POCSO Cases Telangana | మగపిల్లలకూ తప్పని లైంగిక వేధింపులు: తెలంగాణలో 9 నెలల్లో 62 పోక్సో కేసులు

• వెలుగుచూస్తున్న విస్తుపోయే నిజాలు

POCSO Cases Telangana | త్రినేత్ర న్యూస్ : లైంగిక వేధింపులు, అకృత్యాలు కేవలం ఆడపిల్లలకే పరిమితం కావడం లేదు. సమాజంలో మగపిల్లలు కూడా తీవ్రమైన వేధింపులకు గురవుతున్నారనే చేదు నిజాన్ని తాజా గణాంకాలు స్పష్టం చేస్తున్నాయి. తెలంగాణ పోలీస్ ఉమెన్ సేఫ్టీ వింగ్ (Women Safety Wing) విడుదల చేసిన వివరాల ప్రకారం.. 2026 జనవరి నుంచి సెప్టెంబర్ మధ్య కేవలం తొమ్మిది నెలల్లోనే బాలురపై లైంగిక దాడికి సంబంధించి ఏకంగా 62 పోక్సో (POCSO) కేసులు నమోదయ్యాయి. ఈ సంఖ్య గతేడాది మొత్తం నమోదైన కేసుల సంఖ్యను అప్పుడే దాటేసింది.

మూడేళ్లలో 127 మంది బాధితులు

పోలీస్ రికార్డుల ప్రకారం.. 2024 నుంచి 2026 సెప్టెంబర్ వరకు మొత్తం 127 మంది బాలురు పోక్సో చట్టం కింద బాధితులుగా నమోదయ్యారు. 2024లో కేవలం 4 కేసులు మాత్రమే నమోదు కాగా, 2025 నాటికి ఈ సంఖ్య 61కి చేరింది. ఇక 2026 తొలి తొమ్మిది నెలల్లోనే 62 కేసులు వెలుగులోకి వచ్చాయి.

ప్రాంతాలవారీగా పరిశీలిస్తే.. 2025లో నమోదైన 61 కేసుల్లో అత్యధికంగా హైదరాబాద్‌లో 24, ఖమ్మంలో 13 కేసులు నమోదయ్యాయి. ఇక 2026లో అత్యధికంగా మహబూబాబాద్‌లో 9 కేసులు నమోదు కాగా.. మిర్‌చౌక్, శంషాబాద్, మేడ్చల్-మల్కాజిగిరిలలో 7 చొప్పున కేసులు నమోదయ్యాయి. గచ్చిబౌలి, హైదరాబాద్, కరీంనగర్, నిర్మల్, వరంగల్ ప్రాంతాల్లో మూడేసి కేసులు రికార్డయ్యాయి.

అవగాహన పెరుగుతోందా.. కేసుల సంఖ్య పెరుగుతోందా?

ఈ కేసుల పెరుగుదల అంటే నేరాల సంఖ్య పెరగడం మాత్రమే కాదని, ప్రజల్లో అవగాహన పెరిగి కేసులు రిపోర్ట్ చేసే ధైర్యం చేయడం కూడా కావచ్చని అధికారులు విశ్లేషిస్తున్నారు. అయితే, సమాజంలో ఉన్న అపోహలు, కుటుంబ పరువు పోతుందన్న భయంతో ఇంకా ఎన్నో ఘటనలు పోలీసుల దృష్టికి రాకుండానే మిగిలిపోతున్నాయని వారు ఆందోళన వ్యక్తం చేస్తున్నారు. ముఖ్యంగా నేరస్థులు..  పరిచయస్తులు లేదా బంధువులే అయినప్పుడు పిల్లలు కూడా ఈ విషయాన్ని బయటకు చెప్పేందుకు జంకుతున్నారు.

ధైర్యంగా చెప్పి.. న్యాయం పొందిన చిన్నారులు

పిల్లలు తమ తల్లిదండ్రులతో సమస్యను పంచుకున్నప్పుడే ఈ నేరాలు వెలుగులోకి వచ్చాయి. నల్లగండ్లలోని ఒక పాఠశాలలో నాలుగేళ్ల బాలుడిని ఆడియో-విజువల్ గదిలోకి తీసుకెళ్లి లైంగిక దాడికి పాల్పడిన 30 ఏళ్ల సెక్యూరిటీ గార్డు విషయాన్ని ఆ చిన్నారి తండ్రికి చెప్పాడు. ఈ కేసులో విచారణ జరిపిన ప్రత్యేక పోక్సో కోర్టు నిందితుడికి 5 సంవత్సరాల జైలు శిక్షతో పాటు బాధితుడికి రూ. 1 లక్ష పరిహారాన్ని ఖరారు చేసింది.

మరొక ఘటనలో, కామాటిపురా పరిధిలో 10 ఏళ్ల బాలుడిని టీవీ చూపిస్తానని ఇంట్లోకి పిలిచి పదేపదే దారుణంగా వేధించిన 29 ఏళ్ల బంధువుపై బాలుడు భరించలేని నొప్పి, రక్తస్రావంతో తండ్రికి అసలు విషయం చెప్పడంతో కేసు నమోదైంది. ఈ కేసులో న్యాయస్థానం నిందితుడికి 25 సంవత్సరాల కఠిన కారాగార శిక్ష విధించడంతో పాటు, బాలుడి వైద్య, విద్యా అవసరాల నిమిత్తం రూ. 75,000 పరిహారం చెల్లించాలని ఆదేశించింది.

చిన్నారులు నిర్భయంగా మాట్లాడగలిగే వాతావరణాన్ని ఇంట్లో సృష్టించినప్పుడే ఇలాంటి దారుణాల నుంచి వారిని రక్షించడం, నిందితులకు కఠిన శిక్షలు పడేలా చేయడం సాధ్యమవుతుందని అధికారులు సూచిస్తున్నారు.

Also Read | సామాన్యులకు డబ్బు ఆశ చూపి వాళ్ల డాక్యుమెంట్స్‌తో మ్యూల్ అకౌంట్లు తెరిచి..