Telangana Assembly Resolution | కేసీఆర్ క్షమాపణకు అసెంబ్లీలో తీర్మానం

• స్పీకర్‌ను దూషించిన బీఆర్ఎస్ ఎమ్మెల్సీలు తాతా మధు, నవీన్ కుమార్‌లపై అసెంబ్లీలో తీర్మానం
• మహిళల ముందే చొక్కాలు విప్పడం సిగ్గుచేటంటూ మండిపడ్డ మంత్రి దామోదర రాజనర్సింహ
• బీఆర్ఎస్ సభ్యుల తీరుపై కేసీఆర్ బేషరతుగా క్షమాపణ చెప్పాలని అసెంబ్లీలో డిమాండ్
• తదుపరి క్రమశిక్షణా చర్యల కోసం ఆధారాలతో సహా శాసనమండలి చైర్మన్‌కు నోటీసులు

Telangana Assembly Resolution | త్రినేత్ర.న్యూస్ : తెలంగాణ శాసనసభ (Telangana Assembly) సమావేశాల్లో తీవ్ర ఉద్రిక్తతలు చోటుచేసుకున్నాయి. శాసనసభ ప్రాంగణంలో స్పీకర్‌ను ఉద్దేశించి అసభ్యకరంగా మాట్లాడటంతో పాటు, మహిళల ముందే చొక్కాలు విప్పి వీరంగం సృష్టించిన బీఆర్ఎస్ ఎమ్మెల్సీలు తాతా మధు, నవీన్ కుమార్ రెడ్డిలు, ఎమ్మెల్యేల తీరుపై ప్రభుత్వం తీవ్రంగా స్పందించింది. వైద్య ఆరోగ్య శాఖ మంత్రి దామోదర రాజనర్సింహ ఈ ఇద్దరు సభ్యుల ప్రవర్తనను తీవ్రంగా ఖండిస్తూ సభలో కీలక తీర్మానం ప్రవేశపెట్టారు.

రాజ్యాంగబద్ధ హోదాకు అవమానం

సెప్టెంబర్ 7, 2026 న అసెంబ్లీ గేట్ నంబర్ 3 వద్ద ఈ ఇద్దరు ఎమ్మెల్సీలు స్పీకర్ హోదాను కించపరిచేలా వ్యవహరించారని మంత్రి ఆరోపించారు. రాజకీయ విభేదాలు ఏవైనా ఉండొచ్చు కానీ, ఒక రాజ్యాంగబద్ధమైన స్పీకర్ స్థానాన్ని అవమానించడం శాసనసభ గౌరవానికి, సభా హక్కులకు విఘాతం కలిగించడమేనని తీర్మానంలో స్పష్టం చేశారు. మహిళల పట్ల వారు ప్రవర్తించిన తీరు సమాజం తలదించుకునేలా ఉందంటూ సభ తీవ్ర అభ్యంతరం వ్యక్తం చేసింది. ఇటువంటి ప్రవర్తన శాసన మండలి సభ్యుడి హోదాకు ఏమాత్రం తగదని మంత్రి విమర్శించారు.

కేసీఆర్ బేషరతుగా క్షమాపణ చెప్పాలి

బీఆర్ఎస్ సభ్యులు చేసిన ఈ అనుచిత ప్రవర్తనకు ప్రతిపక్ష నేత కేసీఆర్ (KCR) బాధ్యత వహించాలని మంత్రి డిమాండ్ చేశారు. సభ హుందాతనాన్ని, మర్యాదను కాపాడేందుకు స్పీకర్‌కు ఆయన బేషరతుగా క్షమాపణ చెప్పాలని తీర్మానించారు. మహిళల పట్ల అసభ్యంగా ప్రవర్తించడాన్ని ప్రభుత్వం ఏమాత్రం సహించబోదని స్పష్టం చేశారు.