Assembly Budget Session | ఈ నెల 26 నుంచి అసెంబ్లీ స‌మావేశాలు.. 28న బ‌డ్జెట్‌

Assembly Budget Session | త్రినేత్ర‌.న్యూస్‌: రాష్ట్ర అసెంబ్లీ బ‌డ్జెట్ సమావేశాలకు (Assembly Budget Session) ముహూర్తం ఖ‌రారైంది. ఫిబ్ర‌వ‌రి 26 నుంచి అసెంబ్లీ (Assembly) సమావేశాలను ప్రారంభించాలని ప్రభుత్వం నిర్ణయించింది. ఈ నెల 28న అసెంబ్లీలో ఉప‌ముఖ్య‌మంత్రి మ‌ల్లు భ‌ట్టి విక్ర‌మార్క (Mallu Bhatti Vikramarka) 2026-27 ఆర్థిక‌ సంవ‌త్స‌రానికి సంబంధించిన వార్షిక బ‌డ్జెట్‌ను ప్ర‌వేశ‌పెట్ట‌నున్నారు. దీనికి సంబంధించిన ఇప్ప‌టికే కసరత్తు పూర్తి చేసిన ఆర్థిక శాఖ, బడ్జెట్ ప్రతిపాదనలకు తుది మెరుగులు దిద్దుతున్న‌ది.

కాగా, గత బడ్జెట్ కంటే ఈసారి కేటాయింపులు భారీగా ఉండే అవకాశం ఉందని తెలుస్తున్న‌ది. ముఖ్యంగా సంక్షేమ పథకాలు, మౌలిక సదుపాయాల కల్పనకు ప్ర‌భుత్వం ఈ బడ్జెట్‌లో పెద్దపీట వేయనున్న‌ది. బడ్జెట్‌పై సమగ్రంగా చర్చించేందుకు వీలుగా 10 నుంచి 15 రోజుల పాటు స‌భ‌ను నిర్వహించాలని భావిస్తున్న‌ది. సభలో ప్రతిపక్షాలు లేవనెత్తే అంశాలకు సమాధానం ఇవ్వడంతో పాటు, పలు కీలక బిల్లులను కూడా ఈ సమావేశాల్లో ఆమోదించుకోవాలని భావిస్తున్న‌ది. ఇటీవ‌ల సింగ‌రేణిపై భారీగా అవినీతి ఆరోప‌ణ‌లు వ‌చ్చిన నేప‌థ్యంలో.. బొగ్గు గ‌నుల‌కు సంబంధించిన పూర్తి స‌మాచారాన్ని శాస‌న స‌భ ముందు ఉంచుతామ‌ని ఇప్ప‌టికే సీఎం రేవంత్ రెడ్డి ప్ర‌క‌టించిన విష‌యం తెలిసిందే. ఈనేప‌థ్యంలో సింగ‌రేణిపై కూడా ఈ స‌మావేశాల్లో చ‌ర్చ జ‌రిగే అవ‌కాశం ఉన్న‌ది.