Telangana Sahitya Akademi | నవంబర్ 14 బాలల దినోత్సవం: విద్యార్థుల ప్రతిభకు పట్టం.. ఉత్తమ రచనలతో ప్రత్యేక పుస్తకం

Telangana Sahitya Akademi | త్రినేత్ర న్యూస్ : నవంబర్ 14 బాలల దినోత్సవం సందర్భంగా రాష్ట్రవ్యాప్తంగా పాఠశాల విద్యార్థుల కోసం తెలంగాణ సాహిత్య అకాడమీ నిర్వహించిన రచన పోటీలకు అనూహ్య స్పందన లభించింది. 6వ తరగతి నుంచి 10వ తరగతి చదువుతున్న బాలబాలికల నుంచి సుమారు 800 మందికి పైగా తమ రచనలను పంపించినట్లు సాహిత్య అకాడమీ కార్యదర్శి డాక్టర్ నామోజు బాలాచారి వెల్లడించారు.

చిన్ననాటి నుంచే సాహిత్యంపై ఆసక్తి

నేటి తరం విద్యార్థుల్లో దాగివున్న సృజనాత్మకతను వెలికితీయడంతో పాటు చిన్ననాటి నుంచే భాష, సాహిత్యం పట్ల మక్కువ కలిగించాలన్న లక్ష్యంతో గత మూడేళ్లుగా ఈ పోటీలను నిర్వహిస్తున్నట్లు అకాడమీ తెలిపింది. పాఠశాల స్థాయి నుంచే విద్యార్థులు అన్ని రంగాలతో పాటు సాహిత్య రంగంలోనూ రాణించగలరని పేర్కొన్నారు. ఇలాంటి పోటీలు పిల్లల ఆలోచనా పరిధిని విస్తృతం చేయడంతో పాటు వారి చదువుకు, స్నేహభావం పెంపొందడానికి ఎంతో మేలు చేస్తాయని కార్యదర్శి అభిప్రాయపడ్డారు.

5 విభాగాల్లో క్యాష్ ప్రైజులు.. మెమెంటోలు

కథానిక, కవిత్వం, పద్యం, గేయం/పాట, నాటిక తదితర సాహిత్య ప్రక్రియల్లో సెప్టెంబరు 30 నాటికి వివిధ పాఠశాలల నుంచి పెద్దఎత్తున రచనలు అకాడమీకి చేరాయి. ఇందులో ప్రతి కేటగిరీ నుంచి మొదటి మూడు స్థానాల్లో నిలిచిన వారికి ప్రథమ, ద్వితీయ, తృతీయ బహుమతులు ఇవ్వనున్నారు. అదనంగా ప్రతి అంశంలో ముగ్గురు చొప్పున విద్యార్థులకు ప్రోత్సాహక బహుమతులు కేటాయించనున్నారు. విజేతలందరికీ నగదు బహుమతి (Cash Prize), జ్ఞాపిక (Memento), ప్రశంసాపత్రాలను అందజేస్తారు.

'బాలల ప్రపంచం' తరహాలో మరో పుస్తకం

వచ్చిన ఎంట్రీల నుంచి అత్యుత్తమ రచనలను ఎంపిక చేసి, గతేడాది ప్రచురించిన 'బాలల ప్రపంచం' పుస్తకం లాగే ఈ ఏడాది కూడా విద్యార్థుల రచనలన్నింటినీ కలిపి ఒక పుస్తకంగా తీసుకురానున్నారు. ఈ అద్భుత సంకలనాన్ని చిన్నారులకు శాశ్వత కానుకగా అందించనున్నట్లు అకాడమీ స్పష్టం చేసింది.

పిల్లలను సాహిత్య రంగం వైపు ప్రోత్సహించి భాగస్వాములను చేసిన పాఠశాలల ఉపాధ్యాయులు, తల్లిదండ్రులకు అకాడమీ అభినందనలు తెలిపింది. రచనల ఎంపికలో తుది నిర్ణయం పూర్తిగా అకాడమీదేనని, ఈ విషయంలో ఎలాంటి ఉత్తర ప్రత్యుత్తరాలకు తావులేదని స్పష్టం చేసింది.

Also Read | ప్ర‌భుత్వ ఉద్యోగుల‌కు రెండు డీఏలు మంజూరు