కొంటుంటే, బాసటగా నిలవాల్సిన ప్రభుత్వం బాధ్యతారాహిత్యంగా వ్యవహరిస్తోందని ఆరోపించారు. అత్యవసరంగా కేబినెట్ నిర్వహించాల్సిన సమయంలో సమావేశాన్ని రద్దు చేసుకుని సీఎం ఢిల్లీకి వెళ్లారని ఆయన మండిపడ్డారు.

హైదరాబాద్‌లో జరిగిన మీడియా సమావేశంలో రామచందర్‌రావు మాట్లాడుతూ ప్రభుత్వ తీరును ఎండగట్టారు. కాంగ్రెస్ ఇచ్చిన హామీల అమలు విషయంలో ప్రజలను తీవ్రంగా వంచిస్తోందని ధ్వజమెత్తారు.

మంత్రి పొన్నంకు బహిరంగ సవాల్

ఓట్ల తొలగింపు (డిలీషన్) వ్యవహారంపై మంత్రి పొన్నం ప్రభాకర్‌కు రామచందర్‌రావు బహిరంగ సవాల్ విసిరారు. "అక్రమంగా ఓట్లు తొలగించారని మాట్లాడటం కాదు.. ఆధారాలతో కనీసం 10 మంది బాధితులను చీఫ్ ఎలక్టోరల్ ఆఫీసర్ (CEO) ఆఫీసుకు తీసుకురాగలరా?" అని ప్రశ్నించారు. కేవలం రాజకీయ లబ్ధి కోసమే కాంగ్రెస్ అసత్య ఆరోపణలు చేస్తోందని కొట్టిపారేశారు.

'ఆరు గ్యారెంటీలు అమలు చేసేదాకా రాహుల్‌ను రానివ్వం'

ఎన్నికల సమయంలో ఇచ్చిన ఆరు గ్యారెంటీలు, విద్యార్థులకు ఫీజు రీయింబర్స్‌మెంట్ బకాయిలను విడుదల చేసేవరకు కాంగ్రెస్ అగ్రనేత రాహుల్ గాంధీని రాష్ట్రంలో అడుగుపెట్టనివ్వబోమని రామచందర్‌రావు హెచ్చరించారు. రాష్ట్రంలో మాదకద్రవ్యాల (డ్రగ్స్) నియంత్రణపై శ్రద్ధ పెట్టకుండా, ఇతర రాష్ట్రాల్లో నీతులు చెప్పడం హాస్యాస్పదంగా ఉందని ఎద్దేవా చేశారు.

కాంగ్రెస్ అవలంబిస్తున్న విధానాలు, మత ఆధారిత బుజ్జగింపు రాజకీయాలు సరికావని.. ఆ పార్టీకి సంస్కృతి, సంప్రదాయాల గురించి మాట్లాడే నైతిక హక్కు లేదని విమర్శించారు.

ప్రధాని మోదీ సేవలకు బీజేపీ అభినందనలు

మరోవైపు, ప్రధాని నరేంద్ర మోదీ 25 ఏళ్ల నిరంతర ప్రజా సేవను పురస్కరించుకుని తెలంగాణ బీజేపీ ప్రత్యేకంగా అభినందన తీర్మానాన్ని ఆమోదించింది. ఎలాంటి విరామం లేకుండా దేశాభివృద్ధికి, ప్రజా సంక్షేమానికి మోదీ చేస్తున్న సేవలు ప్రతి ఒక్కరికీ ఆదర్శప్రాయమని రామచందర్‌రావు ఈ సందర్భంగా కొనియాడారు.