Medaram | మేడారం జాత‌ర‌కు ప్ర‌త్యేక బ‌స్సులు

Medaram | త్రినేత్ర‌.న్యూస్ : ఆసియాలోనే అతిపెద్ద జాత‌ర అయిన మేడారం (Medaram) స‌మ్మ‌క్క సార‌ల‌మ్మ (Sammakka Sarallamma) జాత‌ర‌కు తెలంగాణ ఆర్టీసీ (TGRTC) ప్ర‌త్యేక బ‌స్సుల‌ను (Special Buses) న‌డుప‌నున్న‌ట్లు ప్ర‌క‌టించింది. ఈ నెల 25వ తేదీ నుంచి 31వ తేదీ వ‌ర‌కు వివిధ ప్రాంతాల నుంచి మేడారంకు మొత్తం 3,495 బ‌స్సులు న‌డుప‌నున్న‌ట్లు అధికారులు తెలిపారు. ఇవి ప్ర‌త్యేక బ‌స్సుల‌ని, అందుకే ఆ బ‌స్సుల్లో యాభై శాతం అద‌న‌పు చార్జీలు వ‌సూలు చేస్తామ‌ని స్ప‌ష్టం చేశారు. ప్ర‌జ‌లు ఈ అవ‌కాశాన్ని స‌ద్వినియోగం చేసుకోవాల‌ని సూచించారు. ఆర్టీసీ బ‌స్సు ప్ర‌యాణం సుర‌క్షిత‌మైన‌ద‌ని, సౌక‌ర్య‌వంత‌మైన‌ద‌ని చెప్పారు.

మేడారం జాత‌ర ఈ నెల 28వ తేదీన ప్రారంభ‌మై 31వ తేదీ వ‌ర‌కు జ‌రుగుతుంది. తొలిరోజు సాయంత్రం ఆరుగంట‌ల‌కు క‌న్నెప‌ల్లి నుంచి సార‌ల‌మ్మ‌, కొండాయి నుంచి గోవింద‌రాజులు, పూనుగొండ్ల నుంచి ప‌గిడిగిద్ద‌రాజు గ‌ద్దెల‌పై కొలువుదీర‌డంతో జాత‌ర ప్రారంభ‌మ‌వుతుంది. 29న సాయంత్రం ఆరు గంట‌ల‌కు చిల‌క‌ల‌గుట్ట నుంచి స‌మ్మ‌క్క దేవ‌త‌ను కుంకుమ భ‌రిణె రూపంలో గ‌ద్దెపైకి తీసుకువ‌స్తారు. ఇది మొత్తం జాత‌ర‌లోనే కీల‌క ఘ‌ట్టం. 30న భ‌క్తులు త‌మ మొక్కుల‌ను చెల్లిస్తారు. 31న సాయంత్రం ఆరు గంట‌ల‌కు దేవ‌త‌ల వ‌న ప్ర‌వేశంతో జాత‌ర ముగుస్తుంది.

ఈ జాత‌ర‌కు తెలంగాణ ప్ర‌భుత్వం భారీ స్థాయిలో ఏర్పాట్లు చేసింది. ఇప్ప‌టికే గ‌ద్దెల ప్రాంగ‌ణాన్ని పున‌ర్నిర్మించిన ప్ర‌భుత్వం జాత‌ర ఏర్పాట్ల‌కు రూ.వంద కోట్ల‌కు పైగా నిధులు ఖ‌ర్చుపెట్టి పెద్ద ఎత్తున అభివృద్ధి కార్య‌క్ర‌మాలు చేప‌ట్టింది.