Singireddy Niranjan Reddy | సిరిసిల్లలో రేవంత్ ప్రసంగం ఆత్మస్తుతి, పరనింద : హంతకుడే సంతాపం తెలిపినట్లుంది
సిరిసిల్ల సభలో రేవంత్ రెడ్డి ప్రసంగం ఆత్మస్తుతి, పరనిందలా మారిందని మాజీ మంత్రి నిరంజన్ రెడ్డి మండిపడ్డారు. చేనేతల పొట్టకొట్టి మాట్లాడటం విడ్డూరమన్నారు.
సంక్షిప్త సారాంశం
సిరిసిల్ల బహిరంగ సభలో సీఎం రేవంత్ రెడ్డి చేసిన ప్రసంగం కేవలం బీఆర్ఎస్పై నిందలు మోపడానికే పరిమితమైందని మాజీ మంత్రి సింగిరెడ్డి నిరంజన్ రెడ్డి ధ్వజమెత్తారు. బతుకమ్మ చీరల ఆర్డర్లు రద్దు చేసి సిరిసిల్ల నేతన్నల పొట్టకొట్టిన ప్రభుత్వమే, ఇప్పుడు వారి గురించి మాట్లాడటం హంతకుడే సంతాపం తెలిపినట్లు ఉందని విమర్శించారు. అధికారం చేపట్టి మూడేళ్లు కావస్తున్నా మంత్రివర్గ విస్తరణ చేతకాని రేవంత్.. సిరిసిల్ల, గజ్వేల్, సిద్దిపేటలో గెలిపిస్తే మంత్రులను చేస్తామనడం హాస్యాస్పదమని ఎద్దేవా చేశారు. బీఆర్ఎస్ హయాంలో నిర్మించిన కరీంనగర్ కలెక్టరేట్ లాంటి భవనాలకు సున్నాలు వేసి రిబ్బన్ కటింగులు చేయడం తప్ప కాంగ్రెస్ చేసిందేమీ లేదని ఆరోపించారు.
- మాజీ మంత్రి నిరంజన్ రెడ్డి ఫైర్
Singireddy Niranjan Reddy | త్రినేత్ర న్యూస్ : సిరిసిల్ల బహిరంగ సభ వేదికగా ముఖ్యమంత్రి రేవంత్ రెడ్డి చేసిన ప్రసంగంపై బీఆర్ఎస్ సీనియర్ నేత, మాజీ మంత్రి సింగిరెడ్డి నిరంజన్ రెడ్డి తీవ్రస్థాయిలో విరుచుకుపడ్డారు. రేవంత్ ప్రసంగం ఆత్మస్తుతి, పరనిందలా సాగిందని ఆయన ఒక ప్రకటనలో దుయ్యబట్టారు. సిరిసిల్ల ప్రజలకు, చేనేతలకు కాంగ్రెస్ ప్రభుత్వం ఏం చేసిందో చెప్పుకోలేకనే కేసీఆర్, బీఆర్ఎస్ పార్టీలపై అసత్య ఆరోపణలు చేయడానికి పరిమితమయ్యారని విమర్శించారు.
సచివాలయం ముందు వినాయక నిమజ్జనం సందర్భంగా మార్మోగిన కేసీఆర్ పాటలు సీఎం రేవంత్ రెడ్డి గుండెల్లో రైళ్లు పరిగెత్తించాయని, ఆ తీవ్ర భయమే సిరిసిల్ల సభలో ఆయన ముఖంలో కొట్టొచ్చినట్లు కనిపించిందని నిరంజన్ రెడ్డి ఎద్దేవా చేశారు. కాంగ్రెస్ గడీల పాలనపై తెలంగాణ సామాన్యులు తిరుగుబాటు ఫిరంగులు మోగించేందుకు సిద్ధంగా ఉన్నారని హెచ్చరించారు.
నేతన్నల పొట్టకొట్టి.. సానుభూతి నాటకాలా?
గత బీఆర్ఎస్ ప్రభుత్వం అమలు చేసిన బతుకమ్మ చీరల ఆర్డర్లను రద్దు చేసి సిరిసిల్ల చేనేత కార్మికులను రోడ్డున పడేసింది కాంగ్రెస్ కాదా అని నిరంజన్ రెడ్డి నిలదీశారు. "నేతన్నల పొట్టకొట్టిన వారే ఇప్పుడు వేదికలపైకి వచ్చి వారి క్షేమం గురించి మాట్లాడటం చూస్తుంటే.. హంతకుడే నేరుగా వచ్చి సంతాపం తెలిపినట్లుగా ఉంది. కనీస డిగ్నిటీ ఆఫ్ లేబర్ (శ్రమ గౌరవం) అంటే ఏంటో తెలియని వ్యక్తి తెలంగాణకు సీఎంగా ఉండటం రాష్ట్ర ప్రజల దౌర్భాగ్యం" అని ఘాటుగా వ్యాఖ్యానించారు.
మంత్రివర్గ విస్తరణ చేతకాదు గానీ.. హామీలా?
అధికారంలోకి వచ్చి మూడేళ్లు గడుస్తున్నా ఇప్పటివరకు పూర్తిస్థాయి మంత్రివర్గాన్ని విస్తరించుకునే ధైర్యం లేని రేవంత్ రెడ్డి.. సిరిసిల్ల, సిద్దిపేట, గజ్వేల్లలో కాంగ్రెస్ను గెలిపిస్తే మంత్రి పదవులు ఇస్తామని మాట్లాడటం విడ్డూరంగా ఉందని నిరంజన్ రెడ్డి ఎద్దేవా చేశారు. సొంత పార్టీ ఎమ్మెల్యేలకే న్యాయం చేయలేని నాయకత్వం ఇతర ప్రాంతాల ప్రజలకు హామీలు ఇవ్వడం హాస్యాస్పదమన్నారు.
బీఆర్ఎస్ కట్టిన భవనాలకు సున్నాలు.. రిబ్బన్ కటింగులు
కరీంనగర్ నూతన కలెక్టరేట్ నిర్మాణంలో కాంగ్రెస్ ప్రభుత్వం ఒక్క ఇటుక కూడా పెట్టలేదని ఆయన స్పష్టం చేశారు. కేసీఆర్ హయాంలో పూర్తి చేసిన ప్రభుత్వ కార్యాలయాలకు, భవనాలకు రంగులు, సున్నాలు వేసి తామే నిర్మించినట్లు రిబ్బన్ కటింగ్లు చేసుకుంటూ ప్రచారం చేసుకోవడం సిగ్గుచేటని మండిపడ్డారు. రాబోయే రోజుల్లో కాంగ్రెస్ వైఫల్యాలను ప్రజలు గమనించి తగిన గుణపాఠం చెబుతారని నిరంజన్ రెడ్డి స్పష్టం చేశారు.
ట్యాగ్స్:
తాజావార్తలు
- ●Tummala Nageshwar Rao | వచ్చే ఎన్నికల్లో పోటీ చేస్తా : మంత్రి తుమ్మల
- ●Infant | ఓ చిన్నారి పుట్టుకతోనే అరుదైన ఘనత సాధించింది..
- ●Real Star Srihari | రియల్ స్టార్ శ్రీహరి ఇంట పెళ్లి సందడి..!
- ●BRS Party | 22న ఓరుగల్లులో బీఆర్ఎస్ బహిరంగ సభ..!
- ●Tenth Exam Fee | టెన్త్ విద్యార్థులకు అలర్ట్.. పది పరీక్షల ఫీజు గడువు పొడిగింపు
- ●Yadagirigutta | యాదగిరిగుట్టలో 20 నుంచి కార్తికోత్సవాలు

Tummala Nageshwar Rao | వచ్చే ఎన్నికల్లో పోటీ చేస్తా : మంత్రి తుమ్మల

Infant | ఓ చిన్నారి పుట్టుకతోనే అరుదైన ఘనత సాధించింది..

Real Star Srihari | రియల్ స్టార్ శ్రీహరి ఇంట పెళ్లి సందడి..!

BRS Party | 22న ఓరుగల్లులో బీఆర్ఎస్ బహిరంగ సభ..!






